DANIEL 10

Danielw Kümsapu Kungunhetsü

1Akükau Cyrus mpe aküthüu lo Daniel, khuu Belteshazzar ipi kuvetsü keno, pa lau atsa lakhi piyesü. Atsa huye kuchou, eno tipau ye aküküpna kije vehuke. Pa ye atsa vethaluve eno kungunhetsü vethakulu ghi ae.

2Tipa ghuloki lo ni, Daniel ye apinedo küthü mloae. 3Ni ye achuqupu kivi chumo, ashi momu atsaiji I kichi lo sümo, momu ni ye apinedo küthü kupuju I phiau nukümtsha moe. 4Aqhi atüghüu atsala muku abidiu lo, I no aghoki (ti ye, Tigris hu ke) kije mkülo puthugho akelo, 5I no I nhethi tsüpuku ju keloye julo, timi lakhi aphi kümtsha pepusü aghi, pa ye Uphaz lo ameshoyi akiviu no shikeu pokha no pa chita khapu ae. 6Pa phiau ye beryl tu toi, pa gi ye tsütsüpha küvü toi, pa nhethi no akulu miküqü toi, pa u mlo ngo apukhu no alazayi thakimtheve keu toi, eno pa tsa no aqokitikhi ghügha toike. 7Ni, Daniel, likhi no kungunhetsü ithulu, kughengu I gholo akeqo ye kungunhetsü ithulumo kemu shithüghüi keu kije panoqo shou ikughive, eno panongu ye itshü luve niye pokhave. 8Tighenguno ni ye I likhive eno kungunhetsü kije hi ithulu, eno I lolo aküka kühave. I gi küvü ye akümsapu shi kilive, eno ni ye aküka kühave. 9Tithiu I no pa sütsa chilu kelo ni ye agi no ayeghi lo pishiqhope zücheive.

10Eno julo, au lakhi no I bu, eno I pukhu ngo I khonhe no khokho shive. 11Pa no I vilo pi, “O Daniel, shishe kimiye chekeu, I no o pütsa akeu tsa vethalulo, müzüchoi puthugho lo, kughengu itehi o lau I puwu ani.” Kughou pa no hipa tsa I vilo pi keno, ni ye msakhokhoshi puthughove. 12Tileno pa no I vilo pi, “Msa kevilo, Daniel, kughengu nono o mlo tsüqhiyi vethaluni ye pükapütsa keu eno o Lhou zülo aqhokighe shi ighikeu tsala hukuthu lono o tsa chiluve tsüae, eno ni ye o tsa ghenguno ighi anie. 13Persia kükaqha kükapuu no atsala muku lakhi I lakhape ngove, ikemu Michael, kükapumi gholo atou no I kuphuni ye ighi, kughengu ni ye tilau Persia kükamiqo gholo qhiveke, 14eno ighini keu tsala lo ow timiqo lau kiu shiniye ani keno o pelo vethalu peniye ighi ani. Kughengu kungunhetsü ye ighini keu tsala ghenguno ke.”

15Kughou pa no hipau kiqi lono I pütsave keno, ni ye ayeghi lo I gi pishiqho luve no inaqhoi ngove. 16Eno julo, timi nuliqo jukimihi lakhi no I mütsü butsü. Tile I no I kichi xükho no pi. I no khuu I zülo puthugho akeno pa vilo pi, “O I mpeu, kungunhetsü kiqi ghenguno aghime I shou ikughivae, eno ni ye aküka kühavae. 17I mpeu qeu ye kishi I mpeu pütsani kea? Kughengu itehi I lolo aküka kühavae, eno I lolo atuthu kühavae.”

18Itaghi timi ju kimihi lakhi no I buno I shikumtove. 19Pa no pi, “O shishe kimiyekicheu timi, msa kevilo, aloino keu o lolo alo; akumto shilo eno amlo loghilo.” Eno pa no I pütsa akelo ni ye akumto shikithe luve no pi, “I mpeu no pijulo, kughengu nono I shikumtovae.” 20Tileno pa no pi, “Ni ye kushiye o lau ighive akeno no ye ithi anima? Ikemu itehi Persia kükapuu sasü kichighini ke ni ye idewove niae; eno kughou I no wuveni keno, julo, Greece kükapuu ighi nani. 21Ikemu kuchou kaku lo kiu yepüani keno I no o vilo pini: Michael, ow kükapuu likhino kumo aye hipaqo gholo I kuphuni kemi lakhimu kühae.”

Currently Selected:

DANIEL 10: SUMRVBSI

Highlight

Copy