MARK 3

Jisü no Au Kithiu Shipivi

(Mt 12:9-14; Lk 6:6-11)

1Ado hami thiu itaghi Jisü no sinagog lo iloghi kelo au thive keu timi lakhi aghi. 2Timi khami no akipimi Jisü tsüniye pa ye Sabbath lono timi hu shipivi nani kemo keno jukutoa. 3Jisü no au kithiu vilo pi, “Hilau ighilo.” 4Pa no panoqo vilo ighiju, “Sabbath lo khikhiu no akhuaye kiqilo achipi kea: akivi mlakeu no keo timi ghüza keu no kea; momu püxülu keu no keo pithive keu no kea?” Ikemu panoqo ye tshümu shimono ngove. 5Pa no amlo vimoqhiyi ighowo panoqo juno pano mlo kümka jupe ighono pa mlo pünaqhive, tishino pa no timi hu vilo pi, “O u xachholo.” Timi huno pa u xachho, eno ti ye kuchou no athoputho luve. 6Tile Phariseemi no khalau ipeve no mtazü Herod papemi sasü kishi pa kütsave kepu keno kuchughu thuve.

Aqokitikhi Kije no Jisü Pape

7Jisü no pa khopemi sasü azüghi phivilo wu, eno aqokitikhi kije no pa pape wu, ti ye Galilee ngo Judea, 8Jerusalem ngo Idumea, Jordan kukuu eno Tyre ngo Sidon hokümxa lo akeqoe. Kughou Jisü no mlaitha keu ghili kümtsü aqokitikhi kije no chilu keno, panoqo no pa lau ighi. 9Aqokitikhi no pa tsakibive nosa kehu pa no akhopemi vilo ashuka kuto aghilo pive, 10kughengu pa no timi kutomo shipivive kehu aküsü jeli xapu akemi kümtsü no pa buniye tsatsai kuko iloghi ke. 11Kugho kughomu mithekumo ghawuqo no pa ithulu kelo, panoqo no pa zülo ikiqive no ighamku pi, “No ye Alhou Nue.” 12Ikemu timi pelo ithi pemoni ke pa no mtotoi panoqo ghasüve.

Apostolmi Chighikini

(Mt 10:1-4; Lk 6:12-16)

13Jisü no atoghi lakhi lo iqho püzü timi khunoqo pa no avehupu shi akeno kusü, eno panoqo no ighi. 14Pa no timi chighikini süsülu (tipaqo pesü apostolmi ipi jeku tsü); tishianguno panoqo pelo pa gholo lakhi shino khalau sheshu wupe, 15eno tüghami hapheni keu kükagha ithulu peniye ke. 16Pa no süsü keu timi chighikini ye hipaqo: Simon (khuu je pa no Peter kuvetsü keno); 17Zebedee nu James ngo pa thiküzüu John (pama je no Boanerges kuvetsü, tipa kiqi ye Tsütsüküsü Nuliqo); 18Andrew; Philip; Bartholomew; Matthew; Thomas; Alphaeus nu James; Thaddaeus; Zealot mqolomi Simon; 19eno Jisü jechuve keu Judas Iscariot.

Jisü ngo Beelzebul

(Mt 12:22-32; Lk 11:14-23; 12:10)

20Tishino Jisü ye aki lo wove, ikelo itaghi timi kitikhi no shesü ighive kehu Jisü ngo akhopemi ye chushoni keu ghi shimlave. 21Kughou Jisü kibolomi no ti chilu keno, panoqo no pa ghasüve niye wu, kughengu timiqo no pa ghili hitoi kügha ake, “Pa ye akükümsü kühavae.”

Aghungu Kimthe Piküptha

22Tile Jerusalem lono Ayezah shikükami iqighi no piae, “Pa ye Beelzebul no peitha ani,” eno, “Pa ye tüghami yepetou vecheo tüghami haphe ani.” 23Jisü no panoqo ku püzü kimghikipiye lono panoqo vilo pi, “Kishino Satan no Satan haphe luni kea? 24Kükaqha lakhi dolono laumi shi kijethave aye, kükaqha tipau ye puthugho lumoae. 25Akibo lakhi dolono kijethave aye, akibo tipau ye puthugho lumoae. 26Titoi Satan no pa ampi mjochile thughive no kijethave aye, pa ye puthugho lumoa eno pa ghulokiu ghi kishekha niae. 27Tinguno alau, akumtomi ki xüni kelo atüghüshi pa tshüpe qhilumo keloye khunomu pa ki hepho ilo thime kivi xüpe wuve mlae. Pa no ti shilu kethiu no xüpe wulu nani.

28“Mtsüqheino I no nongu vilo piani, timiqo xine eno panoqo no kiukiu küthakügha tsa pi püaghi namu qhoi akipimi qhivetsü nani, 29ikemu khunono Aghungu Kimthe thaighani keno khilemu akipimi qhitsümo nani, eno pa ye lhokta xine shivae”— 30timiqo no, “Pa ye mithekumo ghawu ani,” ipi akehu Jisü no hipa tsa pike.

Jisü Paza ngo Athiküzümi

(Mt 12:46-50; Lk 8:19-21)

31Tile Jisü paza ngo pa thiküzümi no ighi, eno khalau puthugho no aghini shipe Jisü ku puwu. 32Aqokitikhi no pa bope akelo khami no pa vilo pi, “O za ngo o thiküzümi ye khalau o phucheni.” 33Pa no panoqo khochile, “Khuu no I za eno khuu no I thiküzümi kea?” 34Eno pa bope akeqo lau jupuwo no pa no pi, “I za eno I thiküzümi ye hipaqo ke! 35Kughengu khunono Alhou pulou shi cheni keno, pa no I thiküzü I chelimi eno I za ke.”

Currently Selected:

MARK 3: SUMRVBSI

Highlight

Copy