BOTHUBO 46

Joseph Kibolomi Egypt lo Saighi

1Ikehu Israel no pa no pighi akeu kümtsü pesü pa ghüzüla lo wuve no Beersheba lo ighi, eno pa pu Isaac Lhou lau aghakishi pesü mllae. 2Alhou no putho lo kungunhetsü lono pa pütsa no pi, “Jacob, Jacob.” Eno pa no pi, “Ni hile ani.” 3Tile Pa no pi, “Ni ye Alhou, o pu Lhou ke. Egypt lo iqinike msa kevilo, kughengu tilauno I no o pesü shiye kije shitsüni. 4Ni ampi no Egypt lo o gholo iqi nani, eno I no o saighive nani, Joseph u no o nhethi kiyikha tsü nani.”

5Tishino Jacob no Beersheba lono wuve. Israel nuliqo no panongu papu, atianuli kughunuqo eno anipuqo ishi Pharaoh no tinhemgha kupu mishikulu tsüpuwu keu lono xapu luve. 6Jacob ngo pa gholo pa tikughuko no pano tsü-aqu, tinhemgha, khipaqo Canaan yeghi lono ithulu keno, ti kümtsü sasü Egypt lo wuve. 7Pa gholo pa nuli eno atilimi, pa ngaqo eno atilimi ishi pa tikughuko kümtsü pa no sasü Egypt lo ighive.

8Hipaqo no Jacob tikughuko je ke: Reuben, pa nu anoghiu, 9Reuben nuli: Hanoch, Pallu, Hezron, eno Carmi. 10Simeon nuli: Jemuel, Jamin, Ohad, Jachin, Zohar, eno Shaul, Canaanmi totimi lakhi nu. 11Levi nuli: Gershon, Kohath, eno Merari. 12Judah nuli: Er, Onan, Shelah, Perez, eno Zerah (ikemu Er ngo Onan pama ye Canaan yeghi lono thive); eno Perez nuli no Hezron ngo Hamul. 13Issachar nuli: Tola, Puvah, Yob, eno Shimron. 14Zebulun nuli: Sered, Elon, eno Jahleel. 15Hipaqo no Leah, khuu no Paddan-aram lo Jacob lau punu tsü keno, li nuliqo ke, eno tipaqo gholo pa nga Dinah ghi ke; pa tianuli aqolo shighi küthü.

16Gad nuli: Ziphion, Haggi, Shuni, Ezbon, Eri, Arodi, eno Areli. 17Asher nuli: Imnah, Ishvah, Ishvi, Beriah, eno panoqo chepu Serah. Beriah nuli: Heber ngo Malkhiel. 18Hipaqo no Zilpah nuliqo, li ye Laban no pa nga Leah tsükeu ke; li no Jacob lau punu tsükeu—pano chighitsügho.

19Jacob nipu Rachel nuli: Joseph ngo Benjamin. 20Egypt yeghi lono Jacob lau punu keu no Manasseh ngo Ephraim, pama ye On lo achineu Potiphera nonga Asenath no pa lau punu tsüke. 21Benjamin nuli: Bela, Bekher, Ashbel, Gera, Naaman, Ehi, Rosh, Muppim, Huppim, eno Ard. 22Hipaqo no Rachel nuli, li no Jacob lau punu tsü keqo—kümtsü kelo chighibidi.

23Dan nu: Hushim. 24Naphtali nuli: Jahzeel, Guni, Jezer, eno Shillem. 25Hipaqo no Bilhah nuliqo, li ye Laban no pa nga Rachel tsükeu ke, li no Jacob lau punu tsükeu—kümtsü kelo pano tsüni.

26Jacob timi, khunoqo pa tikughukomi keno, pa nuli nipuqo kihisü mono aqolo pano lhotsügho tsügho. 27Joseph nu Egypt lono pa lau punu tsükeu no pamae. Jacob kibolomi, khunoqo Egypt lo ighi keno panongu ye aqolo lhotsüni.

Jacob ngo Joseph Kujuthu luve

28Jacob no Goshen laghi pa piye peniye Judah pelo pa züu shi wuvepe, eno panongu ye Goshen yeghi lo ighive. 29Tileno Joseph no paw khurkulu kutope pa pu Israel kusholu niye Goshen lo iqhoe. Pa no pa zülo ighi no pa kuo lono khaluve eno pa vape ado kushuo qae. 30Israel no Joseph vilo pi, “I no o gi ithuluvae eno no ye xüaphie pi ithive ake itehi ye I no thive namu alomsü moae.” 31Joseph no pa mu noqo eno pa pu kibolomi vilo pi, “I no iqho no Pharaoh vilo pini, ‘I thiküzümi eno I pu kibolomi, khunoqo Canaan yeghi lo akeno, panongu ye I lau ighivae. 32Panongu ye ambekhemi ke, kughengu panongu ye atsü-aqu kipighimi, eno pano tsü-aqu eno lhoxü jeli ngo panongu no pighi akeqo kümtsü saghivae.’ 33Kughou Pharaoh no nongu kuno, ‘Nongu ye kiu kümla shiche kemi kea?’ ipi aye, 34nongu ye ishi pilo, ‘Ningu eno ningu papu, o qemiqo ye ni lhothe lono ishi kutolo atsü-aqu pighi achenie,’ tishi pikeu vecheo nongu ye Goshen yeghi lo küghüna lunani, kughengu Egyptmi ghenguno ambekhemi ye aphikümqhüpu ke.”

Currently Selected:

BOTHUBO 46: SUMRVBSI

Highlight

Copy