EZEKIEL 19
19
Israel Kükapumi ghenguno Akumlo
1No ye Israel kükapumi ghenguno akumlo shilo, 2eno pilo:
O za ye kiu kea? Abongshuuqu!
Abongshuuqo dolo li no ipuu;
abongshuu lhotheqo gholo
li no atiqo saputhu ke.
3Eno li no li tiqo dolo lakhi
saputhu; pa ye abongshuu
lhothe shi ipeghive, eno pa no ashi hanikeu shika luve;
pa no timiqo tsüqhive ke.
4Shiyeqo no pa ghili chiluve;
pa ye panongu qo lono küghaluve,
eno panongu no ayikuho pesü
Egypt yeghi lo pa fusaghive.
5Kughou li no adou lono ngokhe
akeu eno liw lajupu kühave keu
ithive keno, li no atiqo dolo lakhiu
saluve no pa pesü abongshuu lhothe lakhi shivepe.
6Pa no abongshuuqo gholo
itsüwu, eno abongshuu lhothe
shi ipeghive, pa ye ashiha shika
luve, eno timi tsüqhi pithive,
7pa no chimemi kügha luve.
Pano phughiqo kütsave tsü
kehu pa ghügha chilu kelo ayeghi
eno tile akemiqo ye thüghüive.
8Tileno shiyeqo no akuaqha ako
kümtsü lono pa lachile ipeghive;
pano khame sükhope pa shou qhi;
eno aqo lono pa küghaluve.
9Ayikuho pesü akughu lo vesüve
eno Babylon kükau lau saighi;
pa pesü akughu shive, tishikeu
lono Israel naghutoqo lo pa sütsa
chilu pemoni ye shive.
10O za ye atsailu lo azü phivilo
atsaibo toie, azü kupukuno shi
akeu lono axathi kutomo pithi eno
alokaqo no chhitoi ke.
11Tipau loka mtotoi keu no
yepemi kükaküsü shive;
tino aghasa dolono chuqumghai
thuikughi; aloka tubolei
ipeghi keu no qhemghai ithulue.
12Ikemu axukighide lono atsaibo
pigheve, eno ayeghi lo veqhive;
kipela mülhü no tipa xathi
fukighichive tsü; tipaqo ye
ighive no thizümüive. Abo
kumtoqo ye ami no pitive.
13Tipau ye asayeqha lo qhai
ghoike-a lo shosüpe qhivae.
14Eno ami no tipa bo lo akhuni
lono ipeghi no axathi pitivae,
ikehu abo mtotoi keu kühavae,
kükaküsü küsü kühavae.
Hi ye akumlo le lakhi eno akumlo shivae.
Currently Selected:
EZEKIEL 19: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
