EZEKIEL 39

1“Timi nu, no ye Gog vilo tungkuptsa pilo, Ampeu Alhou no ishi piani: Julo, O Gog, Meshech eno Tubal kükaputou, I no o lachile ani. 2I no o satsüghü no azüu o hapuwu nani eno ighono ahuu yeghi küdau no o saipeghi no Israel naghutoqo lo wunani. 3Tishino o u piyiu shexilika akeu I no hejove tsü nani, eno o u ajeu apijiqo peqhivepe nani. 4No eno ow aqokitikhi ngo timi khunoqo o gholo ani keno kümtsü Israel naghutoqo lono ikiqive nani. I no nongu pesü aghau jeli kümtsü lojive nani eno aluza lo tüghashiqo pelo tsüqhivepe nani. 5Nongu ye aluza lono ikiqive nani, kughengu I no piqhivae ipi Ampeu Alhou no asheshu. 6I no Magog ngo azüghimkü lo sükusho qholono küghüna chekemi shou ami puku nani, eno panongu no Ni ye Ampeu kepi ithi nani.

7“I je kimthe pesü Iw timi Israelmi pelo ithipe nani, eno Ni ye I je kimthe pesü shikitiqe kithe pemo nani. Shiyeqo no Ni ye Ampeu, Israel lo Akimtheu kepi ithi nani. 8Julo, tihu ye cheni eno tipau ye shikupu nani ipi Ampeu Alhou no asheshu. I no pikeu tsala huye tipau ke.

9“Tithiu Israel mishighünaqo lo küghüna akemi no ami pesü aghünanuqo pitivetsü nani, azüto kije-kitila, shexilika eno apiji, asüthalu eno angupa; hipaqo ye ampe tsüni kutolo shipiti nani, 10tishi kehu panongu ye aluza lo asü ghewu momu aghasüqo thaqhimo nani, kughengu panongu no aghünanuqo pesü ami shinani. Khunono pano pükaqhi eno xule puwuve tsü keno itehi ye panongu no tipanow xule puwuve tsü nani ipi Ampeu Alhou no asheshu.

11“Tipa tsalani Gog shiqho penike I no Israel lo a-a lakhi, azüghi kipelau, Kicheghüzümi Khila tsü nani. Tino aghüzümi kümtsü vekha nani, kughengu Gog eno paw aqokitikhi ye tile shiqhove nani ke. Ti ye Hamon-gog Khila ipi kunani. 12Israel laghami no pano yeghi shikimtheni ke ghenguno aqhi tsüni panoqo shiqho nani. 13I no I juküvü pepheke tsalani I no aghakhu lo timi kümtsü no panoqo shiqho nani, eno tino panoqo jekipipu shitsü nani, ipi Ampeu Alhou no asheshu. 14Panongu no aghakhu kuchopu itsüwu no ikiqi thi aghi kemi shiqhove eno ayeghi shikimtheve penike timi kishephe nani. Aqhi tsüni shekha lono panongu no itaghi akumo phuju wunani. 15Kughou hipaqo no aghakhu kupuju itsüwu no timi saghi ithuluni keno, Hamon-gog Khila lo amoshouqo no asükumo shiqho khamoke kutolo pa no amchipu shipe qhitsü nani. 16(Hamonah ye mishighüna je ghi ke.) Panongu no hitoi shi ayeghi shikimthe nani.

17“Timi nu, Ampeu Alhou no ishi piani: Aghau jeli eno aluza lo tüghashi kümtsü vilo pilo, ‘Hekütsüpe ighilo, aghakishi ghulhu, Israel lo naghutoqo shou aghakishi ghulhu kije lakhi I no nongu ghenguno kuto akeu lo aqha kümtsü lono ighi no hekütsülo, nongu no ashi chu eno aji yelu nani. 18Ambetsü, ambeti, anetsü, amshitsü, Bashan lo lhoxü atha pubeyi keqo toi nongu no akumtomi shi chunani, eno ayeghi lo yepemi ji yenani. 19Aghakishi ghulhu I no kuto akeu lo nongu no aghaqi moke kutolo atha chunani, eno shomzü moke kutolo ajih yenani. 20I ghulhu lüpa lo nongu no khurshi, khurkulu küsami, aghütomi eno ghüshimi jeli kümtsü sasü aghakiqi shi chunani,’ ipi Ampeu Alhou no asheshu.

21“I no shiyeqo gholo I juküvü pephe nani, eno shiye kümtsü no Iw küghakütha eno I no panoqo shou I u bekeu ithulu nani. 22Tipau tsala nguno hilau ye Israel kibolomi no Ni ye Ampeu panongu Lhou kepi ithi nani. 23Israel kibolomi no pano kipimi ghenguno akughu lo wuve kepi shiyeqo no ithi nani, kughengu panongu no shishe I pishiqhi keu lono I no panoqo launo I gi küsüve no panoqo pesü aghümi u lo phesüve tsüke, eno kümtsü azütakikihi vecheo ikiqive ke. 24I no pano mithekumo eno akipimi kiqi lono panongu peitha, eno panoqo launo I gi küsüve ke.

Ampeu no Israel Athoputho Tsü

25“Tighenguno Ampeu Alhou no ishi piani: Itehi ye I no Israel ngukümgha athoputho tsüni eno Israel kibolomi kümtsü kimiyeqhiyi eno I je kimthe süshoni. 26Panongu no pano kukujo eno I pishiqhi ighikeu kümtsü kümsümave nani, panongu ye khunomu pano shikümsa mlano pano yeghi lo sükusho qholono xülu nani, 27ti ye I no ashiayeqo eno pano ghümi yeghi lono panoqo sachile ighi kelono panoqo vecheo shiye kümtsü nhethe lono I kimthe chipiu phuphe nani. 28Tileno panongu no Ni ye Ampeu pano Lhou kepi ithi nani, kughengu I no panoqo pesü shiyeqo gholo akughushi puwuve eno tithiu no pano yeghi lo panoqo hekütsü kumqo ke. Ni ye shiyeqo gholo panongu lakhimu qhivemo nani. 29Kughou I no Israel kibolomi shou I ghungu lepukuni keno Ni ye panoqo launo khilemu I gi küsüve monani ipi Ampeu Alhou no asheshu.”

Currently Selected:

EZEKIEL 39: SUMRVBSI

Highlight

Copy