AMOS 1
1
1Ayeghi küghütha züu ampe kini akelo Uzziah no Judah kükau shi eno Joash nu Jeroboam no Israel kükau shi ake ghuloki lono Amos, khuu Tekoa lo ambekhemi lakhi keno, pa no Israel ghenguno ithulu keu tsape.
Israel Cheaxümi shou Küghakütha
2Amos no pi:
“Ampeu no Zion lono ighamku
Jerusalem lono Pa sütsa süqhe;
atsüni kümtsha-aqo no mloqa eno
Carmel toghi no ighüyivae.”
3 Ampeu no ishi piani:
“Damascus xine küthü ghenguno,
eno bidi ghenguno, Ni ye aghime süchilemo nani;
kughengu panongu no chisheda keu yikhumu
pesü Gilead chisheqhi ke.
4Tighenguno I no Hazael kibo shou ami puwuni,
tino Ben-hadadw sükusho-aqo pitileve tsüni.
5I no Damascus khagho khadu kubove tsü nani,
eno Aven Khila lono xüküami ikhive nani,
Beth-eden lo kükaküsü pe akeu
eno Syriami ye Kir lo haphe sawuve nani,”
ipi Ampeu no piani.
6 Ampeu no ishi piani:
“Gaza xine küthü ghenguno,
eno bidi ghenguno Ni ye aghime süchilemo nani,
kughengu panongu no timi kümtsü haphe sasü
Edom lo jesüve tsüniye wuve.
7Tighenguno I no Gaza liwo shou ami puwuni,
eno tino liw sükusho-aqo pitileve tsü nani.
8I no Ashdod lo xüküami ngo Ashkelon lo
kükaküsü pe akeu ikhive nani;
I no Ekron shou I u süqhe nani,
eno Philistiami ghükulumi ye pühave nani,”
ipi Ampeu no pivae.
9 Ampeu no ishi piani:
“Tyre xine küthü ghenguno,
eno bidi ghenguno, Ni ye aghime süchilemo nani,
kughengu panoqo no ashiaye kümtsü sawo Edom lo jesuve,
eno athiküzümi puloshoqhi kümsülu move ke.
10Tighenguno I no Tyre liwo shou ami puwuni,
eno tino liw sükusho-aqo pitileve tsü nani.
11 Ampeu no ishi piani:
“Edom xine küthü ghenguno,
eno bidi ghenguno, Ni ye aghime süchilemo nani;
kughengu pa no azütakikihi pesü pa thiküzüu haqhi
eno küpükini piyemoe,
ashekha küha amloide eno pa
loghu pülhapuju xapu ke.
12Tighenguno I no Teman shou ami puwuni,
eno tino Bozrah sükusho-aqo pitileve tsü nani.
13 Ampeu no ishi piani,
“Ammonmi xine küthü ghenguno
eno bidi ghenguno, Ni ye aghime süchilemo nani;
kughengu panongu no Gilead lo mishipu akemi po ghileve tsü,
tishino pano lughi pekho niye ke.
14Tighenguno I no Rabbah liwo shou ami süvetsü nani,
eno tino liw sükusho-aqo pitileve tsü nani,
aghüshi tsala lo toi ighamku nani,
pasapagha lo miyitsü toi nani;
15pano kükau ye paw kükapumi
gholono haphe sawuve nani,”
ipi Ampeu no pivae.
Currently Selected:
AMOS 1: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
