EZEKIEL 26

Tyre shou Tungkuptsa

1Atsala atüghüu, aqhi atüghüu, ampe chighiaqhaqhiu lo Ampeu tsa I lau ighi: 2“Timi nu, Tyre no Jerusalem vilo, ‘Aha, timiqow khagho ye kubovae; tipau ye I lau khaqhi püani. Itehi li ye kütsape ani keke niu no chhitoilu niae,’ ipike ghenguno, 3Ampeu Alhou no ishi piani: Julo, O Tyre, I no o mjochile ani, azüghi no azü fukucho süghi ketoi, I no shiye kutomo o shou süghi nani. 4Panongu no Tyre tupikiye kütsave nani eno li qogheqo kuboleve tsü nani, I no li yeghi muxulepe atuqu kümsa shivetsü nani. 5Li ye azüghi mta lo akhameqo vesü kepu-a shive nani, kughengu I no piqhivae ipi Ampeu Alhou no asheshu. Li ye shiyeqo no xulepuwuve kepu shive tsü nani, 6eno li ngaqo ye aphughi mta lono azütakikihi pesü ghiqhive nani. Tileno panongu no Ni ye Ampeu kepi ithi nani.

7“Kughengu Ampeu Alhou no ishi piani: Julo, I no Tyre lachileni ke ahuu no Babylon kükau Nebuchadnezzar, kükamiqo akükau, khurshi ngo khurkuluqo eno khurshimi ngo ghüshimi kutomo aqokitikhi saighi nani. 8Pa no azütakikihi pesü aphughi mta lono nongu ngaqo ghiqhive nani. Pa no o lenike khasüni keu tupikiye kuto nani eno amoqhe puku nani, eno azüto kumtoqo pesü o mjochile nani. 9Pa no o tupikiye shoxü ilokepu sübolu peighi nani, eno pa müghü pesü o qogheqo loqhive tsü nani. 10Paw khurshiqo ye kütsasa kehu tipaqo mqhu no nongu küzüpho luve nani. Kughou timiqo no atupi hephove no pa no ow khagho lo iloghini keno, khurshimi, mishikulu, eno khurkuluqo ghügha no o atupikiye ithauve nani. 11Paw khurshi pukhuqo pesü pa no o laghi qoqhi nani. Pa no azütakikihi pesü ow timiqo ghiqhi nani, eno o kumto tsükuchoqo ye ayeghi lo ikiqive nani. 12Panongu no o küakini xülepe wuve nani eno ow lhidi nhemgha xupuwuve nani. Panongu no o tupikiye kuboleve tsü nani eno o lokughunopu ki kütsave tsü nani. Ow atu, asüpa eno ayeghi ye panongu no azü lo vesüve tsü nani. 13I no o lekungo kishekhave tsü nani, eno o kighilebo ghügha ye chilu kithe move nani. 14I no o pesü atuqu lakhi shive tsü nani. No ye akhameqo vesü kepu-a shive nani. No ye khilemu shiqhe puku moae, kughengu Ni ye Ampeu ke; I no piqhivae, ipi Ampeu Alhou no asheshu.

15“Ampeu Alhou no Tyre vilo ishi piani: Nono ikiqi keu ghügha mtsa izape akemi no aküsü ghügha igha, eno nongu dolo ghiqhi keu huno azüghimkü lo akeqo ye thüthüshi moni keshea? 16Tileno azüghimkü lo kükapumi kümtsü no pano kükalakhü lono iqighive no chijeboike phi ngo aye shisükeu phimini xaqhive nani. Msaighü keu no panongu kuuphi shi pepu nani; panongu no ayeghi lo iqave no atüqhüdo kümtsü khokhoshi nani eno nongu jupe akichiqhi nani. 17Panongu no nongu shou akumlo le phe nani eno nongu vilo pi nani,

“‘Nongu azüghi mkülo küami,

nongu ye kishi pühave akea,

O ajekipi mishighüna,

no ye azüghi lo akumtou;

li eno li ghakütsami no tile

akemi shithüghüi cheke!

18Ow vekiqhi tsalani azüghimkü

lo küami ye khokho shivae,

eno no pühave keu lo azüghimkü

qha ye apuchopungovae.’

19“Kughengu Ampeu Alhou no ishi piani: Kughou I no o pesü pighive keu, timi küghünamo keu mishighüna toi shive tsüni keno, kughou I no azüghi pesü o shou puku no azü kije pesü o küzü luveni keno, 20tileno I no o pesü khaghi no akuthoku#26:20 Momu akumo lo ilove keqo gholo puwuve nani, eno ayeghi qhou#26:20 Momu kithimi yeghi khaghi no kütsave keqo gholo o pelo küghünape nani; tishikeu lono o ghakhu ye küghüna kithepe moveni; ikemu I no küxümi yeghi lo jukivi kutope qhitsü nani. 21I no o pesü akümsapu shi kishekhave tsü nani, eno no ye kühave nani. O phuighi anamu no ye khilemu ithulu kithe move nani ipi Ampeu Alhou no asheshu.”

Currently Selected:

EZEKIEL 26: SUMRVBSI

Highlight

Copy