LUKE 19

Jisü ngo Zacchaeus

1Jisü no Jericho lo iloghi no ti hechesü wuche. 2Tile timi lakhi Zacchaeus acheke pa ye zame küqhami shou atou eno kinimi lakhi. 3Pa no Jisü ye khuu keno juniye pükapütsa aqokitikhi gholo che kemu pa no shiti kehu ithumlave. 4Ikehu pa no Jisü juniye azüu powu no tüküthibo lakhi lo ikuve, kughengu Jisü ye tipa la heche wuniye ake. 5Kughou Jisü no tile ighi keno pa no pishipuku juno Zacchaeus vilo pi, “Zacchaeus, mtazü iqighi lo, kughengu ni ye ishi o kilo ngo masa ani.” 6Pa no mtazü iqighi no alokivi shi Jisü ikhilu. 7Kughou timiqo no ti ithulu keno, kümtsü no nhenheshi pi, “Pa ye axinemi kilo ngoniye ilovae.” 8Zacchaeus no müzüchoi ngove no Ampeu vilo pi, “Julo, Ampeu, I no akeu küakini tüxa ye kumlhomi tsüve niae. Eno I no kiuala pesü khuana pishiqhi püaghi aye, ghuthu bidi no küghüsüpe athoputho tsüni.” 9Jisü no pa vilo pi, “Ishi no xakulupu akibo hipau lo ighivae, kughengu pa ghi Abraham laghami ke. 10Kughengu Timi Nu ye pühave no akemi phuni ke eno xaluni ke ighie.”

Alhou Yekipe Pekukho Kümla

(Mt 25:14-30)

11Timiqo no Jisü tsa hipaqo ini ake lono pa no kimghikipiye lakhi pikibe, kughengu Pa ye Jerusalem kupunu chea eno panongu no Alhou yekipe ye ke-i ighive niye ani küghashi kümsü ake. 12Ikehu pa no pi, “Ghenimi lakhi no aghacheu aghakhu lakhi lo wuno pa sala kükaqha ighilu no ideighini keu shi. 13Pa no pa qemi chighi kuno Mina#19:13 Aqekiqemi ghenguno Mina lakhi ye aqhi 3 jume. lakhikhi pesü kije tsüno panongu vilo pi, ‘I no ighi moke dolo hi pesü kimje aghilo.’ 14Ikemu pa ghakhumi no pa mithi chekehu aghinimi khami pa thiu no puwu no atsape ishi tsü, ‘Ningu ye timi hipau pelo ni shou ayepe penishi amoe.’ 15Ikemu kughou pa no kükaqha ighipe ideighive keno, pa no aqemi khunoqo lau pisa tsüpüa keno, panongu ye kiu lo imasü no khije kimjelu keno ithini ke panoqo kusaghi peni keu za tsü. 16Atüghüu no pa zülo ighi no pi, ‘Akijeu, ow Mina lakhi huno Mina chighi kimjelue.’ 17Pa no khochile, ‘Aghile shivae, aqeu kivi! No ye aghulo lo ghi pükhükulupu shike itehi ye nono aphughi chighi shou aküka peithani.’ 18Akiniu no ighi no pi, ‘Akijeu, ow Mina lakhi huno pungu kimjelue.’ 19Pa no khochile, ‘Nono aphughi pungu shou peithani.’ 20Lakhiu no ighi no pi, ‘Akijeu, ow Mina lakhi khikhi I no aphi kümtsha no ghope qhivetsü keno hi chenie; 21kughengu no ye tsatsai kemi kehu ni ye o msave. No ye imasümo mu ithuluve cheni eno xusümo mu xoluve cheni.’ 22Pa no khochile, ‘O likhi o tsa pesü I no akipimi o tsünia na, no kixikila qeu! Ni ye tsatsai kemi, imasümo no ithulu eno xusümo no xolu chenie pi nono ithi ani ya? 23Imaye kushiye I no ideighi kelo aqu gholo akighishe ghi qhakütsülu kepushi no ye Iw pisa pesü ghükaki lo sütsümo kea?’ 24Yepeu huno tile puthugho akeqo vilo pi, ‘Pa launo Mina lakhi luve no Mina chighi akeu tsüve lo.’ 25Panongu no khochile, ‘Akijeu, pa ye chighi auva keghi!’ 26‘I no nongu vilo pi anike khukhumu aghi keu lau alau küphatsü nani, ikemu khuu no küha keno, pa no kiu aghulo aghini keno tiu ghi luve tsü nani. 27Eno I ghümi ghengu ye, khunono I pelo pano yepeu shipenishi mono akeno, hile saghi no I zülono ghiqhivelo.’”

