HOSEA 10
10
1Israel ye nibonilei keu tsaibo
tipau ye axathi pithi acheni.
Pa xathi no ikowo ke kümtsü
pa no alau akiptia mla cheni;
pa ghakhu no ikoishe kelo pa no
pa tsükuchoqo shikumto cheni.
2Panongu mlo ye kichile ke;
itehi panongu ye pano kipimi makho xapu masae.
Ampeu no pano kiptia kubovetsü eno akümlla
tsükuchoqo kütsave tsü nani.
3Itehi ye panongu no pi nani:
“Nino Ampeu sümsamo ke
ningu ye akükau kühae; ikemu
akükau lakhi ye ni ghenguno kiu shitsü luniche kea?”
4Panongu no atsa likhi piqhi;
abokümsa shoqhi pesü panoqo no puloshoqhi shie;
ikehu küghakütha no hokideve keu lulo tüghü lupi
ipeghi ketoi toi thuipeghi ani.
5Beth-aven mishitsü julho ghenguno Samaria
lo küxümi ye khokhoshi ani.
Tilehi timi eno achinemi ghi tighenguno mloqa ani,
panoqo no tipau jekipipu shou alovi acheke
tipau ye panoqo launo wuvae.
6Ti huye asüqha shi ghi Assyria
lo akükau akijeu#10:6 Momu akükau Jareb tsüve nani.
Ephraim ye shikujove nani,
eno Israel ye pa julho ghenguno kujo nani.
7Samaria kükau ye azü no yipe
chekeu süloka toi pühave nani.
8Aven lo akuchuqu-a, Israel
xinepu hu ye kütsaleve nani.
Asahu ngo koghesahubo no
akiptiaqo lono ipeghive nani,
panongu no naghuto vilo, “Ni küghütshülo,” eno atoghi
vilo, “Ni nhaluvelo!” ipi nani.
9Gibeah ghuloki lono nongu ye axine shivae, O Israel;
tilauno nongu ye kibe ighivae.
Aghükishi no Gibeah lo achipikumomi#10:9 Hebrew lo achipikumo tianuli haluve moni kea?
10Kughou I no puloveni keno, I no panoqo shikümzü nani,
panoqo xine kütsasa ghenguno pano tsügha kelo
shiyeqo no hekütsüpe panoqo mjochile nani.
11Ephraim ye qopheve keu mishi
lhothe, athi qonike pulo ache,
eno li kuo kivi I no msape qhie;
ikemu I no kuokhasü Ephraim xapipe nani;
Judah ye hokide masa nani;
Jacob ye pa sala hokide masae.
12Nongu sala amikucho xusülo;
iqemokeu kikimiye xolulo;
chimokeu yeghi hokide lo,
kughengu itehi ye Ampeu phu kepu doke,
Pa no ighi no achipiu mikucho nongu shou ghuqhitsü nani.
13Nongu no axine hokide;
nongu no achipikumo xolue;
nongu no akimki xathi xochue.
Kughengu nongu no nongu shou likhi eno now ghüshimi
aqokitikhi shou pükhübeve,
14ikehu now timi shou aghüshi ghügha ipeghive nani,
eno now sükusho-aqo kümtsü kütsaleve tsü nani,
aghüshi tsala lo Shalman no Beth-arbel kütsale akelo;
azanoqo ye atianuli gholono mukhumuno shive nani.
15Now kixikila kije ghenguno
no shou hi shinani, O Bethel.
Tsüküvü ipeghi kemtsa
Israel kükau ye pithive nani.
Currently Selected:
HOSEA 10: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
