LUKE 21

Chimemi Kümllagho

(Mt 12:41-44)

1Ghuthu lakhi Jisü no tsüghüwo jukelo kinimi no pano kümllagho pewo akümllagho bohu lo sükeu ithilu, 2pa no kumlhomi achimeu lakhi no ghükayi aghulou kini sükeu ghi ithulue. 3Pa no pi, “Kuchou no I no nongu vilo piani, kumlhomi achimeu hipau no kütami kümtsü nguno alau süvae. 4Kughengu panongu kümtsü pütüta no pofushi akeu kiqi lono qhasüe, ikemu liu ye li thokha kumkholu kepu akeu hu qhoi süve tsüe.”

Achineki Kütsaveni keu

(Mt 24:1-2; Mk 13:1-2)

5Timi khami no achineki jupe kishi akughupu tu eno akümllagho pesü akighiche shi mlapüa keno kügha ae, 6Jisü no pi, “Nongu no itehi hile kiu ithulu ani keno atu lakhimu lakhi shou küqape ngomoni keu tsala ighi nani.” 7Panongu no ighiju, “Shikükau, maye kughou no hipaqo shi nani, eno hipaqo shi kelo kiu michipu anani kea?” 8Pa no khochile, “Nongu saküghüzüve pemoni ke jukutolo. Kughengu kutomo no I je lono ighi no pi nani, ‘Ni ye Pa ke!’ eno, ‘Ado huye ighivae!’ Panongu papewu kevilo. 9Kughou nongu no aghükishi eno mishi no yepeka hebide keu sütsa chiluni keno msaichi kevilo, kughengu hipaqo paghi shimasa nani, ikemu ashekha ghuloki ye tipamtsa ighimo nani.”

Aghükishi eno Kijipüsa

10Pa no panongu vilo pi, “Shiye lakhi no lakhi sasü aghü shiuve nani, eno kükaqha lakhi no lakhi le nani. 11Ayeghi küghütha kije ighi nani, a-a kutomo lo püqümiye ngo püsa jeli ighi nani, eno shithüghüi keu sütsa ngo amchipu kije atsütsü lono ipeghi nani. 12Ikemu hi kümtsü züuno nongu küghape kijipüsa nani, sinagog yepemi u lo süve no akughuki lo süve nani, eno I je ghenguno nongu sasü kükami ngo angh zülo wu nani. 13Tino nongu ghenguno thopi shini keu dokivi shi nani. 14Tighenguno nongu ye azünatha ghi kishi khochile nani kelapi kümsütho pemoni ke itehi no ithilo. 15Kughengu nongu külami khunomu nongu theqhive momu lachile mla kepushi I no atsa eno alokütsü pesü nongu tsü nani. 16Nongu puaza, athiküzü cheli, abolomi, eno aküsamiu ghi nongu küghape kütami u lo süvetsü nani, eno nongu gholo khami ye panoqo no pithive nani. 17I je ghenguno timi kümtsü no nongu mithi nani. 18Ikemu nongu kütsü lo asa lothi lakhimu pühave monani. 19Nongu no kutuu puqhelu keu lono nongu ye aküxü achili shilu nani.

Jerusalem Kütsaveni keu

(Mt 24:15-21; Mk 13:14-19)

20“Kughou ghüshimi no Jerusalem boluve keu nongu no ithuluni keno, ti kütsaveni keu ye ighivae pi ithive lo. 21Ikehu Judea lo akemi ye naghuto lo kuhave masae, aphughi alou akemi ye chevelo, eno khunono acheaxü lo aphuqo lo aghini keno, aphughi lo ilo kevilo, 22kughengu yepüa keu kümtsü shikupu keu shi hi ye amkhükulu ghuloki ake. 23Tipa ghuloki lo mishipu akemi eno anga kughunu sa akemi ghenguno ahasapue! Kughengu aveküsapu kije ayeghi lo ighi nani eno timi hipaqo shou aloghu ikughi nani. 24Panongu ye ghüyi lono wove nani, panongu küghape akughumi shisü shiye gholo wuve nani, eno Jewkumomi do-ghuloki tomoke kutolo panongu no Jerusalem nedaqoda nani.

Timi Nu Ikighi

(Mt 24:29-31; Mk 13:14-27)

25“Tishino amchipu kutomo khetsünhe, aqhi, eno ayepuqo lo ipeghi nani, eno ayeghi lo azümülhü tukide igha ipeghi no ayeghi lo shiye kümtsü veküsapu shi kütakihi nani. 26Timiqo no ayeghi lo kiu chea keno kümsü juno akümsa lono ikiqi thiuve nani. Kughengu atsütsü qholo aküka jeli akeqo süküghütha nani. 27Tileno Timi Nu no aküka eno ajuküvü kuloghi shi khüngküsü lono ighi keu timiqo no ithulu nani. 28Kughou no hipaqo shithuni keno, nongu ye puthugho no akütsü peqhelo, kughengu nongu qhüchile luni keu ye cheae.”

Mububo launo Shikalu lo

(Mt 24:32-35; Mk 13:28-31)

29Jisü no kimghikipiye lakhi panongu vilo pi, “Mububo eno asübo kümtsü kiqiju lo. 30Tipaqo nipa no mini ipeghiuve aye, nongu no mütsü tusho ye cheae pi ithive cheni. 31Titoi kughou nongu no thime hipaqo huthuuve keu ithuluni keno, Alhou yekipe ye cheae pi ithive lo. 32Mtsüqheino I no nongu vilo piani, hipa tiqhelimi kühave mphi lono thime kümtsü shikupu nani. 33Atsütsü eno ayeghi ye hauve nani, ikemu I tsa ye hauvemo nani.

Nongu Jukutolo

34“Ikemu nongu ampi jukuto lo, tikumo aye ashi ghakiqipu, chumzü shomzü, eno ayeghi xülo kütakihi keu no nongu mlo qaqhipe ake lono tipa tsala hu züleno alichhe toi nongu lau ighi nosake. 35Kughengu ti ye ayeghi lo küxümi kümtsü shou ighi nani. 36Ikemu kiu shiniye ani keno tipaqo lono pokalu, eno Timi Nu zülo puthugholu kepu küka apenike nongu ye atüqhüdo kümtsü lo inikhu eno tsükhüi alo.”

37Jisü no tsalakipe achineki lono shika apüzü putho loye ipe Olive toghi lo akulhoqhive ae. 38Tishino inaqhe shive aye, timi kümtsü no achineki lo pa kipitsa ini nike ighie.

Currently Selected:

LUKE 21: SUMRVBSI

Highlight

Copy