MATTHEW 21

Tokulu Hukülü shi Ilo

(Mk 11:1-11; Lk 19:28-40; Jhn 12:12-19)

1Kughou panongu no Jerusalem kupunuve no Olive Toghi lo Bethphage lo ighi keno, Jisü no akhopemi kini puwu no pi, 2“Nokujo zülo aphu akeu lo ilolo, ti to kemtsa nokujo no khurhaqu lakhi tshüpe ati sasü aghikeu ithulu nani. Ti küma kuqho no I lau saghilo. 3Tsala khuana no nokujo vilo kiuala pi aye, ishi pilo, ‘AMPEU no hi avehupu shi ani,’ eno pa no mtazü tsü puwuve nani.” 4Hi ye tungkupu no pi püakeu shikupu niye ke,

5“Zion limi vilo pilo,

‘Julo, o kükau o lau cheni,

ivünhei khurha shouno cheni,

khurhati shouno cheni.’”#Zec 9:9; Isa 62:11

6Akhopemi pama no wu püzü Jisü no mijetsü ketoi shi. 7Pama no khurhaqu ngo ati saghi no panonguw hebephi xape tiküma shou qhatsü, eno Jisü no tile iqave. 8Timi kutomo no alaghi lo panow hebephi qhatsü, eno khami no asüloka miche süwo alaghi lo qhatsü. 9Jisü züu eno pa thiu aqokitikhi chekeqo no ighamku, “David Nu Sheqhelo! Khuu no Ampeu je lono cheni keno Alhou no pa kümgha tsülo!#Lesh 118:25 Kungugha lono Alhou sheqhelo!” 10Kughou Jisü no Jerusalem lo iloghi keno, aphughi lo kümtsü no, “Huye khuu kea?” ipi kügha ipeghive. 11Eno aqokitikhi no khochile, “Hi ye Galilee lo Nazareth lono ighikeu tungkupu Jisü huke.”

Jisü no Achineki Shikimthe

(Mk 11:15-19; Lk 19:45-48; Jhn 2:13-22)

12Jisü no achineki lo ilo no tile küqhükili shi akemi kümtsü hapheve, eno pisa kilitsü akemi kibepu ngo amiqhi je akemi lakhü tukulove tsü. 13Tipaqo vilo pa no pi, “Ishi yepüani, ‘I ki ye akighini ki ipi ku nani,’#Isa 56:7 ikemu nongu no hipau pesü küpkami küghütshü-a shive tsüae.”#Jer 7:11

14Anhechemi eno aphiau kinitave kemi no achineki lo pa lau ighi, eno pa no panoqo shipivi tsüe. 15Jisü no akümzapu kümla shikeu eno itimiqo no achineki lo “David Nu sheqhelo!” ipi ighakeu achinetomi ngo Ayezah shikükami no ithulu kelo, panongu ye shishe axuideve, 16eno panongu no pa vilo pi, “Hipaqo no kiu piani keno no ye chilu anima?” Jisü no panoqo vilo pi, “Iyei; eno nongu ye ishi yepüa keu phimla aphi keshea?

“‘Itimi ngo angakughunuqo kichi lono akiqheu shekiqhe

tsü penike nono kuto tsüe.’”#Lesh 8:2

17Jisü no panoqo qhive kethiu pa ye aphughi lono chesü Bethany lo wuve no tilau ngove.

Jisü no Mububo Müsüini

(Mk 11:12-14,20-24)

18Inaqhe Jisü no aphughi lo ideilo chekelo, pa ye müzüthive. 19Alaghi phivilo mububo ithulu kehu pa no wu kemu tile anipa likhi thono kiumu küha. Ikehu pa no asübo vilo pi, “No ye khilemu athi pithi pemoniu!” Paikhavi mububo no thizümüive.

20Akhopemi no ti ithulupe akichiqhive no pi, “Kishino mububo ye paikhavi no thizümüive kea?” 21Jisü no panoqo khochile, “Kuchou no I no nongu vilo piani, nongu no aküpülü aghi püzü amlo lo lipimo aye, mububo lau kiu shive keno nongu no ti shiluke likhi kumono naghuto hipau vilo, ‘Iqesü azüghi lo ilove lo’ ipi namu tishilu nani. 22Eno nongu no akighini lono kiu kiumu khu kelo, nongu no aküpülü aghi aye ithulu nani.”

