ÂTHAONA 24
24
Aisika lapinô hiana
1Abarahâ cha vaw machâ ta, pawpi kaw bâ ta. Abeipa ta Abarahâ cha kyh to liata byhnâ pie ta. 2Abarahâ ta a chakaotuhpa, a o liata uhthei chaipa nata a hneipa zydua chô liata biehneituhpa hnohta, “Ngiachhiepa ta na ku kha ei byhpi ry liata vaw chahraoh teh.#24.2 Byhpi ry liata ku chahraohpa he Hebrai mo ta parao lei awpa bietai ipa taona châta ama hmâpa a châ. 3Lei nata vâ Khazohpa Abeipa moh ta bie cha pataihsa awpa ei khoh. Ei sawchapawpa lapinô châta ei pahrâna Kâna zuah na hiapa awpa châ vei. 4Ei râh lâ, ei chiheihzy yna lâ tlai sie aw chi ta, ei sawchapawpa Aisika châta lapinô na kei hia awpa a châ,” tah ta. 5Chakaotuhpa ta a hnohta, “Chanô ta he râh lâ he na vaw zi khoh vei mawh sala, na sawchapawpa cha na vaw puana râh lâ ei kuakhei aw ma?” tah ta.
6Abarahâ ta a hnohta, “Ei sawchapawpa he, cha râh lâ na kuakhei cheita awpa châ vei. 7Avâ Khazohpa Abeipa, ei paw o tawhta nata ei pina râh tawhta na chhihthapa ta, bie na chho ta, ‘He râh he na pathlazy ei pie aw,’ tahpa ta bie nâ taihtuhpa tlai chata a vâlyuhchâpa na hmia lâta pasiesa aw ta, cha tawhna chata ei sawchapawpa châta lapinô na hiapa aw. 8Châhrasala chanô ta a cha zi khoh leipa khiahta la, ei hnohta bie nâ taihpa tawhta na pathaih aw. Khâpa rai châ sala ei sawchapawpa he, cha râh lâ na kuakhei awpa châ vei,” tah ta. 9Chatawhcha chakaotuhpa ta a zibeipa Abarahâ byhpi ry liata a ku chahraoh ta, cha kyh liata a hnohta bie a taih ta.
10Chakaotuhpa cha a zibeipa râraoseihpa pô hrawh a chhipa ta a thao ta. A zibeipa hmo phapa chi to phaoh ta, thyu ta Mesôpôtamia râh liata Nâhaw khih lâ sie ta. 11Zâlâ chanô ti thai daihti liata, khihpi khôtho tikhaoh kiah liata a râraoseihpazy cha pabyusa ta. 12Chakaotuhpa ta, “Hy Abeipa, ei zibeipa Abarahâ Khazohpa y, ngiachhiepa ta tanoh he hlaotlohna na pie la, ei zibeipa Abarahâ chô liata ngiachhiena palâsa mah y. 13Moh teh, tikhaoh kiah liata a duah na ta, khihpi chyhsa sawchanôzy ti thai awpa ta amâ vy. 14Hetana heta vaw châ mawh sy. Laihsa ahy hnohta rai, ‘Ngiachhiepa ta na tibeih kha za pahnai la, ti na padosa teh,’ tah aw na ta, ‘Doh teh, na râraoseihpazy chhao, do awpa ei pie hra aw,’ a tahtuhpa, cha tlai cha, châ chakaotuhpa Aisika châta na raopa châ mawh sy. Cha liana chata ei zibeipa chô liata ngiachhiena na palâsa haw tahpa ei pahno aw,” tah ta.
15A thlahchhâpa a patlô hlâta, Rebekâ cha tibeih a ngiatlâh liata khaihpa ta vaw pua ta. Ano cha Abarahâ unawhpa Nâhaw lapinô Milkâ sawchapawpa Bethua sawchanônô a châ. 16Cha laihsa cha laihsa kôpa chhithai ngaitapa châ ta, chapaw ahy ta hmah ama pahnopathei leipa a châ. Tikhaoh lâ cha zu ta, a tibeih cha pabie ta, a khy heih ta. 17Chakaotuhpa ta ano a tyh awpa ta a kei râ ta, “Ngiachhiepa ta na tibeih liata ti kha a chyhta na padosa teh,” tah ta. 18Ano ta, “Ei zibeipa, doh mah y,” tah ta, a chatliepa ta a tibeih cha za pahnai ta, a ku ta chaba ta, ti cha padosa ta. 19Ano a padosa khai nahta, “Na râraoseihpazy châta chhao, ama do khai hlâlei ei thaipa aw ei,” tah ta. 20A chatliepa ta a tibeih liata ti cha châki liata patlai ta, ti thai awpa ta tikhaoh lâ a râ heih ta, râraoseihpa zydua châta ti thaih lymâ ta. 21Chakaotuhpa ta ano cha moh thlâh ha ta. Abeipa ta a khitlyna hlao a patlohsa aw ma, patlohsa aw vei ma, tahpa pachâpa ta a thlih thlâh ha ta.
