JOEL 1
1
1 Ampeu tsa Pethuel nu Joel lau ighi:
Tülhaquqo no Ghale Ighi
2Hi inilo, nongu layemiqo;
akini xükholo, küxümi kümtsü!
Nongu momu no puasüqo ghuloki
lo hitoi keu shipüani kema?
3No tianuliqo vilo hipau pilo,
eno no tianuliqo no pano tianuliqo vilo pipelo,
eno pano tianuliqo no pashelo tiqhelimi vilo pipelo.
4Amthsü no chukhakumo qhive
keu tülhaqu loji no chuvae.
Tülhaqu loji no chukhakumo
qhive keu tütüghü no chuvae
eno tütüghü no chukhakumo
qhive keu ningami no chuvae.
5Ithu qalo, nongu shokümzümi,
igha qalo nongu aji kushomi,
kughengu nongu kichi lono atsaiji
kungo ikhi süwuve tsüae.
6Kughengu shiye kumto lakhi
eno kihikümla no I yeghi leniye ighivae
paw ahu ye abongshuu hu, eno
abongshuu aqu hu kütsüghae.
7Tipau no I tsaibo kütsave tsüno
Iw mububo hechheve tsüae;
tipaqo kola lhave no peve tsüae;
alokaqo pesü metsüghoive tsüae.
8Ililhothe lakhi no liw külapuu
ghenguno yeqhiyephi pusü mloqa keshi mlolo.
9Athi eno atsaizü kümllagho ye
Ampeu ki lono süwuvae.
Ampeu chinemi eno
hukuthumi no mloqa anie.
10Aluzaqo ye kütsavae,
ayeghi no mloqa ani,
kughengu athi ye kütsa khavae,
atsaiji no qhaivae,
thazü no hailovae.
11O alukichimiqo, kujoqhiyi lo;
O atsailu kichimiqo, ashothi
eno barleythi ghenguno mloqa lo,
kughengu alu lo ghile ye hauvae.
12Atsaibo no qhaivae;
mububo no kimghoivae.
Khaghatu, amsa, eno apple süboqo,
aluza lo asübo kümtsü qhaivae,
eno timi nuliqo launo
alokivi ye qhoi chekhavae.
Xaide penike Ku
13Yeqhiyephi pepu no mlolo, O achinemiqo;
igha qalo, O akiptia lo hukuthumiqo.
Ilolo, puthotsü yeqhiyephi u lo,
O I Lhou qemiqo!
Kughengu athi eno atsaizü kümllagho ye nongu Lhou
ki lono süchile luvae.
14Kümvü kepu do kophelo;
akimchi hoho kusülo.
Layemi eno aghakhu lo küxümi
kümtsü Ampeu nongu Lhou
kilo hekütsüpe Pa lau ighamku lo.
15Tipa tsala ghenguno ahae!
Kughengu Ampeu tsala ye kupunuvae, ti ye
Akughushuu launo kütsakungo ighi ketoi nani.
16Ningu nhethe lono achuqupu
süwuve, eno Ampeu ki lono
alokivi ngo amloqi qhiyi keu
ikhipe wuve tsüake kumo?
17Apiti no ayeghi lono qhaivae;
pekükütsü ki no yenguyi;
eno abi-aleqo no ixapinyivae
kughengu athi kühave ake.
18Tüghashiqo no kishi aküsü ghügha shi ani kelae!
Amishi loji no avehu izüvae
kughengu panoqo ghenguno achu kümza-a kühavae;
ambe lojiqou ghi ime auvae.
19O Ampeu, I no O ku anie.
Kughengu ami no yenguyike-a lo
achu kümza-a pitive tsüae,
eno ami mili no aluza lo
asübo kümtsü pitileve tsüae.
20Aluza lo tüghashiqo ghi O khekulho shi ani kughengu
aghokitiqo lo azü hailovae,
eno ami no yenguyike-a lo
achu kümza-aqo pitive tsüa ke.
Currently Selected:
JOEL 1: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
