AMOS 2
2
1 Ampeu no ishi piani,
“Moab xine küthü ghenguno,
eno bidi ghenguno, Ni ye aghime süchilemo nani;
kughengu pa no Edom kükau
saghi ayevu shi pitivetsü.
2Ikehu I no Moab shou ami puwuni,
eno tino Keriothw sükusho-aqo pitileve tsü nani,
eno Moab ye mbumghu akelono,
aghükishi eno afuko ghügha igha akelono thive nani;
3I no pa launo yepeu ikhivetsü,
eno paw kükapumi kümtsü pa gholono pithive nani,”
ipi Ampeu no piani.
Judah shou Küghakütha
4 Ampeu no ishi piani,
“Judah xine küthü ghenguno
eno bidi ghenguno, Ni ye aghime süchilemo nani,
kughengu panongu no Ampeu yezah milivae,
eno akhuayeqo pemovae,
pano kimki no pano sabidevae,
pano puasüqo no cheche keu laghi panongu no pape wuvae.
5Tighenguno I no Judah shou ami puwuni
eno tino Jerusalem sükusho-aqo pitileve tsü nani.”
Israel shou Küghakütha
6 Ampeu no ishi piani,
“Israel xine küthü ghenguno
eno bidi ghenguno, Ni ye aghime süchilemo nani;
kughengu pano no ghükayi ghenguno amikuchomi jechuve,
eno apukhuqho ghenguno kumlhomi jechuve.
7Panongu no ayeghimkhu lono kumlhomi kütsü qoda
eno iju akemi la tutsüghüve tsü;
anu ngo apu pama gha aqelimi lakhi
sazü no I je kimthe shikitiqe ke;
8nalu keu theli lo aphimini qhipüa keqo panongu no
pesü akümlla-a lono qhazü,
pano Lhou ki lono asüchuve
kemi tsaiji pewo sho acheni.
9“Ikeghi panoqo zülono Amorimi kütsave keu ye I no ke,
panongu ye akiqhelau Cedarbo toi chuqumghai
eno aphisü toi choshiyike;
kunguu no pa xathi eno aqhou no
pa kuhu aghü I no kütsave tsü.
10Egypt yeghi lono nongu saipeghi keu hughi I noe
eno Amorimi yeghi pesü tsüniye ampe lhobidi
asayeqha lo nongu sacheke.
11Nongu nuli khami tungkupu shi peniye I no saputhu,
eno apumi khami no Nazirmi shi peniye saputhuke.
Tishike kumo, O Israelmi?”
ipi Ampeu no shuphe.
12“Ikemu nongu no Nazirmi pelo atsaiji shope
eno tungkupmi vilo, ‘Nongu ye
tungkuptsa pimla’ ipi azah tsü.
13“Julo, mishikulu no athi xapu ayeghi nedasü ketoi I no
nongu-a lono titoi nedasü nani.
14Akümthümi no pomlave nani,
akumtomi no pa küka kühave
eno aghütomiu ghi pa küxü xamlave nani;
15shexilika kipeu ghi puthugho mlave nani,
eno apukhu kümthüu ghi pa ampi xamla nani,
tike kumono khurshi sakicheu ghi pa küxü xamla nani;
16aghütomi dolo khuu no amlo kumtou keno tipa tsala
loye aphi kümsa pove nani,”
ipi Ampeu no shuphe ani.
Currently Selected:
AMOS 2: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