Jisü Kükagha Khü

(Mk 11:27-33; Lk 20:1-8)

23Kughou Jisü no achineki lo iloghi no timiqo kütsü akeno, achinetomi ngo layemi no pa lau ighi no pi, “No ye kiu küka lono hipaqo shi ani kea? Khuu no kükagha hipau o tsü kea?” 24Jisü no panoqo khochile. “Ni ghi nongu vilo ighikuju lakhi inijuni, eno nongu no I khochile aye, tileno ni ghi kiu küka pesü hipaqo shicheni keno nongu vilo pini. 25John no baptiz shikeu küka ye khilano ighi kea? Kungugha lono keo, timi launo kea?” Tile panongu dolono küptsa kile thuve, “Ningu no ‘Kungugha lono’ ipi aye pa no ningu vilo, ‘Imaye nongu ye kushiye pa pülümo kea?’ ipini cheni. 26Le ningu no, ‘Timi launo’ ipi aye, ningu ye aqokitikhi msae, kughengu kümtsü no John ye tungkupu lakhie piche ke.” 27Ikehu panongu no Jisü khochile, “Ningu ye mthae.” Pa no panoqo vilo pi, “Imaye ni ghi kiu küka lono hipaqo shicheni keno nongu vilo pimoae.”

Anu Kini Kimghikipiye

28“Nongu ye kiu pini kea? Timi lakhi no anu kini ache. Pa no akichiu vilo pi, ‘Anu, ishi atsailu lo huno mlalo.’ 29Pa no, ‘Ni ye humoe’ ipi khochile, ikemu athiu ye pa kükümsü kilive no huve. 30Apu no ayitiu vilo ghi athoshi pi, eno ayitiu no, ‘Ni ye wuni, akijeu’ ipi khochile kemu humove. 31Hi pama dolo khikhiu no apu pulou shitsü kea?” Panongu no khochile, “Akichiu no,” Jisü no panoqo vilo pi, “Kuchou no I no nongu vilo piani, asüqha küqhami eno kütüqhalimi no nongu züuno Alhou yekipe lo ilolu anie.” 32Kughengu Baptiz kishiu John no nongu lau ighi no amikucho laghi piye kemu nongu no pa pülümoe; ikemu asüqha küqhami eno kütüqhalimi no pa pülüe. Nongu no ti ithuluve kethiu ghi no mlo kili no pa pülü moke.

Atsailu Mishikulumi

(Mk 12:1-12; Lk 20:9-19)

33“Kimghikipiye kütau lakhi inilo. Alu pighimi lakhi no atsailu lakhi chi eno tipau homxa ghi aghutu shino atsaizü kütsüghü tughuko chhu, eno aqoghe mlape qhi; tishino mishikulumi pichive no aghakhu kütau wuve. 34Atsaithi xoluke tusho touve kelo pa no mishikulumi launo pa saje süghi penike pa qemi puwu. 35Mishikulumi no pa qemi lakhi küghape heqhi, lakhi pithivetsü, eno lakhi ye atu pesü veqhive. 36Pa no itaghi atüghü lo nguno alau aqemi puwu, ikemu mishikulumi no azüu paphi shivetsü. 37Ashekha lo panoqo lau pa nu puwu. Pa no pi, ‘Panongu no I nu ye gihutsü nani.’ 38Ikemu kughou mishikulumi no anu ithulu keno, panongu lakhi no lakhi vilo pi, ‘Hi no amheghi kiyighiue. Ighilo, ningu pa pithive no pa mheghi luveni nolo.’ 39Ikehu panongu no pa tsüqü luve eno atsailu lono khalau vephe no pa pithive. 40Tishiaye, kughou atsailu mpeu no ighi keno, pa ye mishikulumi lau kiu shinani kea?” 41Panongu no pa khochile, “Pa no akithi kijiküsa pesü küsaküghami tipaqo tsü nani, eno atsailu pesü mishikulumi khunono axathi xoluke tusho lo asaje achipishi pa tsü nani keno tipaqo pichive nani.”

42Jisü no panoqo vilo pi, “Nongu ye Kuchoyesü lo khilemu phimla aphi keshea?

“‘Aki kishimi no atu kideqhive

keu no atsükupu tuqu shive;

hi ye Ampeu kümlae eno ti ye

ni nhethi lo akichiqhipu.’”#Lesh 118:22; 1Pe 2:7; Apo 4:11

43“Tighenguno I no nongu vilo piani, nongu launo Alhou yekipe pewuve no tipa xathi pithini keu shiaye tsüve nani. 44Khunono atuqu hipau shou ikiqi ikuni keno vetha pinyive nani; eno atuqu no khuana shou iku aye pa ye mukhumuno shive nani.”

45Achinetomi ngo Phariseemi no Jisüw kimghikipiye chilu kelo pa ye pano ghenguno piani kepi panongu no pimhe luve. 46Panongu no pa kügha niye pükapütsa kemu aqokitikhi msa ae, kughengu panoqo no Jisü ye tungkupu kepi kihi ake.

Currently Selected:

MATTHEW 21: SUMRVBSI

Highlight

Copy