HABAKKUK 3
3
Habakkuk Kighini
1Tungkupu Habakkuk kighini, Shigionoth ghügha kiqi lono.
2O Ampeu, I no O sütsa
chiluvae, eno O kümla sümsa ani.
Ni ghuloki lo ghi O kümla püxükithe
tsüno ni pelo tipau ithi pelo;
aloghu lo kimiyekini kümsülulo.
3Alhou ye Teman küdau no ighi,
Akimtheu ye Paran Toghi lono ighie.
Pa juküvü no atsütsü nhakha,
Pa shekiqhe no ayeghi chhitoi.
4Pa küvü ye akulu toi;
Pa u lono kulophe; eno Pa no
Pa küka tile küzüpe qhie.
5Pa züu no küsükini puwu,
eno püsa no Pa nepa pape ke.
6Pa no puthugho no ayeghi mighi;
Pa no jupuwo no shiyeqo süküthü; tileno alholo
naghutoqo ye apanaghave; alholo
toghiqo no aqhou iqüilove.
Pa laghi ye pülhapuju la ke.
7Cushmi phiki aghime lo akeu I no ithulu; Midian yeghi
lo nhaqhiphi no khokhoshi ke.
8O loghu ye aghokiqo shou keshea, O Ampeu?
Kughou Nono Ow khurshi eno
xakulu khurkuluqo sa keno,
O ghakighide ye azüghi shou akeo
aghokiqo shou akea?
9Nono apijibo lono shexilika
ikhiphepe apiji kutomo kuto eno
aghokiqo pesü ayeghi kijetha tsü.
10Naghutoqo no No ithulu no
thüthüshi; azü no fuchighi qowu;
azükutho no mqhomzai ipeghi no
azü fukuchope qhemghai süqhe.
11O piji eno O ngu no phuphushi
yeighi kelo khetsünhe ngo aqhi
no panoqo-a lo itha mono ngove.
12Nono axukighide lono ayeghi
katha eno amlokighide lono shiyeqo qodaqhi.
13Nono Ow timi, nukishe luve
keqo xaluni ke ghenguno wuke.
Nono kixikila kibo lo atou chunuqhi,
eno pa kütsü lono apukhu kutolo aphikümsa shivetsü.
14Tuqhouno kumlhomi pishiqhini ye alovi ake toi,
khuu no I haleveni ye miyitsü toi ighi keno, Nono pa piji
pesü paw ghüshimiqo kütsü lo chhesüve tsüe.
15Azüghizü chhetsüghü ikughi akeu
Nono khurshiqo sasü qodave tsüe.
16I no chilu no I phimpi sükidi;
aghügha huno I mütsü thüthüshi;
tsümave keu no I ghi lo iloghive;
I pukhu no khokho shiuve.
Ikeghi ni ye inaqhoi shino ni leighi kemi shou aküpüna tsala
ighini keu ngokhe anani.
Habakkuk no Ampeu lau Alovi
17Mububo no pumove namu,
atsaibo lo axathi kühave namu,
olivebo no pithi move na, aluza lo
achuqupu ipeghi move namu,
ambeloji no aqo gholono kühave,
amishi kilo lhoxü kühave namu,
18ni ye Ampeu jupe alovi nani;
I xakulu Lhou lau I no alovini.
19 Ampeu, Alhou ye I kumto;
Pa no I pukhu pe ashe pukhu toi
shino akiqhe-a lo chewulu peke.
Akighilebo pesü ale shikükau lau.
Currently Selected:
HABAKKUK 3: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
