LUKE 9

Apostolmi Chighikini Puwu

(Mt 10:5-15; Mk 6:7-13)

1Jisü no chighikini kukumqo no tüghami qhasü luni keu kükagha eno küsükini shipivi luni keu küka pesü panoqo tsü, 2eno Alhou yekipe sheshu eno küsükini shipivi penike panoqo puwu. 3Pa no panoqo vilo pi, “Nongu ghüzüla lo aqheküsü, süqhu, asho, pisa, namu kiumu pemoni eno aphiküzü mu kini pemoni. 4Nongu no khuno kilo ilo namu tipa-a qhimoke kutolo tile ngolo. 5Khile khilemu nongu sasümo keu-a loye kughou nongu no mishiphu tipau qhiveni keno, pano kipimi shikeu michipu shi nongu pukhu lo ayeghimkhu kutolo kukhu qhivelo.” 6Panongu no aphuqo lo atsakiviu sheshu eno shikipivi kümla shisü aqha kümtsü lo wuve.

Herod ye Kübangüve

(Mt 14:1-2; Mk 6:14-29)

7Herod yepeu no Jisü ghili kiu kügha akeno qhoi chilu kelo, pa ye ighono kübangüve, kughengu khami no John ye akithi lono xüputhuvae pi kügha ae. 8Kütami no Elijah ipeghivae pi, itaghi khami no wove keu lo tungkupmi lakhi xüputhuvae piae. 9Herod no pi, “John ye I no akütsü micheve tsüe, ikemu I no pi akeu ye khuu ghili hijeje I no chilu ani keno, hi ye khuu kea?” Ikehu pa no Jisü ithuluni shia.

Jisü no Timi 5,000 Loji

(Mt 14:13-21; Mk 6:30-44)

10Apostolmi no ideighi no mlalu keu qhoi pesü Jisü vilo pi. Pa no pano mqo likhi sasü mishiphu lakhi Bethsaida lo wuve. 11Kughou aqokitikhi no chilu keno panongu no shesü ighive, eno Jisü no alokivishi panongu ikhilu no Alhou yekipe tsa pesü pi, eno shikipivi avehupu shi akemi pa no shipivi tsü. 12Tishi akelo tsüzüuve cheghi kehu akhopemi no pa lau pisü ighi, “Aqokitikhi pelo acheaxü lo aphuqo lomu wuno achuqupu eno aküzü-a phulupe masa ani, kughengu ningu ye yenguyi ke-a lo anie.” 13Ikemu pa no khochile, “Nongu no kiuala chukepu panoqo tsülo.” Panongu no pi, “Ya, ningu ye wuno timi hi kümtsü ghenguno achuqupu qhüsüghi nike kumo aye ningu ye asho pungu eno akha kini nguno alau ye kühae.” 14Tile timi qhethonhe pungu qhalo ae. Pa no akhopemi vilo pi, “Timi lhopungu-ngu no amqo shive tsüno küghüqa khavelo.” 15Panongu no titoi timiqo küghüqa khave. 16Pa no asho pungu eno akha kini ikhipe kungugha lo jupuku no tipaqo shou kükümgha inibe. Tishino pa no asho süphope aqokitikhi kijetsü penike akhopemi tsü. 17Timi kümtsü no chuve no aghapiqive. Tithiu achili eno munomugho kichekütsü kelo, ashoghi chighikini ipeghi.

Peter no Jisü Je Piphe

(Mt 16:13-19; Mk 8:27-29)

18Ghulo lakhi Jisü no lomoshi inikhu akelo, akhopemi no pa lau ighi. Pa no panoqo vilo ighiju, “Aqokitikhi ye ni ye khuue picheni kea?” 19Panongu no khochile, “Baptiz kishiu John; ikemu khami no Elijah; eno kütami no khaghi lo tungkupmi xüthughivae picheni.” 20Pa no itaghi pi, “Imaye nongu ye ni ye khuue picheni kea?” Peter no khochile, “Alhouw Messiah ke.”

