DANIEL 8

Ambetsü eno Anetsü Kungunhetsü

1Akükau Belshazzar yepe mpe aküthüu lo kungunhetsü lakhi atüghü lo I piyeve kethiu, itaghi ni, Daniel lau ipeghi piye. 2I no kungunhetsü lono ithulu; kughou I no ju keno, ni ye Susa lo aliwo, khikhi Elam ghakhu lo ani keno, tile ngoae. Eno I no kungunhetsü lono ithulu ke ni ye Ulai züla lo ngoae. 3I no I nhethi tsüpuku no ithulu, julo, ambetsü lakhi azüla mkülo puthugho ae. Tipau ye akibo kini ae, eno akibo kinikujo qhemghai, ikemu lakhi no lakhiu nguno qhemghai, eno qhemghai keu no ashekhau shi ipeghi. 4Ambetsü ye kulolau, ahuu eno apeu pohu powo aghi keu I no ithulu. Kiu tüghashi mu pa zülo puthugho lumo, eno pa küka launo xaphe luni kemi khumu kühae. Pa no kümsü pulo aketoi shi kije shive.

5I no kümsükuto akelo, julo, anetsü lakhi ayeghi lo nepuku mono kulolau no ayeghiqha kümtsü kathasü ighi. Ane hu ye mtsüqhei akibo lakhi pa nhethi küma mta lo ae. 6Pa no ambetsü akibo kini akeu, khikhi azüla mkülo puthugho aghi keu I no ithulu püa keno tipau lau aloghu kumto lono posü ighi. 7Pa no ambetsü kupunu ighi keu I no ithulu, pa no axuide ambetsü heqhi eno pa kibo kini hechheve tsü. Ambetsü ye pa zülo puthughoni keu küka kühave, eno ane no ayeghi lo pa shodaqhi eno qodaqhi. Khunomu ane küka lono ambetsü xaphe luni keu kühave. 8Tishino anetsü ye shishe kije shive, ikemu pa no akumto shi ake lono akibo akijeu ye icheve, eno tipau züqhulo akibo bidi ichushei atsütsü mülhü bidi süvela küdau ipeghive.

9Tipaqo dolo akibo aghulo lakhi ipeghi, tipau ye apeu küdau, kipela eno ajuküvü yeghi küdau shishe kije shi thuipeghive. 10Tino atsütsü lo aqokitikhi kutolo kije shi ipeghive. Aqokitikhi dolo eno ayepuqo dolo hami ye ayeghi lo vepiqive eno panoqo qodaqhi. 11Akibo no aqokitikhi gholo Kükapuu toi kije shive. Eno tsalakipe kipti kümllagho Pa launo pewuve, eno Pa kimthe-a kütsave tsü. 12Axine ghenguno aqokitikhi pesü tsalakipe kipti kümllagho gholono akibo tsüve nani, eno pa no kuchou pesü ayeghi lo veqhive nani, pa no akümla shino kinikülü shive nani. 13Tithiu akimtheu no atsa pikeu I no chilu, eno akimtheu lakhiu no I pütsa akeu vilo pi, “Kungunhetsü lono ithulu keu tsalakipe kipti kümllagho, axine no küghüküghaleive tsükeu, eno apukhu no qodaqhi peniye akimthe-a ngo aqokitikhi ikhiphe tsükeu ye ado khitohi ghenguno kea?” 14Pa no I vilo pi, “Inaqhe avela 2,300 ghenguno ke. Tithiu no akimthe-a ye tipau chipiu-a lo athoputho tsü nani.”

Kungunhetsü Hekupho

15Ni, Daniel, no kungunhetsü ithuluve kethiu, I no tipau vethaluni ke phujue. Julo, timi koghe toike lakhi I zülo puthugho aghi. 16Eno Ulai zümkü lono timi lakhi sütsa I no chilu, tipau no pi, “Gabriel, timi hipau pelo kungunhetsü vethalu pelo.” 17Ikehu pa no I no khile puthugho akeno tile ighi. Kughou pa no ighi keno, ni ye msave eno I gi pishiqho luve. Ikemu pa no I vilo pi, “O timi nu, kungunhetsü hu ye ashekha ghuloki ghenguno kepi vethalulo.”

18Pa no I pütsave kethiu, ni ye I gi ayeghi lo dape zücheive. Ikemu pa no I buno I pelo puthughope. 19Pa no pi, “Julo, axukighide ashekha lo kiu shive nani keno I no o pelo ithi peni, hipau ye ashekha do kughu püakeu kimji ghenguno ke. 20Ambetsü akibo kini akeu nono ithulu keu ye Media ngo Persia kükau pama. 21Eno ane hu ye Greece kükau. Pa nhethi dolo akibo kije akeu ye akükau atüghüu ke. 22Akibo icheve keu-a lono akibo kütau bidi ipeghive keu ye, paw shiye dolono kükaqha bidi ipeghive nani, ikemu pa küka qhemi kumo nani. 23Panoqo kükaqha kishekhani kelau kughou axinemi no axine shi aghaqiveni keno, kükami lakhi agi khümkhülai keu, khuu aholeqo vethalu cheni keno, pa no ithughi nani. 24Pa küka ye kije shi nani—ikemu pa kumto lono kumoe; pa no akümsapu kütsakungo süghipe nani eno pa no kiu shini keno tolu nani, eno akumtomi ngo akimthemi kütsa nani. 25Pa mqükini vecheo pa no pishikiqhi pesü pa u qholono kinikülü shipe nani, eno pa kükümsü lono pa ye kije shinani. Pa no ghutu mono kutomo kütsa nani. Eno kükapumi shou Kükapuu lau ghi pa no mjochile ithughi nani, pa ye kuboleve nani—ikemu timi u lono kumo nani. 26Avela ngo inaqhe kungunhetsü piqhive keu hu ye kuchoue, ikemu ti ye mekhape qhivelo, kughengu tipau vehu ye ado kushuo chephike.”

27Eno ni, Daniel, ye atsala hami süve no ihozüve. Tithiu ni ye ithughive no akükau kümlapu lo wuve, ikemu ni ye kungunhetsü ghenguno aveghüzü shino tipau vethamlave.

Currently Selected:

DANIEL 8: SUMRVBSI

Highlight

Copy