DANIEL 12

Ashekha Ghuloki

1“Tipa ghuloki lo kükapuu akijeu Michael, khuu ow timiqo shou jukükütsüu keno, pa no ithughi nani. Tile shiye lhosü kelono ishi kutolo khilemu shimphi keu küküpna do lakhi anani. Ikemu tipa ghuloki lo ow timi, khunoqo je kaku lo ye püaghini keno panongu ye xaphe luve nani. 2Eno ayeghimkhu lo zü akemi kutomo ithughive nani, khami ye lhokta küxü lo eno khami ye akukujo ngo shekhaha küthakügha lo auve nani. 3Khunono alokütsümi keno panongu ye atsütsü lo aqhi küvü toi vü nani; eno khunono timi kutomo pelo amikucho lo tsüghü ighilupe cheni keno panongu ye alholo eno pülhapuju ayepuqo toi vü nani. 4Ikemu no, Daniel ye ashekha ghuloki ighi moke kutolo atsa hu kütsüpe qhivelo eno kaku mekhape qhivelo. Kutomo no huju woju nani, eno akighithi ikoishe wove nani.”

5Tithiu ni, Daniel no ithulu, julo, mikini puthugho aghi, lakhi no aghokiti hi kukuu eno lakhiu no hu kukuu aghie. 6Eno kütami lakhi no milakhi aphi kümtsha pepusü aghoki zü shou akeu vilo pi, “Akümzapu hipaqo kishekhani keu ye ado khitohi lunani kea?” 7Aphi kümtsha pepu akeu, khuu aghoki zü shou akeno, pa no pi keu I no chilue; pa no atsütsü küdau pa u ajeu eno piyiu peqheno pülhapuju xü achekeu jelono ashoqhi shie, hipau ye atüqhüdo lakhi, atüqhüdoqo, eno atüqhüdo tüxa#12:7 Momu ampe küthü tüxa ghenguno ke, eno kughou akimthe timiqo küka hepho taveni keno, thime hipaqo kümtsü ashekha shive nani. 8I no chiluve, ikemu ni ye vethamlave. Tileno I no pi, “O I mpeu, thime hipaqo ye kishi ashekha shive nani kea?” 9Pa no pi, “O la lo wuvelo, Daniel, kughengu ashekha do ighi moke kutolo atsa huye khathave eno mekhape qhivae. 10Kutomo no pano ampi shikimtheve no metsüghoi luve eno thakimthe luve nani, ikemu kixikilami ye kixikila shi anani. Eno kixikilami khunomu vethalumo nani, ikemu khunono alokütsümi keno panongu no vethalu nani. 11Tsalakipe kümllagho ikhipe wuve kelono aphikümqhüpu julho no küghüküghaleive tsüni keu kutolo atsala 1,290 anani. 12Khuu no kheakulu shi atsala 1,335 toluni keno akümghapue. 13Ikemu ashekha kutolo o la lo chechelo. Eno no ye akulhoqhilu nani eno ashekha tsala lo o ghenguno kuto püakeu-a lo puthugholu nani.”

Currently Selected:

DANIEL 12: SUMRVBSI

Highlight

Copy