BOTHUBO 9
9
1Alhou no Noah eno pa nuli kümghatsü no panoqo vilo pi, “Athi pithilu, kughukolu, eno ayeghi shepichhilu lo.” 2Ayeghi shou tüghashi tikishi, atsütsü lo aghau, ayeghi lo itikiche, eno azü lo akhaqo kümtsü no o sümsa eno ichikeu anani. Tipaqo ye o u lo süve tsüae. 3Ithakiche lhoxü thaqhü no o chuqupu shi nani. Eno I no ayetsüni nongu tsüve ketoi thokha kümtsü nongu tsü ani. 4Ikemu nongu ye aküxü akeu shi, ti ye aji, huye chumoni. 5Eno nongu küxü ji luve tsükeu ye I no kihikülai keu avehupu shi nani: tüghashi eno timi kümtsü launo I no kihikülai keu avehupu shi nani. Timi küxü ghenguno I no pa küsau launo kihikülai keu avehupu shi nani.
6“Khuu no timi ji peleni keno,
timi ghi pa ji pele masa nani,
kughengu Alhou no Pa ampi julho lono timi lhoke.
7Eno nongu ye athi pithi no kughuko lulo, ayeghi lo shishe ikowolo eno tileno kughuko lo.”
8Tishino Alhou no Noah eno pa gholo akemi pa nuliqo vilo pi, 9“Julo, I no o sasü eno o shelo o tikughuko sasü puloshoqhi shi ani, 10eno ti ye aküxüküa lhoxü nongu gholo akeqo, aghau, tikishi eno ayeghi lo tüghashi nongu gholo akeqo, ashuka lono ipeghi keqo, ayeghi lo tüghashi kümtsü ghenguno ke. 11I no nongu sasü puloshoqhi shi anike, khilemu itaghi züqozü pelo ayeghi kütsave pemoni.” 12Eno Alhou no pi, “Hi no Ni eno nongu eno aküxüküa lhoxü, nongu gholo akeqo, dolo ighini keu tiqheli kümtsü ghenguno puloshoqhi shikeu michipu ke: 13I no khüngküsü lo Iw milisü ghope qhivae, eno tino Ni eno ayeghi dolo puloshoqhi michipue. 14Kughou I no ayeghi shou khüngküsü süghini eno khüngküsü lo milisü ithuluni keno, 15I no Ni, nongu eno aküxüküa lhoxüqo dolo Iw puloshoqhi akeu kümsülu nani. Eno azüghizü ye khilemu itaghi aküxü kütsa nike züqozü shi ighimo nani. 16Kughou milisü no khüngküsü lo ngoni keno, I no tipau juno Alhou ngo ayeghi lo aküxüküa lhoxüqo dolo alholo puloshoqhi akeu hu kümsülu nani.” 17Alhou no Noah vilo pi, “Hi no Ni eno ayeghi lo aküxü akeqo dolo Puloshoqhi shikeu michipu ke.”
Noah Tikughuko
18Noah nuli khunoqo no ashuka lono ipeghi keno panoqo ye Shem, Ham eno Japheth. (Ham ye Canaan papu.) 19Pano küthü no Noah nuli, eno hipaqo launo ayeghiqha kümtsü lo timi ikowove.
20Noah ye alu kichimi shive, eno pa no atsailu chie. 21Pa no atsaiji shomzüve eno aphimini pepumo no pa phiki lo züae. 22Eno Canaan papu Ham no pa pu ye aphimini pepumo no akeu ithulu no khalau pa thiküzüu pama vilo pi. 23Tileno Shem ngo Japheth pama no aphi lakhi ikhilu no pama bighi lo bepüzü shothiu no alachesü panongu papu aphimini pepumo no akeu khonhave. Pama gi ye shothiu kugho puwove no panongu papu no aphimini pepumo no akeu jumoe. 24Kughou Noah no atsaiji shomzüpe akeu lono ithughi püzü pa nu ayitiu no pa lau shikeu ithi keno, 25pa no pi,
“Canaan ye angusü shipeniu;
pa thiküzümi pama lau pa ye aqemiqo qemi shi nani.”
26Pa no highi pi,
“Ampeu, Shem Lhou sheqhelo;
Canaan pelo pa qeu shipelo.
27Alhou no Japheth kughuko tsüpeni, eno pa pelo
Shem phiki lo xülu peni,
eno Canaan pelo pa qe peniu.”
28Züqozü thiu Noah ye ampe 350 xüe. 29Noah küxü kupuju mpe ye 950, tishino pa ye thive.
Currently Selected:
BOTHUBO 9: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
