MATTHEW 23

Ahaküsapu Tsüni

1Tile Jisü no aqokitikhi ngo pa khopemi vilo pi, 2“Ayezah shikükami ngo Phariseemi no Moses lakhü lo iqa ani, 3ikehu panongu no nongu vilo kiu kiumu pikeu shilo, ikemu pano no mlaitha chekeu ye shikevilo. Kughengu panongu no kütsü acheni kemu pape chemoe. 4Panongu no puqhe kümla kho kimshi pesü timi xapipe cheni, ikemu panou ye auloti mu chhopuwo ti peqhetsü chemoe. 5Pano kümla kümtsü timi pelo ithulu peniye shicheni. Tigheno akishe lo ashiyiko bohu#23:5 Kuchoyesü Aqau lo hi ye Ampeu zakütsü, Ipe 13:9,16 khapu chekeu ghi panow paje, eno aphimini lo akighikipili#23:5 Highi Ampeu zakütsü, Aki 15:37-41 ghi panow no akushuu shicheni, 6aghulhu lo panongu ye kuküsütou phivilo agigihupu lakhü lo ngonishi eno sinagog lo ghi a-a akiviu pükha cheni. 7Alhikishi-a lo kütami no pano sasü petha shi eno rabbi ipi peni keu no pano lokütüe. 8Ikemu nongu ye shikükau lakhi ani kehu nongu pesü rabbi ipi kelau kumono kümtsü athiküzümi ke. 9Eno ayeghi lo khuu vilomu ‘Apu’ ipi kevilo, kughengu nongu ye kungugha lo akeu Apu lakhi ani. 10Momu ‘Qokipheu’ ipi kupe kevilo, kughengu nongu qokipheu lakhi, Khristo anike. 11Nongu gholo akijeu no nongu qeu shimasae. 12Khunono alikhi ampi süqheni keno kuchunive nani, eno alikhi ampi kuchuni kemi süqhe nani.

13“Ikemu nongu Ayezah shikükami ngo Phariseemi hasapue, keghilishi chekeqo! Nongu no timiqo launo kungugha yekipe hukikha khavetsü, nongu ampi no iloke kumono ilo niye akeqo ghi ilope chemoe. 14Nongu Ayezah shikükami ngo Phariseemi hasapue, keghilishi chekeqo! Nongu no chimemi kilo pükawu cheni, eno akighini kushuo shipe piye cheni. Ikehu nongu ye alau aghime ithulu nani. 15Nongu Ayezah shikükami ngo Phariseemi hasapue, keghilishi chekeqo! Nongu no timi lakhi sawo no chineye lo süniye azüghi eno ayeghi kathasü wucheni, kughou tishi luveni keno nongu no pa pesü ghuthu kini nongu nguno alau aghime shipe cheni.

16“Nongu anhethi iche püzü saphe chekemi hasapue, nongu no picheni, ‘Khuana no achineki jeku ashoqhi shi namu kumu kumoe; ikemu pa no achineki lo ameshoyi jeku ashoqhi shiaye pa shoqhi no pa meluvae.’ 17Nongu anhechemi mbomzümiqo! Khikhiu no akhotou kea, ameshoyi no keo ameshoyi pesü akimthe shitsü keu no kea? 18Itaghi nongu no picheni, ‘Khuana no akümlla-khache jeku ashoqhi shi namu kumu kumoe, ikemu pa no akümlla-khache lo akümllagho jeku ashoqhi shiaye pa shoqhi no pa meluvae.’ 19Nongu anhechemiqo! Khikhiu no akhotou kea, akümllagho no keo akümllagho pesü akimthe shitsü keu akümlla-khache no kea? 20Ikehu khuu no akümlla-khache jeku ashoqhi shini keno, pa ye tipau eno tile akhache lo akeu kümtsü jeku ashoqhi shi ani. 21Eno khuu no achineki jeku ashoqhi shini keno, pa ye tipau eno tile akeu Alhou jeku ashoqhi shi ani. 22Khuu no kungugha jeku ashoqhi shini keno, Alhou kükalakhü eno tipau shou iqa akeu jeku ashoqhi shi ani.

