EZEKIEL 43
43
Ampeu Juküvü no Achineki Chhive
1Tithiu pa no khagho kipela küdau I sawu. 2Eno julo, Israel Lhou juküvü no kipelau no cheghi. Pa no ighikeu sütsa ye azüghi ghügha toi eno ayeghi ye Pa juküvü no yevüqaive. 3I no kungunhetsü ithulu keu ye azüu pa no mishighüna kütsaveni ye ighi kelo I no ithulu keu kungunhetsü toike, eno I no Khebar züla lono kungunhetsü ithulu keu hutoi ke. I no I gi pishiqho luve. 4Ampeu juküvü no khagho kipela küdau ighi kelo, 5Aghungu no I sünheqhe luve no I sasü akikhala alou lo iloghi; eno julo, Ampeu juküvü no achineki chhitoive.
6Timi huno I phivilo puthugho akelo asütsa lakhi no achineki lono I pütsa keu I no chilu, 7Pa no pi, “Timi nu, hi ye I kükalakhü-a eno I pukhu kinepu-a, hileno I no Israelmi gholo alhokupuju ache nani. Eno Israel kibolomi ye panongu na pano kükami namu panow kütüqha keu ngo qhemghaike-a lo panow kükami sükumo vecheo I je kimthe shikitiqe kithe moae. 8Kükami no achineki kisheqho ngo ahukikha tsükucho shipe qhike, ikemu Ni eno nongu dolo akuptu likhi ani. Panongu no kuchhube kütsüla kümla shikeu lono I je kimthe shipixi kehu I no I loghu lono panoqo kütsave ke. 9Itehi ye panoqo pelo panow kütüqha keu ngo panow kükami sükumo I launo putou peve pelo, eno I no panoqo gholo alhokupuju acheuve nani.
10“Timi nu, no ye Israel kibolomi vilo achineki ghili pesü pilo, tishianguno panongu no pano kipimi ghenguno kujove nani; eno achineki kukughu mighiju nani. 11Eno panongu no pano xine ghenguno kujove aye, panongu pelo achineki kogheküghü ithi pelo, tipau ikipe ikulo laghi, kogheküghü kupuju ithi pelo; eno panoqo pelo tipau khuayeqo, kogheküghü kupuju eno ayezah kümtsü ithi pelo, pano nhethe lono ti kümtsü yesüpe qhilo, tishianguno panongu no tipa khuaye kümtsü papelu nani. 12Achineki yezah ye hipau ke: Naghuto kütsüqa eno tipau hokümxa kümtsü ighono akimthe ke. Julo hi no achineki yezah ke.
Akiptia
13“Akiptia kimghi ye hike (auxakuchho tüxa): aboqha lo auxakuchho tüxa, akijelau auxakuchho tüxa, eno tipau mütsü no aulotikipshe toku. Akiptia ye akiqhelau ishi ke: 14aboqha lono iku akiptibo aqhou kutolo auxakuchho lakhi qhemi, tipa shelo kotha keu ako lono alou kutolo homxa ghi auxakuchho tüxa eno auxakuchho kini qhemghai ke. Itaghi tipa thiu kokütha akeu ghi ako lono sümxa ghi auxakuchho tüxa alou lono shipüa. 15Hi kunguu kokütha khile akümllagho piti chekeno tighi akiqhelau auxakuchho kini. Acheku bidi lo chhophe püakeu ye akütsüqa kütau nguno akiqheu ke. 16Akiptia kütsüqa ye ako bidi aphiphi, ako lakhikhi lo auxakuchho tsügho ke. 17Amtau kokütha ghi ako bidi aphiphi, ako lakhikhi lo auxakuchho tsüni eno tipau kichi lo auxakuchho tüxa qhemi ae. Tile azüla ye auxakuchho tüxa pahi ke. Akiptia lo ikuni keu nepa ye kipelau küdau ae.
18Pa no I vilo pi, “Timi nu, Ampeu no ishi piani: Akiptia ghenguno ayezah ye hike: Tipa tsalani kughou akipti kümllagho tile ghope qhini eno tipau shou aji lepukuni keno, 19nono axine kümllagho ghenguno atsüaqu dolono amshitsü lakhi pesü Zadok limi Levimi achinemi khunono I mllani ke I kupunu ani keno panoqo tsüni ipi Ampeu no asheshu. 20No ye axine kümllagho shi amshitsü ji pesü akiptia lo akibo bidi akeu eno tipau shekichi lo ako bidi mütsü homxa akeu lo leqhilo. Hitoishi nono akiptia shikimthe no tipau qhukimtheni. 21No ye axine kümllagho ghenguno amshitsü lhothe lakhi pesü achineki lo kuto püakeu akimthe-a nguno khalau no pitilo. 22Atsala akiniu lo, no ye anetsü tukutiye kühakeu lakhi pesü axine kümllagho shi mllalo; eno akiptia ye amshitsü pesü shikimthe ke ghola lono shikimtheve nani. 23Kughou nono tipau shikimthe taveni keno, no ye atsüaqu dolono amshitsü eno ambetsü lakhikhi tukutiye kühakeu pesü mllalo. 24No ye tipaqo pesü Ampeu zülo ighilo eno achinemi no amti pesü tiküma küzüte no Ampeu zülo akipti kümllagho shi mllalo. 25Atsala tsüni ghenguno no ye axine kümllagho shi anetsü mllalo; atsüaqu lono amshitsü lakhi eno ambeloji lono ambetsü lhothe lakhi tukutiye kühakeu pesü mllalo. 26Panongu no atsala tsüni akiptia shikimthe no kishekimthepe qhiveni. 27Kughou panongu no atsala hipaqo kupuveni keno, atsala akütacheu nguno hulau ye achinemi no akümlla-khache lono akipti kümllagho eno külakishi kümllagho mllani, eno I no nongu ikhilu nani ipi Ampeu no asheshu.”
Currently Selected:
EZEKIEL 43: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
