MICAH 5
5
Bethlehem lono Yepeu Punu nani
1Itehi now ghüshimi hekütsülo, O ghüshimiw ayiliu;#5:1 Momu mishighüna
ningu lenike khasüpe ngovae;
panongu no aqheküsü pesü Israel
xaküthau gilo ghapuku ani.
2Ikemu O Bethlehem Ephrathah, no khuu Judah
lagha gholo aghulou keno,
I ghenguno Israel lo yepeu shiniye akeu lakhi
o launo ighi nani, Pa ighini
keu ye khaghi mulhou tsae.
3Tighenguno apunu küsü lo akeu huno punu moke kutolo
Pa no panongu qhive nani;
Tithiuno pa thiküzümi no
Israelmi lau ideighi nani.
4Pa no Ampeu küka eno Ampeu Pa Lhou je
kükanguagha lono ithughi no Pa mbeloji kheu shi nani.
Panoqo ye sükusho auve nani, kughengu itehi ye ayeghi
shekichi kutolo Pa no akighiche shive nani.
5Eno Pa no panow külakishiu shive nani.
Assyriami no ni yeghi lo ighi no
niw kükakiqo lo nesü kelo,
nino pa shou ambekhemi tsüni
eno kükapumi tache puwuni;
6panoqo no azütakikihi pesü Assyria yeghi eno
Nimrod kulaghi kheluve nani;
eno kughou Pa no ni yeghi lo ighi no ni lughi lo
iloghiveni keno, Pa no Assyriami launo ni xaphe nani.
Ghükulumi Xaphelu nani
7Tishino Jacobw ghükulumi ye
Ampeu tsüzü toi,
atsüni shou tsüghuqhi ketoi,
ashiaye kutomo dolo anani
ti ye timi ghenguno munuve chemo momu timi
nuliqo ngokhe chemoe.
8Eno Jacobw ghükulumi ye shiye eno ashiaye
kutomo gholo anani,
abongshuu lakhino aghasa lo tüghashiqo gholo aketoi,
abongshuu lhothe no ambeloji gholo aketoi,
kughou pa sholuni keno xapheni kemi kühano nedaqhi
eno sütha pinyive cheni.
9O u no o ghümi shou tokulu shi peqhe nani eno
o ghümi kümtsü kütsave nani.
10Tipani, Ampeu no shuphe,
I no nongu launo now khurshi
ngo khurkuluqo kütsave tsü nani;
11No yeghi lo mishighünaqo I no kütsave tsü nani
eno now sükusho-aqo tuleqhive tsü nani;
12I no nongu launo atumu kütsave tsü nani eno nongu
ye asakiqhimi kühave nani;
13nonguw asü-atu julho ngo
atsükuchoqo I no kütsave tsü nani eno nongu ye
nongu u no mlakeu julho lau itsaqimo nani;
14I no nonguw Asherah julhoqo akuhu lono nhüve tsüno
no phughiqo kütsavetsü nani.
15I no amlokighide eno aloghu lono agholumo keu
shiyeqo shou amkhülu nani.
Currently Selected:
MICAH 5: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
