YOHAN 5

Awatsüng Anasa Anebtsüba

1Iba sülen Yihuda nunger benjong ka liasü, aser Yisu Yirusalemi atu. 2Yirusalem nung San süngkhümbong anasa awatsüng ka lir, koba dang Ibri oshi agi Bethzatha#5.2: Bethzatha: Akhi Laishiba kar nung “Bethesda” ta angutsü. ta ajar, idakji semtu pungu liasü. 3Item nungji shirangertem, nükpokertem, tsüngtsükertem, aser yaretbatem jenti tzü arakzüba ata-a mejanga liasü; 4kechiaser Kibuba tenyar ka mapang mapang nung iba awatsüng jagi ai aser tzüji arakzüdaktsü, anungji tzü arakzüdang shiba tamasa idir pa dak keta aliba tashitakji anebadok. 5Yangji küm semer-ti shirangba nisung ka liasü. 6Yisui pa mejanga aliba ngua aser joko pa yamaji talangka aliba meteta pai shirangba dang ashi. “Nai anebnür asü?” 7Shirangba nisung jagi pa dang langzü, “Kibur, kodang tzü nungshidir, idangji awatsüng nung ni anioktsütsü nisung shinga melika, anungji ni oya alidang tangar nisung kü dang tamasa alur”. 8Yisui pa dang ashi, “Noktakang, ne yipten benang aser jaja-ang.” 9Aser idangyongji nisungji aneb aser pa yipten bener jaja.

Panüji amungnü liasü, 10anungji Yihuda nungeri tanepba nisung dangji ashi, “Ya Amungnü lir, na yipten bener senzütsü tim masü.” 11Pai parnok dang langzü “Nisung shibai ni anebtsü, pai kü dang ashi, ‘Ne yipten benang aser jaja-ang.’” 12Parnoki pa dang asüngdang, “Ne yipten benang aser jaja-ang ta ne dang ashiba nisungji shiba?” 13Saka tanepba nisung jagi aji shibar memetet; kechiaser yangji nisung jenti liasü, aser Yisu aenshia oadoker liasü. 14Iba sülen Yisui pa tenla ki nung angu, aser pa dang ashi, “Ajiang, na junga kümogo; tali tamajungba tia ne dak matongtsüsa joko nai temenen tebenshi.” 15Idangji nisungbaji ao aser pa anebdaktsübaji Yisu ta Yihuda nunger dang pai ashi. 16Iba yongji Yihuda nungeri Yisu rishikangshitsü tenzük, kechiaser itemi pai Amungnü nung inyak. 17Anungji Yisui parnok dang langzü, “Kü Bui teti maneni inyaker, aser nia inyaktsüla.” 18Anungji iba yongji Yihuda nungeri pa tepsettsü tali bushi, kechiaser pai Amungnü dang raksa masü, saka pei sasa Tsüngrem den saku küma, Tsüngrem dang pei Tebu ta aja.

Techir Tashi-ain

19Anungji Yisui parnok dang ashi, “Atangji züngpong ni nenok dang shidi, Techiri pa sasa kecha meinyaker; saka Tebui kechi inyakba pai angu, aji dang paia inyaker. 20Kechiaser Tebui Techir meimer aser pai pei sasa inyakba ajak pa dang sayur. Anungji nenoki süngmangtsüsa item mapa dangi tuluba pai pa dang sayutsü. 21Kechiaser Tebui koda tasür shia arudakja parnok taküm kümdaktsür, aji oda Techiria pai mulungbatem taküm kümdaktsür. 22Kechiaser Tebui shinga o mebendanger saka pai Techir nem o bendangba ajak agütsüogo. 23Anungji ajaki Tebu dang akhüm tsübuba ama parnoki Techir dang akhüm tsübutsü. Shibai Techir dang akhüm metsübur, pa tenyaba Tebu dang pai akhüm metsübur. 24Atangji züngpong ni nenok dang shidi, shibaisa kü o angar aser ni tenyaba dak amanger pa teti taküm kar; aser obendang daki marutsü, saka tasüba nungi taküm daki ogo. 25Atangji züngpong ni nenok dang shidi, mapang arudagi, aser aji tang lir; kodang tasürtemi Tsüngrem Chir ola angashitsü aser shiri angashidir parnok taküm alitsü. 26Kechiaser Tebu pei sasa dak koda taküm lir, aji oda pai Techir nem pei sasa dak taküm alitsü agütsüogo. 27Aser pai pa nem o bendangtsü ain agütsü, kechiaser pa Nisung Chir lir. 28Ya asünung tesüngmang, kechiaser mapang arudagi kechi nung leper nung alir ajaki pa ola angashitsü, 29#Dan. 12.2. Aser adoktsü, shiri tajung inyakogo taküm daki shia arutsü, aser shiri tamajung inyakogo, o bendangdaki shia arutsü.

Yisu Dang Kuli Asüba

30“Ni kü tashi agi kecha meinyaktet, saka kü Bui ashiba ama ni o bendanger aser kü obendangbaji ochi lir. Kechiaser ni mulungba ama ni meinyaker saka ni tenyabai mulungba ama ni inyaker. 31Ni pei sasa indang kü kuli agütsüra, kü kuliji ochi masü. 32Tangar kati kü indang kuli agütsür, aser pai kü indang kuli agütsübaji ochi ta ni metet. 33#Yoh. 1.19-27; 3.27-30. Nenoki Yohan dangi yok aser pai ochi atema kuli agütsü 34Saka kechi kuli ni angu aji nisung nungi masü, aji saka nenok kümtettsü asoshi ni o ya ashir. 35Jangrua sangwaba milenji pa liasü aser nenoki kenpiga tesangwa nung pela-a alitsü mulunga liasü. 36Saka kü kuli kechi lir aji Yohan kuli dang nungi tuluba, kechiaser kechi mapa renemtsü Tebui kü nem agütsü aser koba mapatemsa ni inyaker, itemjagi Tebui ni yok ta kü indang kuli agütsür. 37#Mat. 3.17; Mar. 1.11; Luk. 3.22. Tebu, shibai ni yok, pai kü indang kuli agütsüogo. Nenoki kecha südanga pa ola mangashi, mesüra pa tereprangtsü kechi amar mangu 38Pa o nenok dak tenoka mali, kechiaser shiba pai yok pa dak nenoki mamanger. 39Nenoki Laishiba bushir, kechiaser item nungji nenoki teti taküm angutsü ta bilemer aser item Laishibai kü indang kuli agütsür. 40Aji saka nenok taküm angutsü asoshi kü dangi arutsü nenoki memulunger.

41“Ni nisung nungi nüngsang magir. 42Saka nenok dak Tsüngrem temeimji mali ta ni nenok metet. 43Ni kü Bu tenüng nung aru aser nenoki ni magizüker. Tangar kati pei tenüng nung arura, nenoki pa agizüktsü. 44Nenok shiri ka dang aliba Tsüngrem nungi aruba nüngsang mebushir, saka kati ka nungi nüngsang agir, nenoki kechi koda amangtet? 45Tebu madang ni nenok aitsütsü ta tebilem, nenok aitsüba ka lir aji Mosa, shiba dak nenoki nenok teimla yuogo. 46Kechiaser nenoki Mosa dak amang asübo, kü daka amangla, kechiaser pai kü indang zülu. 47Saka pai züluba nenoki mamangra, kü o nenoki kechi koda amangtsü?”

Currently Selected:

YOHAN 5: ANSEBSI

Highlight

Copy