HOSEA 13
13
Israel shou AMPEUw Küghakütha
1Ephraim no atsa pi kelo kümtsü no khokhoshi che;
Israel lo pa süqhe puku cheke,
ikemu Baal vecheo pa ye akipimi ithulu no thivae.
2Eno itehi ye panoqo no alau eno alau axine shino
pano sala ayi julho mla ani,
panow ghükayi no kütshakügha shi ajulho mla ani,
ti kümtsü kütshakügha kümla kishimi noke.
Panoqo ghili ishi picheni,
“Timi heqhipe mlla chekemi no amshitsü mümae!”
3Tighenguno panongu ye inaqhe kimhi toi, momu itheno
hauve keu tsüzü toive nani,
aniqa lono amuu fupe wuve keu momu alashe lono
amchhi phoipeghi ketoi nani.
4Ikemu Egypt yeghi lou no
Ni ye Ampeu o Lhou ke;
no ye I likhi thono Alhou kütau ithimoe, eno I nguno
alau ye xakuluu kütau kühae.
5Asayeqha eno züha yeghi
lono no ithikeu ye I no ke;
6ikemu kughou panongu no chusholu keno,
panongu ye aghakiqi shiluve
kehu I kümsümave ke;
7Ikehu Ni ye panoqo ghenguno abongshuu toivae;
angshuu amikhiu#13:7 Momu akhighiu ngushuu toi I no ala lo itshü no ngokhe nani.
8Atiqo pühave keu ava toi I no panoqo vakulu nani;
panongu mla süxüve tsü nani,
eno abongshuu toi panongu tsüchuve nani
aghalo tüghashiqo no süthapinyi keu toive nani.
9Pa no o kütsavae,#13:9 Momu I no kütsa nani O Israel,
kughengu nono O kukuphuu mjochile ke.
10Aphughiqo lono o xaluni keu o kükau ye khile ani kea?
Ow yepemi khile ani kea?
Panoqo ghenguno nono pi,
“Akükau lakhi eno sakiphemiqo I tsülo.”
11I mlokighide lono I no akükau lakhi o tsü,
eno I loghu lono I no pa ikhi süwuve tsüe.
12Ephraim xine ye tsüghavae;
pa xine ye hekütsüpe qhivae.
13Apunu küsü pa lau ighivae,
ikemu pa ye alotsümo keu nu,
kughengu ado tove keghi pa ye
atita lo ikipe la lo ighimoe.
14Kithigha#13:14 Hebrew lo Sheol küka launo I no panoqo qhüchilelu nani;
Akithi lono I no panoqo xachilelu nani.
O akithi, ow püsaqo khile ania?
O Kithigha, o sahu khile ania?
Amlo ighiqhiyi keu ye I nhethe lono küsüvae.
15Pa no pa thiküzümi gholo miniboi aghi namu,
kipela mülhü, Ampeu mülhü,
no yenguyike-a lono ighi nani,
eno pa züpuki ngo azükikhe ye qhaive tsü nani;
tino pa kinibo lono akughupu
thime kümtsü pewuve nani.
16Samaria#13:16 Hebrew lo ajo hipau ye akiyedo 14:1 lo ani. no li xine xapu nani,
kughengu li no Alhou hebideke;
panongu ye ghüyi lono wonani;
pano tianuliqo ye chisheda pinyi heqhive nani,
eno mishipu akemi totimiqo kive xüleve tsü nani.
Currently Selected:
HOSEA 13: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
