JOHN 7
7
Apusho lo Ghulhu
1Hipa thiu Jisü ye Galilee qha kümtsü itsü wuve. Pa ye Judea lo wumoe kughengu Jewmi no pa pithiveni ye phu ake. 2Jewmiw Apusho lo Ghulhu kupunuve, 3ikehu pa thiküzümi no pa vilo pi, “Hipa-a qhive no Judea lo wuvelo, tishianguno o papemi ghi nono akümla shi akeqo ithulu penie. 4Kughengu kütami no ithi penishi aye khunomu küsüu no mla chemoe. Nono hipaqo shiani aye, ayeghiqha lau no ampi piyelo.” 5Kughengu pa thiküzümi ghi pa pülübe moke. 6Jisü no panoqo vilo pi, “I do ye ighi mphie, ikemu nongu do ye alhokuthu acheni. 7Ayeghilomi ye nongu mithi mlae, ikemu I mithi ani kughengu I no pano kümla lhoksa ghili pitsüke. 8Nongu ye aghulhu lo wulo. Ni ye hipa ghulhu lo wumoe, kughengu I do ye ighikha mphie.” 9Hi pive kethiu pa ye Galilee lo ngove.
10Ikemu pa thiküzümi no aghulhu lo süniye iqhove kethiu no Jisü ghi pekiphe shimo no küsüuno iqhove. 11Aghulhu lo Jewmi no pa phuju no piae, “Pa khile ani kea?” 12Timiqo gholo pa ghili chhuchhushi kügha ae. Khami no, “Pa ye timi kivimie,” ipi aye kütami no, “Moe, pa ye timi saküghüzü ani,” ipiae. 13Ikemu Jewmi msa kelauno khumu pekiphe shi pa ghili küptsamoe.
14Aghulhu ghuloki tüxa wove kethiu Jisü no achineki lo wuno kütsü thuve. 15Ikehu Jewmi ye akichiqhive no pi, “Timi hipau ye phi-yemo keghi kishino akighithi ani kea?” 16Jisü no khochile, “I no shika akeu ye Iw kumoe, ikemu khuu I puwu keno Paw ke. 17Khunono Alhou pulou shinishi cheni keno, pa no shiküka hi ye Alhou launo keo I kükagha lono piani keno ithi nani. 18Khuu no pa kükagha lono pini keno pa jekipipu phucheni. Ikemu khuu no pa puwu keu jekipipu phuni keno, pa no kuchou eno pa lau ye kichile kühae. 19Moses no Ayezah nongu tsüke kumo? Ikeghi nongu khumu Ayezah pemlae. Nongu ye kushiye I pithiveni ke phu ani kea?” 20Aqokitikhi no khochile, “No ye tüghami o lolo ani! Khuu no o pithiveni ye phucheni kea?” 21Jisü no khochile, “I no akümla lakhi shikelo nongu kümtsü no ithulupe akichiqhie. 22Moses no nongu vilo aphighüyiko ghavelo pie (ti ye Moses launo ighike kumoe ikemu nongu puasü launo ke), tighenguno nongu no Sabbath lono anu phighü yiko gha cheni. 23Moses Yezah hebide moniye Sabbath lono anu phighü yiko gha cheni aye, kushiye Sabbath lono I no timi shipivike ghenguno nongu ye I shou amloide ani kea? 24Agi juno küghatha kevilo, ikemu achipiu küghakütha pesü küghatha lo.”
Hi no Khristo Keo?
