MICAH 3
3
Yepemi ngo Tungkupmi Pipütha
1I no pi: inilo, Jacob lagha lo
sakiphemi eno Israel yepemi!
Nongu ye kuchou xakütha ithi masake kumo?
2Nongu akivi mithi eno küsakügha kimiye chekeqo,
Nongu no Iw timi yiko lhave
tsüno asaghi lono ashi sülavetsü,
3Iw timi phiashi chuve tsüno
pano philono ayiko lhavetsü,
eno aliqu lo ashi süpüa keshi
pano saghi kubopinyipe
ali lo ghekucho süve tsüe.
4Tileno panongu no Ampeu lau qasü ighi nani,
ikemu Pa no khochilemo nani;
tipa ghuloki lo Pa no panongu launo Pa gi küsüve nani,
kughengu panongu no küsakügha kümla shive ke.
5 Ampeu no tungkupmi ghenguno ishi pi,
panoqo no Iw timi sabidevae,
kughou chukepu thime ani keno,
panoqo no “Aloino” ipi igha
ikemu khuu no panoqo kichi lo kiumu sütsü moni keno
pa shou aghükishi sheshue.
6Ikehu kungunhetsü kühano nongu ye zümoive nani,
eno pichho keu kühano nongu lau aküzü ighive nani.
Tungkupmi launo khetsünhe ilove nani, eno panoqo
shou atsala no züchiyive nani;
7tungkupmi ye kujove nani,
eno pichhotsü chekemi ye akukujopu lo süve nani;
Alhou launo khokichile kiumu küha kehu panongu
kümtsü akichi kujukhave nani.
8Ikemu I ghengu ye, Ampeu Ghungu küka eno
kuchou xakütha ngo akumto
no I shepichhipe ani,
ti ye Jacob vilo paw hekibide
eno Israel vilo pa xine piniye ke.
9Hi inilo, nongu Jacob lagha lo sakiphemi
eno Israel lagha lo yepemiqo,
nongu no kuchou xakütha mithi
eno müzüchoi keqo kümtsü tuchighive tsüke,
10aji pesü Zion shiqhe eno
axine pesü Jerusalem shiqhe ke.
11Tile sakiphemi no külügho vecheo xakütha tsü;
achinemi no ame lono shika;
tungkupmi no pisa ghenguno pichho tsü;
ikeghi panoqo no Ampeu mungu bepe no pi,
“Ampeu ye ni gholo anike kumo?
Amhekiqi kiumu ningu shou ikughimo nani.”
12Ikehu nongu ghenguno Zion
ye aluza toi hokideve nani;
Jerusalem ye xine-xigha pekilepu-a shive nani,
eno achineki toghi no aghasü ilhouve nani.
Currently Selected:
MICAH 3: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