Tokulu Hukülü shi Ilo

(Mt 21:1-11; Mk 11:1-11; Jhn 12:12-19)

28Kughou Jisü no atsa hipaqo pive keno, pa ye Jerusalem küdau wuve. 29Eno Olive toghi ipikeu bophi lo Bethphage eno Bethany kupunu ighi kelo, pa no akhopemi kini puwu, 30eno pi, “Nokujo züu aphu akeu lo ilolo, eno tile khurha lhothe lakhi khipa shou khunomu iqamphi keno, tshü püaghi nanike ti kuqhope hile saghilo. 31Khuana no nokujo vilo, ‘Kushiye ti kuqho ani kea?’ ipi ighiju aye, ishi khochile lo, ‘Ampeu no hi avehupu shi ani.’” 32Pama no tile ighi kelo Jisü no pike toi ithulu. 33Pama no ti kuqho akelo ampemi no ighiju, “Kushiye nokujo ye ti kuqho ani kea?” 34Pama no khochile, “Ampeu no hi avehupu shi ani.” 35Tishino pama no Jisü lau saghi, eno panongu no pütütaw hebephi pesü khurha shou qhatsü no Jisü küghüqa. 36Pa no tipa shou iqasü chekelo timiqo no alaghi lo panow hebephi qhatsü. 37Pa no Olive toghi lono iqighi keu la touve kelo aqokitikhi pa papeche kemi kümtsü no asütsa kuloghi shi igha eno panongu no akümzapu kümla kümtsü ithulu ke ghenguno alovi Alhou sheqhe thuve, 38“Ampeu je lono akükau khuu cheni keno Alhou no kümgha tsülo! Kungugha lo iqüghai eno kungugha kiqhe lo ajekipi shilo!” 39Aqokitikhi gholo Phariseemi khami che keqo no pa vilo pi, “Shikükau, o papemi lomipi lo.” 40Ikemu pa no khochile, “I no piani, hipaqo no inaqhoive aye, atuqou no ighamku ipeghi niae.”

Jerusalem Ghenguno Mloqa

41Kughou Jisü no kupunu ighi no Jerusalem ithulu keno, pa no tipa ghenguno mloqa 42ghi pi, “Noghi lae, kiu no külashilu cheni keno ishi nomu nou no ithike aye lae! Ikemu itehi ye o launo küsüvae. 43Kughengu o ghümi no o bothape aliwo shive no o khasüpe no ako kümtsü lono le iloghini keu tsala ighi nani. 44Panongu no no eno o gholo atianuli kümtsü kütsave tsü nani, eno nono o xukuju ghuloki ithi move kehu o phughi lo atu lakhino lakhi shou küqape qhitsümo nani.”

Jisü no Achineki Shikimthe

(Mt 21:12-17; Mk 11:15-19; Jhn 2:13-22)

45Tithiu Jisü no achineki lo ilo no kimje akeqo haphe thuve, 46eno panongu vilo pi, “Ishi yepüani, ‘I ki ye akighini ki ipi kunani,’ ikemu nongu no ti pesü küpkami küghütshü-a shive tsüae.”#Isa 56:7

47Jisü no tsalakipe achineki lono shika ae. Achinetomi ngo Ayezah shikükami eno ampemi no pa pithive nike kuchughua, 48ikemu aqokitikhi no pa tsa phemono ini kimighe akehu panongu ye kiumu shimla no ae.

Currently Selected:

LUKE 19: SUMRVBSI

Highlight

Copy