25Tighenguno Jerusalem lo khami no pi, “Panongu no pithiveni ye phuchekeu timi huye hike kumo keshea? 26Pa julo, aqha zülono atsa pi akeghi panongu ye kiumu pa vilo piamoe! Khileala sakiphemiqo ye pa ye Khristo kepi kuchou no ithive akeo lae? 27Kughou Khristo ighini keno khunomu pa ye khilano ighi keno mtha nani, ikemu timi hipau ye khilano ighi keno ningu no ithi anie.” 28Ikehu Jisü no achineki lo shika akelono asheshu, “Nongu ye ni ithi ani eno I no khilano ighi keno ithi ani. Ikemu ni ye I gho-apulou lono ighi anike kumoe. Khuu no I puwu keno Pa ye kuchou eno nongu ye Pa mthae. 29Ni ye Pa ithi ani, kughengu ni ye Pa launo ighi, eno Pa no I puwuke.” 30Ikehu panongu no pa kügha luve niye shi, ikemu khunomu pa shou au bemlae, kughengu pa do ye tomono ake. 31Tishimu timi kutomo no pa pülü luve no pi, “Kughou Khristo ighini keno pa ye timi hipau no amchipu kümla shi akeu nguno alau shinani kema?”
Jisü Kügha penike Puwu
32Phariseemi no aqokitikhi gholo Jisü ghili kügha akeu chilu, eno achinetomi ngo Phariseemi no pa kügha penike aghukhemi puwu. 33Tile Jisü no pi, “Ni ye nongu gholo ado kitila aghi no tithiu no I puwu keu lau wuve nani. 34Nongu no I phuju nani kemu phumla nani, kughengu nongu ye I no khile anani keno ighimla nani.” 35Jewmi no panongu dolono pi, “Timi hipau ye khila wuniye anipi ningu ye pa phumla nanie piani kea? Pa ye Greekmi phughiqo lo Jewmi hapiyepighive keqo lau wuno Greekmi kütsüni ye ani keo? 36Pa no, ‘Nongu no I phuju nani kemu phumla nani’ eno ‘Nongu ye I no khile anani keno ighimla nani’ ipikeu kiqi ye kiu kea?”
Aküxüpu Zü Ghoki
37Aghulhu tsala ashekhau, kümtsü nguno akhotou tsala lo Jisü no puthugho no ighamku pi, “Khukhumu tüghüthi aghi aye, I lau ighi no yelulo. 38Khunono I pülüni keno, Kuchoyesü no pike toi, ‘Pa mlo lono aküxüpu zü qoipeghi nani.’” 39Pa no hi pikeu ye pa pülü kemi no Aghungu ithuluni ye akeu ghili piae, kughengu ti kutolo Jisü pesü ajuküvüpu shitsü mphi kehu Aghungu tsümono ake.
Timiqo dolo Kijetha
40Panongu no atsa hipaqo chilu kelo khami no pi, “Kuchou no timi hipau no Tungkupue.” 41Kütami no pi, “Hi no Khristoe.” Ikemu khami no pi, “Khristo ye Galilee lono ighini ye akeshea? 42Khristo ye David lagha lono ighi nani eno David no achekeu phu Bethlehem lono ighi nanie pi Kuchoyesü lo pi püamo keshea?” 43Ikehu pa ghenguno timiqo dolo amqo kijetha ipeghive. 44Panongu khami ye pa kügha luveni shiae, ikemu timi khumu pa shou au bemoe.
45Aghukhemi no achinetomi ngo Phariseemi lau ighi, ikelo panoqo vilo iniju, “Nongu ye kushiye pa saghimo kea?” 46Aghukhemi no khochile, “Khunomu pa toi atsa kivi piju mphie!” 47Phariseemi no panongu khochile, “Nongu ghi pishiqhive ape keo? 48Sakiphemi ngo Phariseemi lakhi nomu pa pülüve akeshea? 49Ikemu hi aqokitikhi Ayezah mtha keqo ye müsüinivae.” 50Tile panongu gholo lakhi, Nicodemus khuu azüu Jisü lau wukeno, pa no panoqo vilo pi, 51“Ni yezah loye atüghüshi timi lakhi launo chilu eno pa no mlakeu phuju mphi lono pa shou küghatha cheni keshea?” 52Panongu no khochile, “No ghi Galileemi keshea? Tungkupu khumu Galilee lono ipeghi püamo ke tsaqüi phujulo.”
Küsalhalimi Küghalu
53Panongu kümtsü pütüta kilo wove,
Currently Selected:
JOHN 7: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