Jisü no Pa Kithi Vehu Pi

(Mt 16:20-28; Mk 8:30-9:1)

21Pa no hipa vehu pesü khuu vilomu pipemo nike tsatsai panongu azah tsü, 22“Timi Nu ye aghime kutomo sholu masa nani, eno kichimi, achinetomi ngo Ayezah shikükami no kileqhive no pithive nani, eno atsala aküthüni no xüputhuve nani.”

Kros Xapusü I Papelo

23Pa no timi kümtsü vilo pi, “Khukhumu I papeni shi aye, pa ye pa ampi milive no tsalakipetsü paw kros xapusü I pape masae. 24Kughengu khuu no pa küxü xaluni shi cheni keno pühave nani, ikemu khuu no I je ghenguno pa küxü tsüveni keno xalu nani. 25Kughengu timi lakhi no ayeghiqha kuchopu paw shive namu pa küxü pühave momu aghime shive aye, pa ghenguno kiu ala ani kea? 26Khuu no ni eno I tsa ghenguno kujoveni keno Timi Nu ghi kughou pa juküvü eno Papu ngo kimthe kungumi juküvü lono ighini keno, pa ghenguno kujove nani. 27Ikemu mtsüqheino I no nongu vilo piani, hile puthugho akemi dolo khami ye Alhou yekipe ighi keu pano nhethi no ithulu moke kutolo akithi michemo nani.”

Ajuhi Kikili

(Mt 17:1-8; Mk 9:2-8)

28Jisü kipitsa hipaqo piwo atsala tache thiu pa no Peter eno John ngo James ishi pa gholo sasü atoghi lo inikhuni ke iqho. 29Pa no inikhu akelo, pa gi ye thosü ju kumove no pekilive, eno pa phimini no phuphushi metsüghoi ilhouve. 30Eno julo, timi kini, Moses ngo Elijah no pa gholo küptsa aghi, 31pama no ajuküvü lono ipeghi püzü Jisü no Jerusalem lono pa kümla kupuve kethiu ajuküvü lo idewo niye akeu vehu küptsa ae. 32Peter ngo pa qomi ye ingufufui akemu kughou panongu no atsüveshe ithughi keno, pa juküvü eno timi kini pa gholo akeu ithulu. 33Pama no Jisü launo wuve chekelo Peter no Jisü vilo pi, “Ampeu, ningu no hile aghi keu ye alovae. Ningu apusho küthü tshüni nolo, lakhi no o sala, eno Moses ngo Elijah ghenguno lakhikhi,” pa ye kiu pi akeno ithimoe. 34Pa no hipa tsa pi aphi lono khüngküsü phoipeghi no panoqo küzüpho luve, eno panongu ye tipa dolo ilove kelaye msauve. 35Tileno asütsa lakhi khüngküsü lono ipeghi, “Hi ye Iw kishekipheu, I Nue; Pa tsa inilo!” 36Atsa tipau pive kethiu Jisü ye pa likhi aghive. Tipa ghuloki lo panongu no kiu ithulu püa keno timi khuu vilomu pimono inaqhoive.

Tüghaküsa Akeu Itimi Shipivi

(Mt 17:14-18; Mk 9:14-27)

37Tishiwo thoghiu kughou panongu no atoghi lono iqighi keno, aqokitikhi kije no pa sasü kusho. 38Aqo gholo milakhi no igha pi, “Shikükau, I no o qhüiniju ani, I nu jutsülo, kughengu pa ye thilimie. 39Aghawu no pa tsüqü luve no züleno igha ipeghi cheni. Tino anu sükuchoqhi thuve aye pa kichi lono mlaghubeive cheni, tino kitilamu anu qhivemo no süqo thapinyi ghime cheni. 40Ikehu I no o khopemi vilo hapheve tsülopi kemu panongu ye shimlave.” 41Jisü no khochile, “O aküpülü küküha eno chighichilai keu tiqhelimi, ni ye khitohi nongu gholo anani eno khea lopi kea? O nu hilau saghi lo.” 42Apu no sasü cheke lono tüghami no anu ayeghi lo veqhi püzü sükuchoqhi. Ikemu Jisü no mithekumo ghawu sakiyi no anu hu shipivi tsü, eno papu lau puwuve. 43Timi kümtsü no Alhou kükanguagha ithulupe akichiqhi khave.

