MATTHEW 9

Anhüküsümi Shipivi

(Mk 2:1-12; Lk 5:17-26)

1Jisü no ashuka lo ikuve no azüghi kathasü pa phughi lo ighive. 2Eno julo, timi khami no anhüküsüu aphiau thive kemi lakhi awophe lono xapusü ighi. Kughou Jisü no panoqo küpülü ithulu keno, pa no aküsüu vilo pi, “I nu, o ghüthi püxülu lo; o xine qhive tsüae.” 3Eno julo, Ayezah shikükami khami no panongu ampi pütsa, “Timi hipau ye Alhou thaigha ani.” 4Ikemu Jisü no panoqo kükümsü vethalu akehu pi, “Kushiye nongu mlo lo alhoksa likhi kümsüpu acheni kea? 5‘O xine qhive tsüae,’ pikeu no keo, ‘Ithughi no alachelo’ pikeu khikhiu no mlalei kea? 6Ikemu hi shikeu vecheo nongu pelo Timi Nu ye ayeghi lo axine qhitsüni keu kükagha ani kepi vethalu peniye ke” —tishino pa no aküsüu vilo pi— “Ithulo, eno o züaphi ikhipe aki lo wolo.” 7Eno aküsüu no ithughi no aki lo wove. 8Kughou aqokitikhi no ti ithulu keno, panongu ye ighüve, eno Alhou khuu no hitoike kükagha pesü timiqo tsü keno, panongu no Pa jepipi tsüe.

Jisü no Matthew Kulu

(Mk 2:13-17; Lk 5:27-32)

9Jisü no tileno wuche kelo, timi lakhi Matthew ipikeu apushonha qholo aghikeu ithulu, Jisü no pa vilo pi, “I papelo.” Tileno pa no ithu Jisü pape wuve.

10Kughou Jisü no aki lo alibe chuniye iqa keno, julo, asüqha küqhami kutomo eno aqoaho lo kihisümo keqo no ighi püzü Jisü ngo pa khopemi gholo chuthuve. 11Kughou Phariseemi no hi ithulu keno, panongu no pa khopemi vilo ighiju, “Kushiye nongu kükütsüu ye asüqha küqhami ngo kihisümo kemi gholo chusho cheni kea?” 12Ikemu Jisü no hi chilu no pi, “Aküsümi no kumo aye khunono vithai ani keno shikipiviu avehupu kühae. 13Hi ye kiu kiqi keno wuno shika lulo: ‘Ni ye kimiyekini laju ani thono aghakishi kumoe.’#Hos 6:6 Kughengu I no ighikeu ye amikuchomi kumono axinemi kuni ke ghenguno ke.”

Kümvükeu Vehu

(Mk 2:18-22; Lk 5:33-39)

14Tithiu Baptiz kishiu John khopemi no Jisü lau ighi no ighiju, “Kushiye niqomi ngo Phariseemi ye kümvü cheni püzü o khopemi ye kümvü chemo kea?” 15Jisü no panoqo vilo pi, “Aküküla lo kusü kemi ye külapuu no panongu gholo ngo apülaghi amloksa shini keshea? Ikemu panongu gholono külapuu sawuve kepu tsala ighi nani, tileno panoqo no kümvü nani. 16Khunomu aphi kithe pesü aphimini qalo tsüghu puku chemoe, kughengu aphi kithe no ichi ilo kelo aqau sünhekütsü, eno atsüghu la lono alau ixüve cheni. 17Momu atsaiji kithe pesü ashiyiko hughi aqa lo lesü chemoe. Tishi aye ahughi no mpave no atsaiji peleve niae eno ahughi ghi shipüsave niae. Ikemu atsaiji kithe pesü ahughi kithe lo sücheni, tishikeu lono küma gha kütsü kiyi püalu cheni.”

Anga Püxü eno Totimi Shipivi

(Mk 5:21-43; Lk 8:44-56)

18Jisü no hipa tsa panoqo vilo pi akelo, julo, yepemi lakhi pa lau ighi no pa zülo qhoqhünhe no pi, “I nga ye itehi no thivae, ikemu ighi no o u pesü li shou betsülo, eno li ye xüluve nani.” 19Jisü no ithu püzü pa khopemi gholono timi papesü wu. 20Eno julo, ampe chighikini kutolo aji chiji süache keu totimi lakhi no Jisü hasü ighi no athiuno pa phishe bulu. 21Kughengu li no ishi kümsüe, “I no pa phishe likhimu bulu aye ni ye viluve nani.” 22Jisü no tsüghü ighi no li ithulu kelo ishi pi, “O ghüthi püxülu lo anga, o küpülü no o shipivivae.” Eno tipa mtsa totimi huye viluve. 23Kughou Jisü no yepeu kilo ilo fulili küighami ngo timiqo no yeyeshi mbumghu akeu ithulu keno, 24pa no pi, “Wuvelo, kughengu anga ye züani thono thimphi.” Panoqo no numighei shi pa jukünatha. 25Ikemu kughou timiqo khalau pipeve keno, Jisü no ilo li u lono sünhe puthu, eno li ye vejoi ithughive. 26Ikelo tipaqha kümtsü lo asütsa hipau pikülha wove.

Anhechemi Kini Shipivi

27Jisü no tileno wuche kelo, anhechemi kini no pa pape ighamku pi, “David Nu, Ni lau kimiyekini piye tsülo.” 28Kughou Jisü no aki lo ilove keno, pama ghi iloghi kehu Jisü no pi, “Ni ye hipau shilu nanie pi nokujo ye pülü anima?” Pama no khochile, “Iyei, Ampeu.” 29Tileno pa no hipa tsa pi ghi pama nhethi butsü, “Nokujo küpülü kiqi lono tishi lulo.” 30Eno tileno pama nhethi tsükho luve. Jisü no mtotoi pama ghutu, “Khunomu hipa vehu ithipe kevilo.” 31Ikemu pama no wuve no pa je pesü tipaqha kümtsü pikülhave tsü.

Atsa Pikümlau Shipivi

32Panongu no cheche kelo, julo, timiqo no milakhi tüghaküsa no ghimeqhi no atsa piphe mlave keu Jisü lau saghi. 33Kughou tüghami hapheve tsü keno, timi huno atsa piluve. Ikelo aqokitikhi tile akeqo no akümza qhiyi pi, “Israel lo hitoi keu ye khilemu ithumla aphi.” 34Ikemu Phariseemi no pi, “Pa no tüghami haphe akeu ye tüghami tou küka lono ke.”

Ghile ye Pofu, Ajumi Mikhe

35Jisü no aphughi eno aphu kümtsü lo wuno sinagog lono timiqo kütsü eno kungugha yekipe tsakiviu pesü sheshu no aküsü ghime jeli kümtsü shipivi tsüe. 36Kughou pa no aqokitikhi ithulu keno, panongu ghenguno pa mlo ighiqhiyive, kughengu panongu ye akheu kühakeu mbeloji toi pishipiyi eno akukuphu kühano ae. 37Tileno pa khopemi vilo pa no pi, “Ghile ye pofushi ani, ikemu ajumi no mikhelo ani; 38tighenguno ghile mpeu pelo ajumi ghape paw ghile lo puhutsü penike qhüiniju inikhu lo.”

Currently Selected:

MATTHEW 9: SUMRVBSI

Highlight

Copy