MICAH 7
7
Alhouw Xakulu Khelo
1Ahaküsapu ye ni ke, kughengu ni ye mütsü tusho
xathi xokütsüve kethiu toi,
atsaithi kixipheve kethiu toi:
atsaipho chukepu kühavae,
I ngulho no puloniqhiyi chekeu mubuthi amsüu kühavae.
2Alhou pape chekemi ye ayeghi lono kühavae,
eno timi gholo akümzümi ye khumu kühavae;
panongu kümtsü no aji peleni ye ngokhe ani eno akhame
pesü lakhino lakhi hakuqo ani.
3Panoqo u ye tsaqüi alhoksa shiniye tipau shou bepe ani;
yepemi ngo xaküthami no külügho khu, eno kijemi no pa
lolo küsakügha shinishi keu picheni;
ikehu panoqo no kuchughu küqha cheni.
4Pano dolo akiviu no asahu toi,
eno shishe akümzüu no asahu ghutu lakhi toike.
Nongu hikuju eno ghimeni keu tsala ye ighivae;
panoqo no kübangüni keu ye itehi au lo auvae.
5Akisüghüu pükhübe kevilo;
aküsau lau pülükibe akevilo;
o umlo lo ihozü chekeu totimi
launo o kichi hukikha khelulo;
6kughengu anu no küthakügha shi apu peitha,
anga no paza lachile ithughi,
amukishiu no ani hebide ani;
milakhi ghümi ye pa ampi kilo akemiqo ke.
7Ikemu I ghengu ye, ni ye Ampeu lau jupuku anani;
ni ye Alhouw xakulu khe nani;
I Lhou no I sütsa chilu tsü nani.
8I shou alovi akevilo, O I ghümi;
kughou I no ikiqiveni keno, ni ye ithughive nani;
kughou I no aküzü lo ani keno,
Ampeu no I küvü shi nani.
9I no Ampeu zülo axine shive
kehu Pa no I she petsü eno
I ghenguno xathatsü moke dolo
ni ye Pa xukighide xapu niae.
Pa no aküvü lo I saipeghi nani;
Pa no saphutsü keu shou I no jupuku anani.
10Tileno I ghümi no ithulu nani,
eno khuu no I vilo “Ampeu o Lhou ye khile ania?”
ipi keno li ye akukujo no küzüluve nani;
I nhethi no li shou jupuku nani;
tishino li ye alaghila lo
aniba toi nedaqoda nani.
11Akuptu shiqheni keu tsala!
Tipa tsala lo alughi ye kushuo lo pekhove nani.
12Tipa tsala lo panoqo no Assyria eno Egypt phughiqo
lono nongu lau ighi nani,
Egypt lono wo Aghoki, azüghi lono azüghi kuto,
eno naghuto lono naghuto kuto lono ighi nani.
13Ikemu ayeghi ye tile küxümi
kümla ghenguno pighive nani.
14O küsü pesü Ow timi hejulo,
O mheghi loji khunoqo thilishi
aghasa lo xüani eno aghutu
yeghi mta lo ani keno;
panoqo pelo khaghi lo toi Bashan
eno Gilead lo mzachu pelo.
15Nongu no Egypt yeghi lono ipeghike tsala lo toi,
I no akümzapu thimeqo panongu piye nani.
16Shiyeqo no ithulu no pano kumto jupe kujove nani;
panongu no au pesü pano kichi kujukha luve nani;
panoqo kini ye ipove nani;
17panongu no apighi, ayeghi lo
itikiche jeli toi ayeghimkhu mine nani;
panongu no khokhoshi pano qogheki lono ipeghi nani;
eno akümsa lono Ampeu ni Lhou lau tsüghü
ighi no O sümsauve nani.
Alhouw Iqemokeu Kikimiye
18Amheghi shi ghüluve kemi
kipimi qhitsüno axine juzüve
chekeu Lhou O toike khuu ania?
Pa ye pülhapuju amloide auve chemoe,
kughengu Pa züküvü ye iqemokeu kikimiye lo acheni ke.
19Pa ye itaghi ningu lau küpüqhiyi keu anani;
Pa no ni xine nedave tsü nani.
Nono ni xine kümtsü azüghi
kutho lo vesüve tsü nani.
20Nono khaghi no ni puasü lau
piqhike toi No ye Jacob lau
pükhükulupu eno Abraham lau
iqemokeu kikimiye piye nani.
Currently Selected:
MICAH 7: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
