ANITET 1
1
Ijip Nung Israel Nunger Rishikangshiba
1Israel chirtem Ijipi Yakob den arurtem parnok pei pei kibong itemi: 2Reuben, Simeon, Levi, Yihuda, 3Issakar, Zebulun, Benjamin, 4Dan, Naftali, Gad, aser Asher. 5Yakob dak jakzükba parnok ajak agi nisung neter.#1.5: Neter: Laishiba kar nungbo Neter Pungu ta angutsü. TMa. 7.14 ji reprangang. Saka Yosefbo Ijip nung liasü. 6Joko Yosef aser pa tedi nunger iba putu nisung ajak asü. 7Saka Israel chirtemji azükarua aser jenti rena tashi ita aküm aser parnok jagi alinükji asüng.
8Iba tensaji Ijip nung Yosef memetetba chuba tasen ka adok. 9Pai pei nüburtem dang ashi, “Reprangang, Israel purtem asenok dang nungi teimba aser tashi taitba kümogo. 10Tang parnok nütsüng renlokba anema asenoki lenmang kar bushitsüla. Kechiaser rara adokra parnoki asen tsükchir den dener asenok den raratsü; aser asen lima toktsür aotsü.”
11Anungji Ijip nungeri alartem tanüker tokja parnok rishikangshia mapa inyakdaktsü, aser parnoki Farao tsük rizüngdak Pithom aser Ramses yimtitem yanglu. 12Saka parnokji kodaka rishikangshi, patakaji züin, aser linük ajak asüng nung Ijip nungeri Israel nungerji tsübu. 13Anungji Ijip nungeri Israel chirtem dak taochi makai rishikangshitsü tenzük. 14Aser parnok taliba jenjang kanga saka kümdaktsü. Saka parnok dang maochi-i alu mapa tapu tapu inyakdakja, ajongli agi lungru yangludaktsü, aser parnok nem mapa tasak rishikangshia inyakdaktsü.
15Idangji Ijip chubai Ibritsür nuso yarir Shifra aser Pua dang ashi, 16“Kodang nenoki Ibritsürtem nu amungdang yaridir, tanurji jabaso süra tepsetang, saka jala süra laji taküm lidakjang.” 17Saka nuso yarirtem jagi Tsüngrem tsübu nung Ijip chubai ashibaji manga, aser parnoki jabasotem metepset. 18Anungji nuso yarirtemji Ijip chubai jar asüngdang, “Kechiba nenoki yamai inyak aser jabasotemji taküm lidaktsü?”
19Nuso yarirtemi Farao dang langzü, “Ibritsürji Ijiptsür ama masü, parnok kanga tekümdang, aser jeretperar, onok metongjongi parnok sasa bentetadoker alir.” 20Yamaji nuso yarirtem dang Tsüngremi meima benshi, aser nisungtemji tali renloka tashi ita aküm. 21Nuso yarirtemi Tsüngrem tsübu nungji pai parnok kibongtem rendaktsü. 22#TMa. 7.19. Idangji Faraoi nisung ajak nem ozüng ka yamai agütsü, “Ibri nunger jabaso ajak Nile ayong nung ajongokjang, saka jalatembo taküm lidakjang.”
Currently Selected:
ANITET 1: ANSEBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
