ÂTHAONA 16

Hâkarâ nata Ismela

1Abarâ lapinô Sârai cha Abarâ châta saw sapa thei leipa ta. Sârai cha Izi zuah a moh Hâkarâ ama tahpa seichanô pakha hnei ta. 2Sârai ta Abarâ hnohta, “Nathlie teh, Abeipa ta saw phao awpa eina pakhâ ha hih, vawh la, ei seichanô lâ a kei ngia mah y. Ano hmâpa ta sawchapaw ei hnei thei ngyu aw,” tah ta. Abarâ ta Sârai bie cha zyh ta.

3Abarâ cha Kâna râh liata kô hrawh a pahrâ tawhta, a lapinô Sârai ta, a seichanô Izi zuah Hâkarâ cha a chhi ta, a vahpa Abarâ hnohta a lapinô châta pie ta. 4Abarâ ta Hâkarâ lâ a ngia ta, saw phaoh ta. Hâkarâ ta saw a phaoh tahpa a pahno nahta, a zibeinô cha mohnao pathao ta. 5Sârai ta Abarâ hnohta, “Ei chô liata hmo doleipa a tlôpa he nâma chô liata y mawh sy. Ei seichanô he nâ pyh awpa ta cha pie na ta, saw a phaoh tahpa â pahnopa nahta, eina mohnao haw. Abeipa ta nâma nata keima likah pachia mawh sy!” tah ta. 6Abarâ ta Sârai hnohta, “Nathlie teh, na seichanô cha na ku liata a y. Pha na tahnazie hawhta a chô liata tao mah y,” tah ta. Sârai ta Hâkarâ cha a rie thata pathei ta. Chavâta Hâkarâ ta Sârai cha â râsai haw.

7 Abeipa vâlyuhchâpa ta Hâkarâ cha râhchawhpa tihnawh kiapâh, Surâ pangaina lâthlôh liata tihnawh kiapâh liata hmô ta. 8A hnohta, “Hâkarâ, Sârai seichanônô, khataih tawhta nâ vy, khataih lâ na sie aw?” tah ta. Ano ta, “Ei zibeinô Sârai tawhta ei râ,” tah ta. 9Abeipa vâlyuhchâpa ta, “Na zibeinô Sârai lâ kua la, ano rei sai ta kei y mah y,” tah ta. 10Abeipa vâlyuhchâpa lilaw ta a hnohta,

“Na pathlazy thata papôhsa aw na ta,

Ama hluhzie reih tiahpa châ aw vei,”

tah ta. 11Abeipa vâlyuhchâpa ta a hnohta,

“Pachâ teh, saw phaoh chi ta,

Sawchapaw na sa aw;

Abeipa ta na pasataona a pahnopa vâta,

A moh Ismela#16.11 “Ismela” tahpa cha “Khazohpa ta a thei” tahna a châ. na bi aw.

12Ano cha alâ hrâhpa hawhta châ aw ta,

Chyhsa to a dyuh aw ta,

Chyhsa to ta ano a dyuh aw ei ta,

A unawhpa#16.12 Biehrai Parohpa reikah liata “unawh, unawhpa” tahpa he, pilâh sipa reina dei châ leipa ta, chiheih, phoheih nata heinawh reinazy châta chhao hmâpa a châ. Biehrai Thiehpa liata cha ngiapâlâhpazy reina châta hmâpa a châ via. Chavâta a bie siezie ta unawh, unawhpa, chiheih, chiheihpa, phoheih, phoheihpa, heinawh, heinawhpa tahpazy hmâ pachâhpa a châ. zydua nata a ryh leipa ta a y aw,”

tah ta. 13Hâkarâ ta, “He liana tlai heta nâ hmôtuhpa cha ei hmô haw,” tah ta, bie â chhotuhpa Abeipa cha, “Nâ cha a hmôtuhpa Khazohpa#16.13 He liata “Hmôtuhpa Khazohpa” tahpa he Hebrai reih ta “Elrôi” tahpa a châ. na châ,” tahpa ta a moh a bi. 14Chavâta tikhaoh cha Belahairô#16.14 “Belahairô” tahpa cha “Nâ hmôtuhpa Hrohthlâhpa Tikhaoh” tahna a châ. tahpa a châ. Kâdesâ nata Bere khih likawh liata a y.

15 # Kal 4.22 Hâkarâ ta Abarâ cha sawchapaw sapa ta, Abarâ ta Hâkarâ chô liata a sapa a sawchapawpa moh cha Ismela a bi. 16Hâkarâ ta Abarâ châta Ismela a sa nota, Abarâ cha kô sycharie nata kô charupa a châ.

Currently Selected:

ÂTHAONA 16: MARVBSI

Highlight

Copy