MATTHEW 2

Ayepu Kighithimi Xukuju

1Kughou akükau Herod ghuloki lo Judea ghakhu lo Bethlehem lono Jisü punu keno, julo, kipelau no ayepu kighithimi Jerusalem lo ighi, 2eno ighiju, “Jewmi kükau shiniye akeu khuu anileshi punu püani keno, anu hu khile ani kea? Kughengu ningu ye kipelau no pa yepu ipeghi keu ithulu kehu pa mlla nike ighi ani.” 3Kughou akükau Herod no hi chilu keno, Jerusalem aqha no pa gholo küqhano amlosave; 4eno pa no achinetomi ngo Ayezah shikükami kümtsü kukumqo no panoqo vilo Khristo ye khileno punu nanie piche keno ighiju. 5Panongu no pa khochile, “Judea ghakhu Bethlehem lono ke, kughengu ti ye tungkupu vecheo ishi yepüani:

6‘Judah yeghi lo O Bethlehem,

no ye kiu gholau nomu Judah yepemi dolo akimkheu kumoe,

kughengu o launo yepeu ighi nani

pa no Iw timi Israel kheu shinani.’”#Mic 5:1

7Tile akükau Herod no tuqhou shi kipelau kighithimi kusü no ayepu ye kiu tüqhüdo lono ipeghi keno panoqo launo mtsüqhei shiluve. 8Pa no Bethlehem lo panoqo puwu no pi, “Wuno tsaqütsalei shi anu phujulo, eno kughou nongu no pa phuluni keno, ni ghi ighi no pa mlla nike asütsa I tsülo.” 9Panongu no akükau tsa chiluve kethiu, pano la lo wuve; eno julo, kipelau no ayepu khikhi ithulu püa keno, panongu züu cheghive no khilehi anu akeno, vejoi tipa-a shou ngove. 10Kughou panongu no ayepu ithulu keno, panongu ye shishe alokivi kije shive. 11Panongu no aki alou ilo anu gholo paza Mary ithulu, tileno panongu no itsaqi pa mlla. Tishino panongu no agho jeli puche keqo ameshoyi, tsüngqüikeu mukhu, eno müsüghüta ikhiphepe pa chhe. 12Eno panongu ye Herod lau idewo pemoni ke asamou no kütüghüve kehu ala kütau no pano ghakhu lo wove.

Egypt lo Pove

13Kughou panongu no wove keno, julo, Ampeuw kungumi lakhi no asamou no Joseph lau ipeghi no pi, “Ithulo, eno anu ngo paza sasü Egypt lo povelo, eno I no o vilo pimoke kutolo tilau ngo aghilo, kughengu Herod ye anu kütsave nike phuniye ani.” 14Tileno Joseph no ithu anu ngo paza sasü putho lono Egypt lo pove 15eno Herod thive moke kutolo tilau auve. Hi ye Ampeu no tungkupu vecheo kiu pipüa keno shikupu niye ke, “I no Egypt lono I nu kulue.”#Hos 11:1

Herod no Itimiqo Ghiqhi

16Kughou Herod no ayepu kighithimi no pa mqüqhive kepi ithi keno, pa ye ighono axuideve, eno ayepu kighithimi launo pa no ado kihilu keu kiqi lono Bethlehem eno tipa tokukujo kümtsü lo anu kiptimi ampe kini eno tinguno aqhou thaqhü ghiqhi pithi khavepe. 17Tishikeu lono Jeremiah tungkupu vecheo pi püakeu shikupuve:

18“Ramah lo asütsa lakhi chilue,

aküqa eno amloghuju ghügha,

Rachel no li tianuli thikhave kehu

ighaqa ani eno alopiqi tsüni keu ghi milive.”#Jer 31:15

Nazareth lo Ideighi

19Herod thive kethiu julo, Ampeuw kungumi lakhino Egypt lo asamou no Joseph lau ipeghi, 20eno pi, “Ithulo, anu ngo paza sasü Israel yeghi lo wolo, kughengu anu küxü phuche keqo ye thivae.” 21Joseph no ithu anu ngo paza sasü Israel yeghi lo wove. 22Ikemu kughou pa no Herod nu Archelaus no Judea lo papu a-lo ka anipi chilu keno, pa ye tilau wonikeu msave, eno asamou no kütüghü püa kehu tipa qha vechesü Galilee tokukujo lo wuve. 23Pa no Nazareth ipikeu phughi lo xüsüve, tishikeu lono tungkupmi vecheo pa ye Nazarene ipi kunanie pi püakeu shikupuve.

Currently Selected:

MATTHEW 2: SUMRVBSI

Highlight

Copy