ÂTHAONA 6

Tipaua

1 # Zbâ 1.6; 2.1 Chyhsapa cha alei chô liata vaw pôh lymâ ei ta, sawchanôzy ama sa nahta, 2Khazohpa sawchapawzy ta chyhsapa sawchanôzy#6.2 He liata “Khazohpa sawchapawzy” tahpa he Bo 5-na liata Sethâ pathla chapawzy reina châ ta, “Chyhsapa sawchanôzy” tahpa he Bo 4-na liata Kainâ pathla chanôzy châ ei ta, Sethâ pathla chapawzy nata Kainâ pathla chanôzy a hnei pahlaopa reina a châ. cha chhithai tah kaw ei ta, ama khopa chyu lapinô ta hnei ei ta. 3Chatawhcha Abeipa ta, “Ei thlahpa he chyhsapa hnohta chhâzaw ta y aw vei, ano cha thi theipa châ tlôh ta, a hro chhôh nohzy cha kô 120 a châ aw,” tah ta. 4#Maluh 13.33Cha nohzy liata nata cha hnôhlâ chhao ta, alei chô liana heta mopahreihpa sahlao y ei ta. Cha chyhsazy cha Khazohpa sawchapawzy ta chyhsa sawchanôzy hnei ei ta ama pathlazy ama châ. Âmo he hlâno ta chyhsa thatlôpa nata mohpathâhpazy kha ama châ.

5 # Mat 24.37; Lka 17.26; 1 Pit 3.20 Alei chô liata chyhsapa cha thata vaw molei ta, a palôh phaozie chhao, khatino rai ta moleina lâ a heihpa a châzie Abeipa ta hmô ta. 6Alei chô liata chyhsapa a vaw taopa vâta Abeipa cha a ngiapachhi ta, a palôh pasa ngaita ta. 7Chavâta Abeipa ta, “Chyhsapa ei taopa he alei tawhta ei pahleipadia aw. Chyhsapazy, sazy, âlyhpasazy nata avâ pavawzy ei vaw taopa he ei ngiapachhi na,” tah ta. 8Nôah deikua cha Abeipa modypa ta y ta.

Nôah

9 # 2 Pit 2.5 He he Nôah pathlazy thâtih a châ. Nôah cha chyhsa siapa châ ta, ano chhâ chyhsazy hry liata seina a hnei leipa a châ. Nôah cha Khazohpa nata a kaolâh tyh ei ta. 10Nôah ta sawchapaw pathôh Semâ, Hamâ nata Zaphethâ zy sa ta. 11Alei cha Khazohpa hmiakô liata rao khai ha ta, thachahra hmâna sai ta bie ta. 12Khazohpa ta alei cha moh ta, alei chô chyhsa zydua ta ama molei khai hapa vâta a rao khai hapa ta hmô ta.

13Chavâta Khazohpa ta Nôah hnohta, “Hmohrohneipa zydua chhâna ei hmiakô liata a vaw tlô. Âmo vâta alei he thachahra hmâna ta bie ta, chavâta âmo cha alei duata ei pahleipadia khai aw ei. 14Nâ deikua cha meisah vyhpa#6.14 Meisah vypa (cypress) he tho châpa a châ. tho ta balyh tu la, a chhôh liata chhôhpadâhpazy tao mah y. Balyh chhôh nata a khôthozy cha meisah chathli na hnia khai aw. 15Hetana heta balyh cha na tu aw: A doh lâ dy 300, a hâ lâ dy 50, â sâhna lâ dy 30 a châ aw. 16Balyh vâphuh tao aw chi ta, vâphuh nata a pâhchhô likawh liata khaihna a ngia nawpa châta dy kha na pahlôh aw. Balyh kâ lâta chhikao tao aw chi ta, a ry chhâh, chhâh nona nata chhâh thôhna hneipa ta na tao aw.

17“Avâ ry liata hrona a hneipa zydua nata husona a hneipa to pahleipadia khai awpa ta, keima tlai ta alei chô liata tipaua patlôsa aw na ta, alei chô liata hmo to zydua ama leidia khai aw. 18Nâma hnohta deikua cha biehrai ei tao aw. Balyh chhôh lâ a ngia aw chi ta, na lapinô, na sawchapawzy nata ama lapinôzy chhao amâ ngia hra aw. 19Hmohrohneipa to tawhta a chapawpa nata a chanôpa bao no chyu a ngiakhei aw chi ta, na hnohta na pahro aw ei. 20Pavaw chi to, sa chi to nata alyhpasa chi to, bao no chyu ta na hnohta a vy aw ei ta, balyh chhôh liata na pahro hra aw ei. 21Nâ nata âmo châta nie awpa chi to a ngiakhei aw chi ta, nama nie awpa ta na soh pakhy aw,” tah ta. 22#Heb 11.7Cha hawhna chata Nôah ta tao ta, Khazohpa biepiepa zydua hawhta ato tao khai ta.

Currently Selected:

ÂTHAONA 6: MARVBSI

Highlight

Copy