HOSEA 2
2
Israel Mikuchokumo Ghime keu
1O thiküzümi vilo, “Nongu ye Iw timi,” eno o chelimi vilo, “Nongu ye küpükini ithuluvae,” ipilo.
2“O za lomipi lo—
kughengu li ye I nipu kumoe,
eno ni ye li kimi kumovae—
tishino li pelo kütüqha pemove,
eno li pelo asalha tave pelo;
3tikumo aye I no li phimini xave tsüno li punu tsala lo
toi aphikümsa shive tsüni,
li pesü yenguyike-a toive tsüni,
eno li pesü qhaike yeghi toive
tsüno atüghü lono li pithiveni.
4Li tianuliqo shou ghi Ni ye küpükini piyemo nani,
kughengu panongu ye kütüqhalimi tianuli ke.
5Kughengu panongu paza ye shupu-salhave;
khuu panongu mishi keno li huno akukujopu shike.
Kughengu li no pi, ‘Ni ye I lojipumi lau wuniae,
panoqo no asho, azü, akülüphi,
phepheike phi, thazü eno yekepu pesü I tsü chenie.’
6Tighenguno I no asahu pesü li laghi putukhave tsüni
eno aliwo shipe li lakhave no
li ye alaghi ithumlave peni.
7Li no alojipumi hawu nani
ikemu halumo nani,
eno li no panoqo phuwu nani
ikemu phumlave nani.
Tileno li no ishi pi nani, ‘Ni ye
I kimi atüghüu lau idewoni,
kughengu I ghenguno itehi ye püzüu pavie.’
8Athi, aji eno thazü ngo Baal
mlla chekeu ghükayi eno
ameshoyi pesü li pipe keu ye
I no kepi li ye mthae.
9Tighenguno ado tove kemtsa
I no I thi ngo I tsaiji
ikhichile luve nani,
eno li phikümsa küzü chekeu Iw
akülüphi ngo phepheike phi I no luchileve nani.
10Itehi ye li lojipumi zülono
I no liw kujomo ghili pi nani,
eno khunomu I u lono li xaphelu mo nani.
11Eno I no liw kunuvüqai keu,
tiqhetini, aqhi kithe, Sabbath, eno apine jeli
kümtsü kishekhave tsü nani.
12I no li tsaibo eno mububoqo kütsave tsü nani,
tipaqo jupe li no ishi piche,
‘Hipaqo ye I lojipumi no
tsükeu I jumeqo ke.’
I no tipaqo pesü aghasa shive no
tüghashiqo no kütsaleve peni.
13Baal ghulhu tsalaqo lo li no akümllagho pitipe tsü,
anguthi ngo achiku no ananu shino alojipumi papewu,
eno I kümsümave kehu I no li ghime nani,
ipi Ampeu no asheshu.
Israel shou AMPEUw Küpükini
14“Ikehu, julo, I no li züizani,
eno yenguyike-a lo saighi no
ivüilai li pütsa kümtshani.
15Tilauno I no li tsailu tsüchile nani eno Achor Khila
pe lajupu hukikha shitsü nani.
Tilauno li lhothe ghuloki lo toi,
Egypt yeghi lono ipeghi kelo toi li no khochile nani.
16“Tipa tsala lo, Ampeu no asheshu, nono I vilo ‘I kimi,’ ipi ku nani eno no ye I vilo ‘Iw Baal’ ipi kumove nani. 17Kughengu I no Baalqo je li kichi lono ikhive tsü nani eno tipaqo je kümsüchilelu pemove nani. 18Tipa tsalani, I no panoqo ghenguno aluza lo tüghashi, kungu ghau, ayeghi lo itikiche lhoxü sasü puloshoqhi shi nani. I no aghakhu lono shexilika, azütakikihi, eno aghükishi lakhave tsü nani, eno nongu pelo aküighüpu kühave no ikiqi ihozü lupe nani. 19Eno I no pülhapuju ghenguno no inisüve nani. I no achipiu mikucho eno kuchou xakütha, iqemokeu kikimiye eno küpükini lono no inisü nani. 20I no pükhükulu lono no inisü nani. Eno nono Ampeu ithive nani.
21“Tipani I no khochile nani, Ampeu no shuphe ani,
I no atsütsü khochile nani,
panoqo no ayeghi khochile nani,
22eno ayeghi no athi, atsaiji eno thazü khochile nani,
tipaqo no Jezreel khochile nani,
23I no I sala shi aghakhu lo li shosü nani.
Eno I no küpümoe ipi keqo shou küpükini anani,
Iw timi kumoe ipi keqo lau, ‘Nongu ye Iw timie’ ipi nani;
pa no pi nani, ‘No ye I Lhou.’”
Currently Selected:
HOSEA 2: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
