BOTHUBO 12

Abram Kukulu

1 Ampeu no Abram vilo pi, “O ghakhu, o sholokumi, eno o limi qhive no I no o piyeni ye akeu yeghi lo wuvelo. 2I no o pesü shiye kije shitsüni, I no o kümgha tsüni, eno o je kije shitsüni, tishianguno no ye kükümghau shipeni. 3Khunono o kümgha tsüni keno I no kümgha tsüni, khuu no o thaighani keno I no ghushoni, eno o launo ayeghi lo akibolomi kümtsü mügha peni.”

4Ikehu Abram ye Ampeu no pa vilo pi ketoi wuve, eno Lot no pa gholo wuve. Kughou pa no Haran qhive keno, Abram ye ampe 75 shiae. 5Abram no pa nipu Sarai, pa thiküzüu nu Lot, panongu no tinhemgha hekütsülu keqo, eno Haran lono qhülu kemi ishi sasü Canaan yeghi lo wuve. Kughou panongu no Canaan yeghi lo ighi keno, 6Abram no chesü Shechem lo a-a lakhi Moreh lo aphisübo akeu lo ighi. Tipa ghuloki lo Canaanmi ye tile acheghi. 7Tithiu Ampeu no Abram lau ipeghi no pi, “O tikughukomi lau I no ayeghi hipau tsüni.” Ikehu pa no Ampeu, khuu pa lau ipeghi keno, Pa lau akümlla-khache shiqhe. 8Tilehi no pa no Bethel kipelau atoghi ghakhu lo iqesü wuve, eno Bethel no kulolau shi, Ai no kipelau shino pa phiki tshü. Eno pa no Ampeu lau akümlla-khache shiqhe no Ampeu je kue.#12:8 Momu Ampeu sheqhe 9Eno Abram ye izüsü Negeb küdau wuve.

Abram ngo Sarai Egypt lo wuve

10Tipa ghuloki lo püqümiye ayeghi lo ighive. Ikehu Abram ye Egypt lo iqive, kughengu püqümiye ye shishe kije shive. 11Kughou pa no Egypt lo ilo niye shi keno, pa no pa nipu Sarai vilo pi, “I no ithi anike no ye totimi aju kivi lakhie, 12Egyptmi no kughou no ithuluni keno, panongu no pi nani, ‘Hipau ye pa nipu ke.’ Tileno panongu no I heqhive nani, ikemu o pelo xülu pe nani. 13No ye I chepue pivelo, tishianguno I sapüsa monani, eno o ghenguno I küxü hakholu nani.” 14Kughou Abram no Egypt lo iloghi keno, Egyptmi no totimi huye ighono ajukivi shi ithulu. 15Eno kughou Egypt kükapumi no li ithulu keno, panongu no Pharaoh zülo li sheqhe. Eno totimi huye Pharaoh kilo sawuve. 16Eno li ghenguno pa no akivishi Abram hiju; eno Abram ye ambe, amshitsü, khurhatsü, aqemi kiptimi ngo totimi, khurhaqu, sayeshi ishi auve.

17Ikemu Ampeu no Abram nipu Sarai ghenguno püsa kije pesü Pharaoh eno pa kibolomi ghimeve. 18Ikehu Pharaoh no Abram kuno pa vilo pi, “No ye hi ye kiu I shou shive akea? Kushiye no ye li ye o nipue pi I vilo pimo kea? 19Kushiye no ye, ‘Li ye I chepu’ ipi püzü I pelo li pesü I nipu shive peniye shi kea? Itehi, o nipu hi anike luve no wuve lo.” 20Eno Pharaoh no Abram ghenguno paw timiqo azah tsüno panongu no pa nipu eno pa no pighi akeu kümtsü pa gholono tsü puwuve.

Currently Selected:

BOTHUBO 12: SUMRVBSI

Highlight

Copy