ÂTHAONA 46

Zakaw nata a chhôhkhazy Izi râh lâ ama sie

1Izarei cha a hneipa zydua chhaota a thao ta, Besebâ tlô ta, a paw Aisika Khazohpa lâ atheihnazy hlâ ta. 2Khazohpa ta zâ ta a mâ lâta Izarei cha bie chho ta, “Zakaw, Zakaw,” tah ta. Ano ta, “He liata ei y,” tah ta. 3Ano ta, “Kei he Khazohpa, na paw Aisika Khazohpa ei châ. Izi râh lâta zu awpa chi khah y. Cha liata phopi rônahpa ta ei cha tao aw. 4Na hnohta Izi râh lâ a zu aw na ta, ei châ kaw chhi pakhua heih aw. Na thi tita Zawsi ta a ku ta na mokhaoh a cha pabiehpa aw,” tah ta. 5Zakaw cha Besebâ tawhta pua ta. Izarei sawchapawzy ta ama paw Zakaw nata ama hawtizy nata ama lapinôzy cha, Phiraoh ta ano phao nawpa ta talailih a kaw paphaopazy ta phaoh ei ta. 6#Hmt 7.15Zakaw nata a pathla zydua cha Kâna râh liata ama hneipa ama sahroh nata hmobaohzy a phaopa ta, Izi râh lâ zu ei ta. 7A sawchapawzy, a sawchapawzy liata a samohzy, a sawchanôzy nata a sawchapawzy sawchanôzy a chhi ta, a pathla zydua a hnohta Izi râh lâ â ngiakhei ha ei.

8He he Izarei pathla, Izi râh a ngiapa Zakaw nata a sawchapawzy moh a châ: Rubena cha Zakaw sawchapaw uhtheipa châ ta, 9Rubena sawchapawzy cha Hanô, Pâluh, Hezrô nata Kâmi zy ama châ.

10Simeôna sawchapawzy cha Zemua, Zami, Ôha, Zaki, Zôha nata Kâna zuah chô liata a sawchapawpa Sawla zy ama châ.

11Livai sawchapawzy cha Kesao, Kôhâ nata Merâri zy ama châ.

12Zudâh sawchapawzy cha Erâ, Ônâ, Selah, Pereza nata Zerâ zy ama châ. Erâ nata Ônâ deikua cha Kâna râh liata ama thi haw. Pereza sawchapawzy cha Hezrô nata Hâmu ama châ.

13Iskâra sawchapawzy cha Tola, Puvâ, Iôbâ nata Simrô zy ama châ.

14Zebulawna sawchapawzy cha Seredâ, Elôni nata Zale zy ama châ.

15Chazy cha Liah ta Pâdâ-Aramia liata Zakaw châta a sapa sawchapawzy châ ei ta, a sawchanô Dinâ chhaota, a sawchapawzy nata a sawchanôzy cha ama zydua ta sythôh nata pathôh ama châ.

16Kâdâ sawchapawzy cha Ziphiô, Hâkei, Suni, Ezbaw, Eri, Arôdi nata Areli zy ama châ.

17Asera sawchapawzy cha Imnâ, Isvâ, Isvi nata Beriah zy châ ei ta, ama sietanô cha Serâ a châ. Beriah sawchapawpa Hebe nata Malki ama châ.

18Chazy cha Lâbâ ta a sawchanô Liah a piepa Zilpâ sawchapawzy châ ei ta, Zilpâ ta Zakaw châta âmo cha sa ta, ama zydua ta pahrawh hlei charu ama châ.

19Zakaw lapinô Râkheli sawchapawzy cha Zawsi nata Benzami ama châ.

20 # Âtn 41.50-52 Zawsi ta Izi râh liata sawchapaw pano, Manase nata Epharai sa ta, âmo cha Ôni khih theihthaipa Pawtipherâ sawchanô Asenâ ta Zawsi châta a sapazy ama châ.

21Benzami sawchapawzy cha Belâ, Bekhe, Asabe, Kerâ, Nâmâ, Ehi, Rôsâ, Mupi, Hupi nata Ardâ zy ama châ.

22Chazy cha Zakaw ta Râkheli chô liata a sapa Râkheli sawchapawzy châ ei ta, ama zydua ta pahrawh hlei palih ama châ.

23Dânâ sawchapawpa cha Husi a châ.

24Nâthalai sawchapawzy cha Zahaze, Kuni, Zeze nata Sile zy ama châ.

25Chazy cha Lâbâ ta a sawchanô Râkheli a piepa Bilhâ sawchapawzy châ ei ta, Bilhâ ta Zakaw châta âmo cha sa ta, ama zydua ta pasari ama châ.

26Zakaw sawchapawzy lapinôzy rei leipa ta, Zakaw hnohta Izi râh a ngia hrapa, ano chipathlazy cha ama zydua ta sycharu nata pacharu ama châ. 27#Hmt 7.14Zawsi ta Izi râh liata sawchapaw pano sa ta, chatanachata Zakaw chhôhkha Izi râh lâ a ngiapazy cha ama zydua ta sysari ama châ.

Zakaw nata Zawsi amâ tyh

28Zawsi ta Kôse lâpi a vaw chho thei nawpa ta, Zakaw ta Zudâh cha Zawsi lâ pasiesa chhielie ta. Chatanachata Kôse râh cha a ngia ei ta. 29Zawsi cha a talailih a chhuanoh ta, a paw a hmô awpa ta Kôse lâ khy ta. A hnohta a pahnosa ta, a pyhpahly ta, vâropi tlai cha thlu ta. 30Izarei ta Zawsi hnohta, “Ahrohpa ta y chi ta, na hmia ei hmô hapa vâta, tahmâ cha thi awpa chhao ei mâ haw,” tah ta. 31Zawsi ta a unawhzy nata a paw chhôhkhazy hnohta, “Khy aw na ta, Phiraoh chho aw na ta, a hnohta, ‘Kâna râh liata a ypa ei unawhzy nata ei paw chhôhkhazy kha kei lâ amâ zu haw. 32Chapawzy cha mietaku vaituhpazy châ ei ta, sahrohzy vaih tyh ei ta, chavâta mietaku zawzy, viahchao hrizy nata ama hneipa zydua amâ vaw phao khai haw,’ tahpa ta reih aw na ta. 33Phiraoh ta cha aw aw ei ta, ‘Khâpa rai nama hria tyh?’ a cha tah khiah ei ta cha, 34nâmo ta, ‘Na seizy he eima hawtita tawhta tahmâ taihta, miah pathlatuhpazy hawhta, sahroh vaituhpazy eima châ’ nama tah aw. Chatanachata Kôse râh liata nama pahrâ thei aw, mietaku vaituhpazy cha Izi chyhsazy châta pasichhihpa châ tlôh ei ta,” tah ta.

Currently Selected:

ÂTHAONA 46: MARVBSI

Highlight

Copy