RAWMA 2

Khazohpa pachiana siazie

1 # Mat 7.1; Lka 6.37 Chavâta Hy chyhsapa, nâ, mohropa a sei thaipa, rei awpa rai hnei va chi. Mohropa na seina liana tlai khata, nâmasasyh ta thailei nâ pachâsa haw, nâ, seituhpa tlai chhao chi kha, cha hawhpa hmozy a tao tyhpa na châ hrapa vâta. 2Cha hawhpa hmo a tao tyhpazy chô liata Khazohpa pachiana a tlô thlupa cha, a châ awpa tlai na a châ tahpa eima pahno. 3Hy chyhsapa, cha hawhpa hmo a tao tyhpazy a seituhpa y, nâ chhao kha, cha hawhta tao hra tlôh chi ta, Khazohpa pachiana khôkhâh nâ pangiasa ma? 4A châ vei khiah, Khazohpa phana cha rona lâ châ chhi awpa a châpa pahno leipa ta, a phana hluhzie nata a nôphazie nata a palôh pasizie zy cha, hraoleipa hawhta ma na pachâ? 5Na palôh kuhchhana nata ro khoh leina vâta, hiehâhna noh, Khazohpa pachiana siapa â vaw luahna noh châta, nâmasasyh ta hiehâhna nâ pachôpakhy.

6 # Hla 62.12; Bies 24.12 Khazohpa ta chyhsa to ama hmotaopa lymâ hawhta a pachia aw. 7Hmopha tao hualuapa ta, rônahna nata palyupalihna nata thi khao leina a tluatuhpazy hnohta chhâzaw hrona a pie aw. 8Âmo pha nawpa sai tluapa ta, biehmeiseihpa zyh leipa ta, sialeina a zyhtuhpazy chô lia deikua cha, pathiiana nata hiehâhna a y aw. 9Moleina a taopa chyhsa to chô liata rietheipasana nata pachârôhna vaw tlô aw ta, Zu chyhsa chô liata tlô tua aw ta, Krikâh chyhsa chô liata chhao a tlô aw. 10Hmopha a taotuhpa chô liata deikua cha, rônahna nata palyupalihna nata thlalôhna zy vaw tlô aw ta, Zu chyhsa chô liata tlô tua aw ta, Krikâh chyhsa chô liata chhao a tlô aw. 11#Ryhpa 10.17Khazohpa cha khokhei viapa hnei vei.

Khazohpa pachiana nata ryhpa

12Ryhpa hnei leipa ta hmo a paraopazy cha, ryhpa leipa ta leidia aw ei ta; ryhpa hneina chôta hmo a paraopazy cha, ryhpa ta pachiapa ama châ aw. 13Ryhpa bie a theituhpa maihta Khazohpa mohmô ta asiapazy châ hlei leipa ei ta, ryhpa bie a zyhtuhpazy deita thai pachâsapa ama châ aw. 14Ryhpa a hnei leipa Zenitaizy ta ama pikheipa chhie nata pha pahnona hmâpa ta, ryhpa ta â hnawpazy ama tao tyh. Chavâta ryhpa ama hnei leipa chhao ta, cha cha âmo châta ryhpa a châ. 15Ryhpa raihria cha ama palôh liata ropa a châzie palâsa ei ta, cha cha ama chhie nata pha pahnona ta pahnokhei ta, ama pachâna hmâpa ta a châh ta thailei a pachâ ei ta, a châh ta thai ama pachâ tyh. 16Thâtihpha ei reipa hawhna heta, Khazohpa ta Krista Zisu hmâpa ta chyhsapa bieruzy a pachia noh liata, cha hawhna chata a châ aw.

17Pachâ teh, nâ Zu chyhsa a tah chi ta, ryhpa a ngâchhâ chi ta, Khazohpa nâ palaikhei. 18Ryhpa pachupa na châpa vâta, Khazohpa khopa pahno chi ta, hmo phapa chhao nâ pyh. 19Mochaopa a chhihtha awpa nata zohna liata a ypazy châta khaihna na châpa nâ pahno. 20Pahnona nata biehmeiseihpa yna ryhpa na hneipa vâta, ahrupazy pasotuhpa nata hawtizy pachutuhpa ta nâ pachâ. 21Cha hawhpa na châ hnohkua cha, nâ, mohropazy pachutuhpa, nâmasasyh ta a pachu va chi mâ? Nâ, paru lei awpa biechhotuhpa, na paru tyh ma? 22Nâ, aphei awpa châ vei a tahtuhpa, nâ phei tyh ma? Nâ, khazoh nothlahpazy a haotuhpa, khazoh nothlahpa achhyna o liata hmozy na paru tyh ma? 23Nâ, ryhpa a palaikheipa, ryhpa paraopa ta Khazohpa moh na pachhie tyh ma? 24#Isai 52.5“Nâmo vâta Khazohpa moh cha Zenitaizy hry liata reipachhiepa ta a y,” tahpa ta ropa hawhna khata a châ.

25Ryhpa na zyh khiahta cha, chopawtaipa cha phahnaina a hnei. Ryhpa na parao khiahta deikua cha, na chopawtaipa cha tai leipa hawhta a châ. 26Chopawtaileipa chyhsa ta ryhpa bieraopazy a zyh khiahta cha, a chopawtaileipa cha taipa hawhta pachâpa châ aw vei ma? 27Chavâta a pôhpa liata chopawtai leipa, châhrasala ryhpa a zyh pakipa chata, nâ, ryhpa bie ropa ta a hneipa nata chopawtaipa, châhrasala ryhpa a paraotuhpa chi cha, thailei a cha pachâ aw. 28Chôpho dei ta Zu a châpa cha Zu hmeiseihpa châ leipa ta, chôpho ta sapa dei chopawtaipa chhao chopawtai hmeiseihpa châ vei. 29#Ryhpa 30.6Zu châna cha chyhsa chhôh liata y ta, chopawtaina cha palôh liata a y, châbie ta chopawtaipa châ leipa ta, Thlahpa ta taipa tlao a châ. Cha hawhpa chyhsa cha, chyhsapa reithaina hlao leipa ta, Khazohpa reithaina a hlao tyh.

Currently Selected:

RAWMA 2: MARVBSI

Highlight

Copy