Jisü no Pa Kithi Vehu Pikithe

(Mt 17:22-23; Mk 9:30-32)

Ikemu panongu kümtsü no pa no mlakeu ithulupe akümza ake lono pa no pa khopemi vilo pi, 44“Nongu kini lo atsa hipaqo ilolu pelo: Timi Nu ye küghape timiqo u lo süve tsüniye shivae.” 45Ikemu panongu ye hipa tsa vethamlave, ikehu pimhelu pemove niye panoqo launo küsüve. Panongu ye pa vilo ighijuni keu ghi msave.

Khuu no Akijeu Kea?

(Mt 18:1-5; Mk 9:33-37)

46Akhopemi dolo khuu no akijeu kea pikeu lono kütsala ipeghive. 47Ikemu Jisü no panongu mlo lo kümsüpu akeu ithi akehu itimi lakhi sawo pa phivilo qhi, 48eno panongu vilo pi, “Khukhumu I je lono itimi hitoi kemi ikhilu keu ye ni ikhilu ani, eno ni ikhilu keu ye khuu I puwu keno, Pa ikhilu ani. Kughengu nongu gholo khuu no aghulou keno, pa no akijeue.”

Ni Külamo Kemi ye Ni Ngulami

(Mk 9:38-40)

49John no khochile, “Ampeu, milakhi no o je lono tüghami haphe aghi keu nino ithulue, eno pa ye ni gholo kichemi kumo kehu ningu no pa lakha niye shie.” 50Ikemu Jisü no pa vilo pi, “Pa lakha kevilo, kughengu khuu no nongu külamo keno pa ye no ngulami ke.”

Samariami Phu lo Jisü Milive

51Kughou Jisü saikuve kepu tsala kupunuve keno, pa ye Jerusalem lo wunike thebeive. 52Pa no azüuno aghinimi puwu, eno panongu no Samariami phuqo lo pa ghenguno kuto tsünike ilo. 53Ikemu pa no thebei Jerusalem küdau wu cheghive kehu timiqo no pa sasü move. 54Kughou pa khopemi James ngo John no ti ithi keno, pama no pi, “Ampeu, panoqo piti kepu mi nino atsütsü lono ghuqhi tsülopi khunike no ye pulo anima?” 55Ikemu pa no tsüghüwo panoqo lomipi. 56Eno panongu no aphu kütau lo wuve.

Jisü Papeni keu Me

(Mt 8:19-22)

57Panongu no ala lo chekelo, milakhi no pa vilo pi, “Nono khile khile wumu I no o papeni.” 58Jisü no pa vilo pi, “Aghalo tsüqo no atuki ani, eno aghauqo no apüsü ani, ikemu Timi Nu ye khilehi mu pa kütsü mkhü kepu kühae.” 59Pa no lakhiu vilo pi, “I papelo.” Ikemu pa no, “Ampeu, I pelo atüghüshi wuno I pu jupithilu pelo,” ipive. 60Jisü no pa vilo pi, “Kithimi no panow kithimi juqho apelo. Ikemu nou ye wuno Alhou yekipe sheshu lo.” 61Itaghi milakhi no pi, “Ampeu, ni ye o papeni, ikemu atüghüshi I pelo I kibolomi lau akikini tsa pive pelo.” 62Jisü no pa vilo pi, “Khuu no au lo akuphu tsüqüpe apülaghi athiu juni keno Alhou yekipe lo ilo küzüpu kumoe.”

Currently Selected:

LUKE 9: SUMRVBSI

Highlight

Copy