ÂTHAONA 43

Zawsi unawhzy Benzami chhaota Izi râh lâ amâ lie

1Cha râh liata chakâh mozohna cha tlô lymâ ta. 2Izi râh tawhta ama kaw phaopa sâh ama nie khai nahta, ama paw ta ama hnohta, “Sie heih u la, sâh a chyhta chhâ eima châta za chalei heih teh u,” tah ta. 3Zudâh ta a hnohta, “Cha chyhsa chata, ‘Nama unawhpa nama hnohta â hlao leipa khiahta la, ei hmia na hmô aw veih ei chi’ tahpa ta zikyu liahsa miah a râ ha ta. 4Eima unawhpa he eima hnohta na pasiesa khiahta cha, sâh cha eima cha za chaleipa aw. 5Na pasiesa leipa khiahta cha, zu aw ma pi, cha chyhsa chata eima hnohta, ‘Nama unawhpa nama hnohta â hlao leipa khiahta la, ei hmia na hmô aw veih ei chi,’ miah tah ha tlôh ta,” tah ta. 6Izarei ta, “Khazia unawh hropa nama hneipa kyh zy taih chhopa ta, ei chô liata hmo pha lei ngaitapa nama tao?” tah ta. 7Âmo ta, “‘Cha chyhsa chata, nama paw cha a hroh ma? Unawh hropa nama hnei ma?’ tahpa ta keimo thâtih nata eima chhôhkha thâtih zy a sia kawpa ta miah hiahri ta. Bie miah a hiahripazy eimâ chhypa châ ta, ‘Nama unawhpa cha a zâ chhi teh u,’ a tah awpa kheihta eima pahno aw?” tah ei ta. 8Zudâh ta a paw Izarei hnohta, “Hawtipa he ei hnohta pasiesa la, thyu aw pi ta, eima sie aw. Chatanachata keimo nata nâ nata eima sawtazy he thi leipa aw pi ta, eima hroh thei aw. 9Â boh nawpa ta, kei he a vyuhpa ta sokhâhpa châ aw na ta, a hrona ei ku tawhta nâ hnaw aw. Ano cha nâ lâ a vaw liekhei heih leipa ta, na hmiakô liata ei paduasa heih leipa khiahta cha, keima ta chhâzaw ta a maoh ei phaoh aw. 10Pahawhpasâh leipa sih la cha, ei no eimâ kaw lie ha bâ awpa tlai,” tah ta.

11Ama paw Izarei ta ama hnohta, “Cha hawhta a châ khiahta cha, hetana heta tao muh vy: He râh liata theilâpa pahâh chaipazy he a chyhta sai ta nama sykhaozy liata pasâ u la, cha chyhsa châta kuhria, thochathli thohna, kheihti, ropahâhpa, myrâ, theilâ hyhkua châpa nata kuasâh theizy phaopa muh vy. 12Tâkâ a lie no ta a phao u la, nama sykhao paka liata tâkâ a cha pakua hapazy chhao kha phaoh ha muh vy, my pathleipa a châ ngyu aw. 13Nama unawhpa chhao cha a chhi u la, thyu u la, cha chyhsa lâ cha sie heih teh u. 14Khazohpa Atotaotheipa ta, cha chyhsa hmiakô liata cha ngiachhie ei sala, cha chyhsa chata nama unawhpa pakha nata Benzami he nama hnohta kaw pasiesa mawh sy! Kei deikua cha, ei sawzy ei pahlei hapa chhao ta, ei pahleipa châ lah vâ,” tah ta.

15Chatanachata kuhriazy cha phaoh ei ta, tâkâ chhao a lie no ta phaoh ei ta. Thyu ei ta, Benzami a chhipa ta Izi râh lâ cha zu ei ta, Zawsi hmiakô liata zâ duah ei ta.