23“Nongu Ayezah shikükami ngo Phariseemi hasapue, keghilishi chekeqo! Nongu no pülakhü, napa eno thüvü yetsüni kutolo chighi saje tsücheni, ikemu Ayezah lo akhotoqo: kuchou xakütha, kimiyekini, eno pükhükulu kughuchove cheni. Kütau ghi kughucho mono nongu ye hipaqo pepimhe kepu shiake. 24Nongu anhethi iche püzü saphe chekeqo, nongu no amiyi ye küpüha püzü sayeshi ye munove cheni!

25“Nongu Ayezah shikükami ngo Phariseemi hasapue, keghilishi chekeqo! Nongu no akhu ajukhu ashou küsüve cheni, ikemu alou ye aghükha ngo süxakulu no chhitoi ani. 26Nongu Phariseemi anhechemi! Akhu ajukhu alou küsüve paghilo, tishianguno ashou ghi mithelu nani.

27“Nongu Ayezah shikükami ngo Phariseemi hasapue, keghilishi chekeqo! Nongu ye akumona metsüghoi mushuve ketoie, ashou ye juviqhiyi ithulu ani, ikemu alou ye kithimi saghi ngo mithekumo no chhitoi ani. 28Tihutoi nongu ghi ashou ye kümtsü lau amikuchomi toi, ikemu nongu lolo ye kühakügha ngo kixikila no chhitoi ani.

29“Nongu Ayezah shikükami ngo Phariseemi hasapue, keghilishi chekeqo! Nongu no tungkupmi kumona mlatsü cheni, eno amikuchomi thigho jukivipu shitsü 30no picheni, ‘Nino ni puasüqo ghuloki lo xüaghi keaye, ningu ye pano gholono tungkupmi pithi moni cheke.’ 31Ikehu nongu ye tungkupmi ghikiqhimi nuli kepi nongu ampi no thopi shi ani. 32Tishiaye no puasüqo no kiu huthu keno shikupuve lo. 33Nongu apighiqo, eno apighitiqo, Ami lo iloni keu ghime lono nongu ye kishi poluni kea? 34Ikehu I no nongu lau tungkupmi, alokütsümi, eno akükütsümi puwu nani, tipaqo khami ye nongu no pithive tsü nani, khami ye kros lono yedave nani, eno khami ye now sinagog lono heqhi no mishiphu atsütsü lo tipaqo hakuqoqhi nani, 35tishikeu lono ayeghi lo amikuchomi ji pele püakeu kümtsü nongu shou ikughi nani, ti ye amikuchou Abel ji lono huthu no wo Barakhiah nu Zechariah, khuu nongu no achineki khala alou ngo akiptia dolono ghiqhive keno, pa kutolo ke. 36Kuchou no I no nongu vilo piani, hi kümtsü hipa tiqhelimi shou aghime ikughi nani.”

Jerusalem Ghenguno Mloqa

(Lk 13:34-35)

37“O Jerusalem, Jerusalem, tungkupmi pithive tsü chekeu eno aghinimi khunoqo puwuni keno atu pesü veqhive tsü chekeu phughi! Awu aza no achishibo qholo atiqo hekütsü no vape ketoi ni ghi ghuthu khijeta o tianuli hekütsü kumqoni shi chekela, ikemu nono pulomoe! 38Julo, o phughi ye küghüvae. 39Kughengu I no nongu vilo piani, nongu no, ‘Ampeu je lono ighikeu Alhou no kümgha tsülo’ ipi moke kutolo nongu ye khilemu ni ithulu kithemae.”

Currently Selected:

MATTHEW 23: SUMRVBSI

Highlight

Copy