22Râraoseihpazy ti ama doh khai nahta, chakaotuhpa ta laihsa châta ngôh kâto sekel khophie a hripa nata a ku liata â ky awpa ngôh lâkyu miano sekel miahrawh a hripa pachhi ta, 23a hnohta, “Ahy sawchanô ma na châ? Ngiachhiepa ta na chho teh. Na paw o liata eimâ rie nawpa su a y aw ma?” tah ta. 24Ano ta a hnohta, “Milkâ ta Nâhaw châta a sapa Bethua sawchanô ei châ,” tah ta. 25Ano pyly ta a hnohta, “Sâhkô nata sahroh lao hluhpi hnei pi ta, a rie nawpa chhôhpadâhpa chhao eima hnei,” tah heih ta. 26Chakaotuhpa cha a bôh ta, Abeipa a chhy ta. 27“Ei zibeipa chô liata ngiachhiena nata biedopa a thlyu beih leipa Abeipa, ei zibeipa Abarahâ Khazohpa cha reithaipa ta y mawh sy! Kei chhao he Abeipa ta ei zibeipa heinawhzy o lâta eina vaw chhihtha ha hih,” tah ta.
28Laihsa cha a râ ta, cha biezy cha a nô chhôhkhazy kei chho ta. 29Rebekâ cha rilâhpa pakha a moh Lâbâ ama tahpa hnei ta. Lâbâ cha pua ta, chyhsa yna tikhaoh lâ cha a râ ta. 30A sietanô kâto nata a ku liata lâkyuzy hmô ta, a sietanô Rebekâ ta, “Cha chyhsa chata, chata khata eina tah” a tahpa a thei nahta, cha chyhsa lâ cha a râpa a châ. Chyhsa cha tikhaoh kiah liata râraoseihpazy kiapâh ta a vaw duah thlâh ha ta. 31Lâbâ ta, “Nâ, Abeipa byhnâ a topa y, a vaw ngia mah y. Khazia khih khôtho liata nâ duah thlâh haw? O pachhuahpanoh ha na ta, râraoseihpazy châta su ei paryh haw,” tah ta. 32Chatanachata chakaotuhpa cha Lâbâ o lâ vawh ta, râraoseihpa hmophaopazy pathlâ ta. Râraoseihpazy cha sâhkô nata sahroh laozy pie ta, ano nata â chhipazy phei a si nawpa chhao ti y ta. 33Pati taopa ei ta, châhrasala ano ta, “Ei vy chhâna bie ei rei hlâlei cha nie aw va na,” tah ta. Lâbâ ta, “Reih mah y,” tah ta.
34Chakaotuhpa ta, “Kei he Abarahâ chakaotuhpa ei châ. 35Abeipa ta ei zibeipa cha byhnâ thata pie ta, chyhsa hneirôhpa a vaw châ haw. Abeipa ta ano cha mietaku nata viahchao zawzy, tâkâ nata ngôhzy, seichapaw nata seichanôzy, râraoseihpa nata alâzy pie ta. 36Ei zibeipa lapinô Sârâ ta a nôpi tawhta ei zibeipa châta sawchapaw sapa ta, ano hnohna chata a hneipa zydua a pie khai haw. 37Ei zibeipa ta, ‘Ei sawchapawpa lapinô châta ama râh liata ei pahrâna Kâna zuah na hiapa awpa châ vei. 38Ei paw o, ei chiheihzy yna lâ sie aw chi ta, ei sawchapawpa châta lapinô na kei hiapa aw,’ tahpa ta bie na pataihsa ta. 39Kei ta ei zibeipa hnohta, ‘Chanô ta na vaw zi khoh vei mawh sala,’ tah na ta. 40Ano ta ei hnohta, ‘A hmiakô liata ei y tyhpa Abeipa ta a vâlyuhchâpa na hnohta tuah aw ta, na siena chhâpa hlao a cha patloh aw. Chatanachata ei sawchapawpa châta ei chiheih nata ei paw pathlazy hry tawhta lapinô na hiapa aw. 41Ei chiheihzy lâ na kei tlô khiahta la, ei chô liata bie nâ taihpa tawhta na pathaih aw. Laihsa cha ama cha pie vei khiahta cha, ei chô liata bie nâ taihpa tawhta na pathaih hra haw,’” na tah ta.
42“Tanoh tikhaoh vaw tlô na ta, ‘Hy Abeipa, ei zibeipa Abarahâ Khazohpa y, ei siena chhâpa hlao eina patloh awpa chi a châ khiahta la, 43moh teh, tikhaoh kiapâh liata a duah na ta, hetana heta vaw châ mawh sy. Laihsa kôpa ti thai awpa ta â vypa hnohta, “Ngiachhiepa ta na tibeih liata ti kha a chyhta na padosa teh,” tah aw na ta, 44ei hnohta, “Doh mah y, na râraoseihpazy châta chhao ti ei thaipa hra aw,” a tahtuhpa cha, ei zibeipa sawchapawpa châta Abeipa raopa chanô châ mawh sy,’” tah na ta.
