EZEKIEL 37

Asaghi Qhai keu Khila

1 Ampeu u no I shou ae, eno Pa no Ampeu Ghungu vecheo I sasü akhila mta lo qhive; ti ye asaghi no chhitoi ae. 2Pa no tipaqo gholo I sawu eno julo, akhila lo asaghi ighono kutomo ae, tipaqo ye ighono qhai ake. 3Eno Pa no I vilo pi, “Timi nu, asaghi hipaqo ye xülu nani kema?” I no khochile, “O Ampeu Alhou, Nono ithi ani.” 4Tile Pa no I vilo pi, “Asaghi hipaqo vilo tungkuptsa pilo, eno ishi pilo, O asaghi qhaive keqo, Ampeu tsa inilo. 5Ampeu Alhou no asaghi hipaqo vilo ishi piani: Julo, I no nongu lolo atuthu iloghi peni, eno nongu ye xülu nani. 6I no nongu shou anhü ngo apiti ikughi peni, ayiko pesü nongu küzüve no atuthu nongu lolo sütsüni, eno nongu ye xüluve nani, eno Ni ye Ampeu kepi nongu no ithi nani.”

7Ikehu azah I tsüke toi I no tungkuptsa pi. I no tungkuptsa pi kelaye asütsa lakhi ighi, julo, qüqüshi keu ghügha lakhi ighi, eno asaghiqo no xukümtsa luve no aghi no aghi lo kime luve. 8I no ju akelaye anhü no tipaqo shou ikuve, apiti no tipaqo shou ikuve eno ayiko no tipaqo küzüluve. Ikemu atuthu ye tipaqo lolo kühae. 9Tileno Pa no I vilo pi, “Atuthu vilo tungkuptsa pilo; tungkuptsa pilo, timi nu, eno atuthu vilo pilo, Ampeu Alhou no ishi piani: O atuthu, amülhü la bidi lono ighi lo, eno ghiqhi püakemi hipaqo shou shepuku lo tishino hipaqo pelo xülu pelo.” 10Ikehu Pa no azah I tsüke toi I no tungkuptsa pi kelaye atuthu no panoqo lolo iloghive, eno tipaqo ye xüluve no puthughove, ti ye aqokitikhi kütsasa ke.

11Tileno Pa no I vilo pi, “Timi nu, asaghi hipaqo ye kümtsü Israel kibolomi ke. Julo, panongu no pi, ‘Ningu saghi ye qhaivae, eno ningu küpkhü ye kühavae; ningu ye mtsüqheino kütsavae.’ 12Tighenguno tungkuptsa panoqo vilo pilo, Ampeu Alhou no ishi piani: Julo, O Iw timiqo, I no nongu kumoki lhapheni eno nongu saipeghini. I no Israel yeghi lo nongu sailoni. 13Kughou I no nongu kumoki lhaphe, eno akumoki lono nongu saipeghini keno O Iw timiqo, nongu no Ni ye Ampeu kepi ithi nani. 14Eno I no I Ghungu nongu shou lepuku nani, nongu ye xüluve nani, eno I no nongu yeghi lo nongu qhinani. Tileno nongu no Ni ye Ampeu kepi ithi nani; I no piqhivae, eno I no tipau shi nani ipi Ampeu no asheshu.”

I no Pano Lhou; Pano no Iw Timi

15 Ampeu tsa I lau ighi: 16“Timi nu, asüta lakhi ikhipe tipau shou yepukulo, ‘Judah eno pa sasü kütshükime akeu Israelmi ghenguno’; tishino asüta kütau ikhipe tipau shou yepukulo, ‘Joseph (Ephraim süta) eno Israel kibolomi pa sasü kütshükime akemi kümtsü ghenguno.’ 17Eno tiküma lakhino lakhi lo kime küqhape asüta lakhi shivelo, tishianguno tiküma ye o u lo lakhi shive penie. 18Kughou ow timiqo no o vilo, ‘Hipaqo ye kiu keno no ye ningu vilo pimoni keshea?’ ipi aye 19panoqo vilo pilo, Ampeu Alhou no ishi piani: Julo, Ni ye Joseph süta (ti ye Ephraim u lo ani) eno Israel shiayeqo pa sasü kütshükime akemi ikhiluni ye shivae. I no tipau pesü Judah süta gholo kimeve nani, eno tiküma ye lakhi shive nani, tishianguno tiküma ye lakhishi I u lo ngove nani. 20Kughou nono yepuku püakeu süta küma panoqo nhethe lono o u lo pesü ngoni keno, 21tileno panoqo vilo pilo, Ampeu Alhou no ishi piani: Julo, shiye khuno gholo Israelmi no wuve keno tipaqo gholono I no panongu saluve nani, eno aqha kümtsü lono panoqo hekütsü sasü pano yeghi lo ighive nani. 22I no Israel naghutoqo lo, pano yeghi lo panoqo pesü shiye lakhi shive tsü nani. Akükau lakhi no panoqo kümtsü kükau shinani, eno panongu ye shiye kini momu kükaqha kijetha pesü kini shimove nani. 23Panongu ye pano julhoqo eno aphikümqhüpu thimeqo momu pano kipimi pesü pano shikitiqe move nani. Ikemu panongu no athiu idewove keu xine lono I no panoqo xalu nani, eno shikimtheve nani; panongu no Iw timi shive nani eno I no pano Lhou shive nani.

24“I qeu David no panoqo shou akükau shinani, panongu kümtsü ghenguno ambekheu lakhi anani. Panongu ye Iw pimheyeqo pape nani eno I yezahqo gholuni ke kutokupui nani. 25I no I qeu Jacob tsükeu yeghi, khile nongu puasüqo no xüche keno nongu no tile küghüna nani. Panongu eno pano tianuli ngo atilimi no tilehi alholo küghüna acheuve nani, eno I qeu David no alholo panow kükapuu shive nani. 26I no panoqo sasü külakishi puloshoqhi shi nani. Ti ye panoqo sasü shekhaha puloshoqhi shikeu ke. I no pano yeghi lo panoqo qhino kughukotsü nani, eno alholo panoqo gholo I kimthe-a qhinani. 27I kungo-a ye panoqo gholo anani, I no pano Lhou shinani, eno panongu no Iw timi shinani. 28Kughou panoqo gholo I kimthe-a alholo auveni keno, tileno shiyeqo no Ni ye Ampeu, Israel shikimthe kütsüu kepi ithi nani.”

Currently Selected:

EZEKIEL 37: SUMRVBSI

Highlight

Copy