JOHN 5

Sabbath Tsalani no Shipivi

1Hipa thiu Jewmi Ghulhu lakhi lo Jisü no Jerusalem lo iqho.

2Jerusalem lo Ambe Khagho phivilo ayizü lakhi, Aramaic tsauno Bethesda ipikeu ache eno tipau ye Apusho pungu ajoshi ache. 3Hile alho vimo kemi kutomo ae—anhethi kighichemi, apukhu kinita kemi, anhü kithimi. 4Kughengu ado adolo kungumi no ayizükucho lo iqi azü xukutho tsüche: azü xukuthove kethiu khukhumu atüghüshi ilolu keu ye pa no kiukiu küsü aghimu viluve che. 5Tile ampe shighi tache süve kemi lakhi ae. 6Kughou Jisü no timi tipau no tile ihozü akeu ithulu eno pa ye ado kushuo tile auvae pi ithi keno, pa no pa vilo pi, “No ye viluveni shi anima?” 7Aküsüu no pa khochile, “Akijeu, kughou azü xukuthoni keno, ni ye I sawo azü lo süni kemi khumu kühae, eno I no ilo niye chephi lono kütami no I züuno ilove cheni.” 8Jisü no pa vilo pi, “Ithulo, o züaphi ikhiqhe luvelo, eno alache lo.” 9Paikhavi no timi huye viluve no pa züaphi ikhiqhe luve eno alache wuve.

Tipa tsalani ye Sabbath shiae. 10Ikehu Jewmi no timi viluve keu vilo pi, “Ishi ye Sabbath ke o züaphi pesü chekeu ye ayezah lo kühae.” 11Ikemu pa no khochile, “Timi khuu I shipivi keno, pa no I vilo ‘O züaphi ikhiqhe luve no alachelo’ ipike.” 12Panongu no pa ighiju, “O vilo ‘O züaphi ikhiqhe luve no alachelo’ ipikeu timi ye khuu kea?” 13Ikemu pa ye khuu no keno mthae, kughengu Jisü no tile aqokitikhi akeu gholo ilove ke. 14Athiuno Jisü no achineki lo timi hu ithulu no pa vilo pi, “Julo, no ye vivae! Hinguno hilau ye kiuala alhoksa o shou ighi pemoni ke axine shikithe kevilo.” 15Timi huno wuve no Jewmi vilo pa shipivi tsükeu ye Jisü kepi pive. 16Hi ghenguno Jewmi no Jisü pishipuju thuve, kughengu pa no Sabbath tsala lono hitoi keu kümla shike. 17Ikemu Jisü no Jewmi khochile, “I pu ye itehi kutolo mla ani eno Ni ghi mla anie.”

Jisü ye Alhou sasü Aqhemi

18Hi ghenguno Jewmi no alaushi Jisü pithiveni ke phuthuve, kughengu pa no Sabbath hexakeu likhi kumono Alhou pesü papue pi, eno pa ampi pesü Alhou sasü aqhemi shike.

Anu Kükagha

19Ikehu Jisü no panoqo vilo pi, “Kuchou no I no nongu vilo piani, Anu ye pa kutoshino kiumu shimlae, ikemu Apu no shiaghi keu pa no ithulu keu likhi shicheni. Apu no kiu shi keno Anu ghi tishi cheni. 20Kughengu Apu no Anu kimiye cheni eno Pa ampi no shikeu kümtsü pa piye cheni. Eno nongu pelo akichiqhi penike akümla hinguno akijeu pa piye nani. 21Kughengu Apu no kithimi xüputhu no aküxü tsü ketoi, Anu ghi aküxü pesü khuno tsünishi keno tsü nani. 22Apu ye khuu shoumu küghathabe chemoe, ikemu küghakütha kümtsü pesü Anu tsüvae, 23tishianguno Apu gihu ketoi kümtsü no Anu gihu peniye ke. Khunono Anu gihu moni keno, pa puwu keu Apu hu gihu movae. 24Kuchou no I no nongu vilo piani, khunono I tsa chilu no I puwu keu pülüni keno lhokta küxü anani. Pa ye küghakütha lo ilomo nani, ikemu akithi lono aküxü lo wuluvae.

25“Kuchou no I no nongu vilo piani, kithimi no Alhou Nu sütsa chilu, eno pa sütsa chilu kemi no xüluni keu ghuloki wocheni, eno ti ye ighivae. 26Kughengu Apu no Pa lolo aküxüpu aketoi, Pa no Nu pelo ghi aküxüpu pa lolo apenike tsüvae. 27Pa no Anu pelo küghatha penike kükagha tsüvae, kughengu pa ye Timi Nu ke. 28Hipau lo akichiqhi kevilo, kughengu aghuloki wocheni, akumo lo akemi kümtsü no pa sütsa chilu no 29ipeghi nani, khunono akivi mla püaghini keno aküxüpu lo xüputhu nani, eno alhoksa mla püakeqo no küghakütha lo xüputhu nani.

Jisü Thopimi

30“Ni ye I ka-agha loye kiumu shimlae. I no chilu no küghatha cheni, eno Iw küghakütha ye achipie, kughengu ni ye I gho-apulou kumono I puwu keu gho-apulou shicheni. 31Tsala I no ni ampi shepe shi aye, I shepe ye kuchou kumoe. 32I shepe shiakeu lakhi ani, eno pa no kiu I shepe shiani keno ti ye kuchou kepi I no ithi ani. 33Nongu no John lau aghinimi puwu, eno pa no kuchou thopi shive tsüae. 34I no ashepe ithulu keu ye timi launo ke piamoe, ikemu nongu xalu peniye ni ye hipaqo piani. 35John ye iqü akeu eno vüqai akeu kulu eno nongu no pa küvü lo ado hami alovini ke puloe. 36Ikemu I no ashepe akeu ye John shepe nguno akijeu ke. Kughengu Apu no I pelo mlakupu peniye I tsükeu, akümla khikhi I no shiani keno, tipaqo no Apu no I puwu kepi thopi shiani. 37Apu I puwu keu Pa ampi no Iw thopi shitsüke. Nongu ye khilemu Pa sütsa chimla aphi, Pa koghe khilemu ithumla aphi, 38eno nongu lolo Pa tsa kühae, kughengu Pa no khuu puwu keno nongu no pülümo ke. 39Nongu no Kuchoyesü phuju cheni, kughengu nongu no tipau lono lhokta küxü ani kepi kümsü cheni. Kuchoyesü tino Iw thopi shicheni, 40ikeghi nongu ye aküxüpu ithuluni ke I lau ighi chemoe. 41Ni ye timi launo agigihu laju chemoe. 42Ikemu I no ithi anike nongu ye alolo Alhou kikimiye kühae. 43Ni ye I Pu je lono ighi ani, ikemu nongu no ni ikhilumoe. Tsala kütami no pa ampi je lono ighi aye, nongu ye pa ikhilu nani. 44Nongu no lakhino lakhi launo akishe kütsü lucheni, ikemu Alhou khuu Pa likhi keno, Pa launo ighikeu shekiqhe ye phumoke kishino pülü luni kea? 45Ni ye Apu zülono nongu nguku nanie pi kümsü kevilo. Nongu ngukuni keu ye Moses ani, nongu no now lajupu pa shou becheni. 46Nongu no Moses pülüke aye nongu ye I pülüni cheke, kughengu pa no I ghili yeke. 47Ikemu nongu no pa kiyeqo pülümo keno kishino I tsa pülüni kea?”

Currently Selected:

JOHN 5: SUMRVBSI

Highlight

Copy