DANIEL 7
7
Tüghashi Bidi Kungunhetsü
1Babylon kükau Belshazzar yepe mpe atüghüu lo, Daniel no pa lüpa lo ihozü akelo asamo eno kungunhetsü ithulu. Tithiu pa no asamo yepe qhive eno asamo akhoto vehu huye pivetsü. 2Daniel no asheshu, “Putho lo Iw kungunhetsü lono I no ithulu, julo, atsütsü mülhü bidi no azüghi kije fukucho aghi. 3Eno azüghi lono tüghashi bidi ipeghi, ti ye lakhino lakhi launo kütütae. 4Atüghüu no abongshuu toi eno alhuqu chishibo puae. Tithiu I no ju keloye tipau chishibo tujo phevetsü, tipau ye ayeghi lono sünheqheve eno timi toi apukhu kini no puthughope, eno timi kükümsü pesü tipau lolo süvetsü. 5Julo, tüghashi akiniu, ava toie. Tipau ye a-a lakhi lono sünheqhe. Tipau ye akuchughi küthü pa kichi lo ahu dolo ae; eno tipau vilo pi, ‘Ithulo, aghakiqishi ashi chulo.’ 6Hipa thiu I no ju keloye angshuu amikhiu#7:6 Momu akhighiu ngushuu toi aghau chishibo bidi pa thiu xapu aghi. Tüghashi huye akütsü bidi ae, eno ayekipe küka tipau tsüve. 7Hipa thiu putho lo I no kungunhetsü ithulu, eno julo, tüghashi abidiu, akümsapu, aküighüpu eno shishe akumto. Tipau ye ayi no shikeu ahu kije xapuae; tipau no tsüchuve no kubopinyive tsü eno kiu achili aghi keno tipau pukhu no qodave tsü. Tipau ye pa züu tüghashi kütauqo nguno paküta, tipau ye akibo chighi ae. 8I no akibo ju akeloye tipaqo dolono itaghi akibo kitila aghulo lakhi ipeghi, tipau züu akibo küthü ye akuhu-aghü lono tujopheve tsü. Eno julo, timi nhethi toi akibo hipau lo anhethi ae, eno akichi ghi ae, tino shishe aqheküza tsa piae.
Alholo Achekeu Yepe
9“I no ju akeloye,
kükalakhüqo kutope qhi,
eno alholo lo achekeu no Pa lakhü ikhiluve;
Pa phimini ye mürasü toi metsüghoi,
eno Pa kütsü lo asa ye amhiyeho akiviu toi;
Pa kükalakhü ye ami mili iqü aketoi;
tipau kuluho no amiküqü ke.
10Ami ghokiti lakhi no
Pa zülono qoipeghi ae;
qhethonhe qhethonhe no pa qe,
eno qhethonhe chighi no ghuthu qhethonhe chighi no Pa zülo puthugho;
xakütha ghenguno küghaki kutove,
eno kakuqo lhapheve.
11“Akibo no atsa pi akeu sütsa kije ghenguno I no ju kelo tüghashi hu ye ghiqhive, tipa phimpi ye kütsave no ami lono pitive penike tsüve. 12Tüghashi kütauqo yekipeqha hu ye süwuve tsü, ikemu panoqo küxü ye atusho eno ado lakhi ghenguno püxüve tsü.
Ayekipeqha pesü Timi Nu tsü
13“Putho lono I no kungunhetsü ithulue,
eno julo, timi nu toike lakhi,
atsütsü lo khüngküsü lono ighi,
Pa no Alholo Achekeu lau ighi
eno Pa zülo ngoluve.
14Ayekipeqha, ajuküvü,
eno kükaqha pesü Pa tsüve,
tishino ashiaye, shiye eno atsa
jeli kümtsü no Pa huthu nani;
Pa yekipeqha ye alholo
achekeu, ti ye kühave monani,
eno Pa kükaqha ye
kütsave monani.
Daniel Samo Hephopiye
15“Ni, Daniel ye, I lolo I ghungu no kütakihi ae, eno kungunhetsü hu no I shithüghüive. 16Tilehi puthugho akeqo dolo milakhi lau I no wuno hipa vehulo kuchou akeu pa vilo iniju. Ikehu pa no I vilo pi eno hekupho vehu I pelo ithilu pe. 17‘Tüghashi kije bidi ye kükami bidi khunoqo ayeghi lo ipeghi niye ani keno pano bidi ke. 18Ikemu Shishe Akiqheuw akimthemi no kükaqha ikhiluve no alhokupuju, alholo eno pülhapuju kükaqha pe acheuve nani.’
19“Tithiu tüghashi abidiu, khikhi kütauqo toimo no shishe akümsapu, ayi hu xapu, alazayi mütsü xapusü tsüqhi, mukhumuno shi kubove tsüno achili aghikeu ye apukhu no qodave ishi akeno, ni ye tipau vehu ithinishi ae, 20eno tipau kütsü lo akibo chighi xapu akeu ngo akibo kütau ipeghi kelo tipau zülo akibo küthü akeu no ikiqive keu, akibo khipau lo anhethi akeno eno akichi lono aqheküza tsa pi akeno, tipau ye pa lojimi nguno akijeu shi ithulu akehu tüghashi tipau ghili I no ithiveni shi ae. 21I no ju akeloye akibo hipau no akimthemi sasü aghüshi eno panoqo shou toluve, 22ti ye Alholo Achekeu no ighi no Shishe Akiqheuw akimthemi ghenguno xakütha tsü eno akimthemi no kükaqha qhasülu moke kutolo ke.
23“Ikehu pa no pi: ‘Tüghashi abidiu ghenguno,
kükaqha abidiu ayeghi lo ighi nani,
ti ye kükaqha kümtsü nguno paküta nani,
tino ayeghiqha kümtsü munove nani, eno pa pukhu no
qodape mukhumuno shi kubovetsü nani.
24Akibo chighi ghengu ye,
kükaqha hipau lono kükami chighi ipeghive nani,
eno kütau lakhi no panoqo shelo ipeghi nani;
pa ye azüumi nguno paküta nani,
kükami küthü ikhiqhive nani.
25Pa no Shishe Akiqheu lachile keu tsa pi nani,
eno Shishe Akiqheuw akimthemi ghimeqhi nani,
ado ngo ayezah kiliveni keu kughu nani;
eno panoqo ye atüqhüdo, atüqhüdoqo eno atüqhüdo tüxa#7:25 Momu ampe küthü tüxa
ghenguno pa u lo süvetsü nani.
26Ikemu xakütha ghenguno küghaki ye kutope anani,
eno ashekha loye qhoi pühave eno kütsaveni ke ghenguno
pa yekipeqha ikhi süwuve nani.
27Kükaqha ngo ayekipeqha
eno atsütsü qholo kükaqhaqo kughushu ye Shishe
Akiqheuw akimthemi shiayeqo tsüve nani;
pa kükaqha ye lhokta kükaqha shi nani, eno ayekipeqha
kümtsü no pa qe eno gholu nani.’
28“Hi no avehu kishekhave ani. Ni, Daniel ghengu ye, I kükümsü no ighono I shithüghüive eno I ju ye kilive, ikemu I no hipa vehu I mlo lo qhiluve.”
Currently Selected:
DANIEL 7: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