16Ama hnohta Benzami â hlaopa Zawsi ta a hmô nahta, a o avaotuhpa hnohta, “Hao chyhsazy hao o chhôh lâ a chhi la, sa thie la, chhoh teh. Hao chyhsazy hao ei hnohta nohchhô pati ama nie aw,” tah ta. 17Cha chyhsa chata Zawsi biepiepa hawhta tao ta, chyhsazy cha Zawsi o lâ a chhi ta. 18Zawsi o lâ a chhipa ama châpa vâta chi kaw ei ta, “Eimâ zu tua nota, eima sykhao liata tâkâ miah a pakuapazy vâ khata miah â chhi hih. Miah a tei nawpa ryhpaohna tluapa ta, miah thyuhnao ta, sei ta miah patupa ta, eima alâzy a la khai â chhuah hih,” tah ei ta. 19Zawsi o avaotuhpa kiapâh lâ vawh ei ta, chhikao thaby liata bie a chho ei ta, 20“Pâpuh, sâh chalei awpa ta eimâ zu tua no kha, 21riebu eima tlô nahta eima sykhaozy pahy pi ta, eima sykhao chyu liata eima tâkâzy cha â kipa ta vaw y thlâh ha ta, chavâta eima vaw phaoh pakhua haw. 22Sâh chalei nawpa ta tâkâ hropa chhao eima vaw phaoh. Eima tâkâ kha ahy ma eima sykhao liata a soh tahpa pahno ma pi,” tah ei ta. 23Ano ta, “Thlalôhpa ta y teh u, chi khuh vy. Nâmo Khazohpa nata nama paw Khazohpa ta nama sykhaozy liata hmosôhpa a cha pie ei chuh. Nama tâkâ kha ei vaw hmô haw,” tah ta. Simeôna cha âmo lâ vaw papua ta. 24Zawsi o avaotuhpa ta âmo cha Zawsi o chhôh lâ a chhi ta, âmo cha ti pie ta, ama pheizy a si ei ta, ama alâzy châta sahroh laozy pie ta. 25Cha liata pati ama nie awpa ama pahnopa vâta, nohchhô ta Zawsi â vy daihti liata pie awpa ta ama kuhriazy a chhuanoh chhielie ei ta.

26Zawsi â vaw di nahta, ama kuhriazy o chhôh lâ cheipa ei ta, alei lâ a bôhpa ta ano cha a naoh ei ta. 27Zawsi ta ama thâtih hiahri ta, “Nama paw a thâtih nama reipa pawpipa kha a tlâh no a châ ma? A hroh thlâh chy ma?” tah ta. 28Âmo ta, “Châ chakaotuhpa eima paw cha a tlâh no a châ, a hroh thlâh chy,” tah ei ta. Ama luh a bôhpa ta, ano cha a naoh ei ta. 29Zawsi cha mohmia pasaih ta, a unawhpa Benzami, a nô sawchapawpa kei hmô ta, “Kha kha nama unawh seihnai chaipa a thâtih eina chhopa ei chi kha a châ ma?” tah ta. A hnohta, “Ei sawchapawpa, Khazohpa ta cha ngiachhie mawh sy!” tah ta. 30Zawsi cha a unawhpa a hmô thlâhpa cha thata a ngiahma ta, cha nawpa su tlua para ta, a chhôhpadâhpa lâ a ngia ta, cha liata cha ta. 31A hmia a pahlie ta, vaw pua heih ta, a palôh a pachyusapa ta, “Pati nie tao teh u,” tah ta. 32Ano châta ânano ta, âmo sahlao châta ânano ta, Izi chyhsa ano a nielâhpazy châta ânano ta pati cha tao ei ta. A chhâpa cha Izi chyhsazy ta Hebrai chyhsazy cha pati phiah la lâh leipa ei ta, cha hawhta taopa cha Izi chyhsazy châta pasichhihpa a châpa vâta a châ. 33A uhthei chaipa tawhta pathao ta, a seihnai chaipa taih ta, ama uhthei châna apazinazie hawhta, Zawsi hmiakô liata a tyuh ei ta. Noâhpa ta a moh raihrie ei ta. 34Ama nie vyuhzy cha Zawsi tlâhkhai tawhta rai ei ta, Benzami vyuh cha mohropazy vyuh hlâta a lie pangawh ta a hluh via. Chatanachata niepa ta doh ei ta, Zawsi hnohta a ly ngaitapa ta y ei ta.

Currently Selected:

ÂTHAONA 43: MARVBSI

Highlight

Copy