45“Ei palôh ta thlah ei chhâ khai hlâta, Rebekâ cha a tibeih a ngiatlâh liata khaihpa ta vaw pua ta, tikhaoh lâ zu ta, ti za thaih ta. A hnohta, ‘Ngiachhiepa ta ti na padosa teh,’ tah na ta. 46Ano ta a tibeih a ngiatlâh tawhta thlai za pahnai ta, ‘Doh mah y, na râraoseihpazy chhao ei padosa hra aw ei,’ tah ta. Ti cha doh na ta, râraoseihpazy chhao padosa ta. 47‘Ahy sawchanô ma na châ?’ tah na ta. Ano ta, ‘Milkâ ta Nâhaw châta sawchapaw a sapa Bethua sawchanô na ei châ,’ tah ta. Chatanachata kâto a hnapasu liata pabapa ta, lâkyuzy a ku liata paky na ta. 48Ei luh a bôh na ta, Abeipa a chhy na ta, ei zibeipa Abarahâ Khazohpa, a sawchapawpa châta ei zibeipa chiheih sawchanô hiapa awpa ta lâpi dopa liata nâ chhituhpa Abeipa cha reithai na ta. 49Chavâta tahmâ ei zibeipa cha nama ngiachhie thei awpa nata a chô liata â dopa ta nama tao awpa khiahta cha, na chho u la, nama tao lei awpa a châpa chhao rai ta, na chho hra teh u. Chatanachata chachâh lâ tlyma, chavei lâ tlyma ei heih thei aw,” tah ta.
50Lâbâ nata Bethua ta a chhy ei ta, “He hmo he Abeipa tawhta châ ta, a chhie a pha a reih thei awpa châ ma pi. 51Moh teh, Rebekâ cha na hmiakô liata a y hih. A chhi la, sie mah y. Abeipa ta a reipa hawhta, na zibeipa sawchapawpa lapinô ta y mawh sy,” tah ei ta.
52Abarahâ chakaotuhpa ta ama biezy cha a thei nahta, Abeipa hmiakô liata alei lâ a bôh ta. 53Chakaotuhpa ta tâkâ atobinazy, ngôh atobinazy nata chysiazy pachhi ta, Rebekâ cha pie ta. A rilâhpa nata a nô chhao hmo sôhpazy pie hra ta. 54Chakaotuhpa nata â chhipazy cha niepa ta doh ei ta, cha liata a rie ei ta. My ta thyu ei ta, “Ei zibeipa lâ na pasiesa bâ teh u,” tah ta. 55A rilâhpa nata a nô ta, “Laihsanô he noh chyhta, noh hrawh chhâ eima hnohta y chy sala, cha khai tawhta sie lah vâ,” tah ei ta. 56Châhrasala ano ta ama hnohta, “Rie na pahawh khah u. Abeipa ta ei vyna chhâpa hlao na patloh ha ta, ei zibeipa kô ei tlô thei nawpa ta tlao na pasiesa teh u,” tah ta. 57Âmo ta, “Laihsanô cha aw aw pi ta, ano pakah tawh tlai ta eima pareisa tua aw,” tah ei ta. 58Rebekâ cha aw ei ta, a hnohta, “He chyhsa hnohna heta na sie aw mâ?” tah ei ta. Ano ta, “Ei sie aw,” tah ta. 59Chatanachata ama sietanô Rebekâ nata ano a hâtuhpa nata Abarahâ chakaotuhpa nata a sahlaozy cha pasiesa ei ta. 60Rebekâ cha byhnâ awpa ei ta, a hnohta,
“Eima sietanô y,
Thysâh hluhpi nô vaw châ la;
Na pathlazy ta âmo a haotuhpazy
Thokhy chhikao hnei mawh ei sy!”
tah ei ta.
61Rebekâ nata a seichanôzy cha thyu ei ta, râraoseihpazy kiah ei ta, cha chyhsa cha zi ei ta. Chatanachata chakaotuhpa ta Rebekâ cha a chhi ta, ama sie haw.
62Aisika cha Neke râh liata a pahrâpa a châpa vâta Belahairô lâ tawhta vaw tlô ta. 63Aisika cha lyu liata thlahchhâ awpa ta zâlâ ta pua ta. Mohmia pasaih ta, râraoseihpazy a vy haipa hmô ta. 64Rebekâ cha mohmia pasaih ta, Aisika a hmô nahta, râraoseihpa tawhta chô ta, 65chakaotuhpa hnohta, “Miah dy awpa ta lyu liata â vypa chyhsa hao ahy maw?” tah ta. Chakaotuhpa ta, “Ei zibeipa a châ huh,” tah ta. Rebekâ cha a luhkhuna poh la ta, a khu ta. 66Chakaotuhpa ta a hmo taopa zydua cha Aisika chho khai ta. 67Aisika ta Rebekâ cha a nô Sârâ poh o lâ a ngiakhei ta, Rebekâ cha hnei ta, a lapinô vaw châ ha ta. Aisika ta Rebekâ cha kyhpachâ ngaita ta, chatanachata a nô a thi tawhta thlahpalôhpa ta y ha ta.
Currently Selected:
ÂTHAONA 24: MARVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
