ÂTHAONA 14

Abarâ ta Lawta a pachha

1Sinâ bei Amrâphe, Elâsâ bei Ariôka, Elâmi bei Kedaolaome nata Kôimâ bei Tidâ zy amâ beina daihti liata, 2âmo heta Sawdawmâ bei Berâ, Kawmawrâ bei Bisâh, Adamâ bei Sinâbi, Zebô bei Semebe nata Belâ beizy a dyuh awpa ta siehnao ei ta. Belâ cha Zawâ a châ. 3Ama siehnaopa bei zydua cha a pazao ei ta, Sidi Saikao liata ama pheisaihzy pahmaoh ei ta. Sidi cha Tilaipi Iahpa a châ.

4Kô hrawh hleino chhôh Kedaolaome ry liata y ei ta, kô hrawh hleithôhna liata deikua cha, a ry liata y khoh khao leipa ei ta. 5Chavâta kô hrawh hleipalihna liata, Kedaolaome ta ano py beizy chhaota âmo cha siehnao ta, Asterôkanai liata Rephai mo, Hamâ liata Zuzi mo nata Kiriathai bypi liata Emi mozy cha ama pahnie haw. 6Hôri mo chhao ta ama yna Seirâ Tlâh tawhta râhchawhpa kiapâh liata a ypa Elpârâ taihta ama thie lymâ. 7Chatawhcha kua ei ta, Emipâ tlô ei ta, Amale râh zydua nata Hâzazôtamâ liata a pahrâpa Amawri mo zydua chhao ama pahnie khai haw. Emipâ cha Kâdesâ a châ.

8Chatanachata Sawdawmâ bei, Kawmawrâ bei, Adamâ bei, Zebô bei nata Belâ beizy cha pua ei ta, a dyuh awpa ta Sidi saikao liata a pahmaoh ei ta. Belâ cha Zawâ a châ. 9Elâmi bei Kedaolaome, Kôimâ bei Tidâ, Sinâ bei Amrâphe nata Elâsâ bei Ariôka zy cha a dyuh ei ta. Bei papalih ta bei papangawh amâ dyuh. 10Sidi Saikao cha chiatlao khaoh ta bie ta. Sawdawmâ nata Kawmawrâ beizy cha a râ ei ta, chiatlao khaoh liata tla ei ta, a tla laibâhpazy tlâh lâ a râ ei ta. 11Sawdawmâ nata Kawmawrâ mo hneipa zydua nata niedo zydua cha, chariahpazy ta la ei ta, ama sie haw. 12Sawdawmâ khih liata a pahrâpa Abarâ unawhpa sawchapawpa Lawta chhao patu ei ta, a hneipa zydua chhaota siekhei ha ei ta.

13Chyhsa â râpa pakha a vy ta, Mamre thothih liata a pahrâpa Hebrai chyhsa Abarâ hnohta cha thâtih cha chho ta. Mamre cha Amawri chyhsa châ ta, Eskaw nata Ane unawhpa a châ. Âmo cha Abarâ nata a pazaopa ama châ. 14Abarâ cha a unawhpa sei ta amâ chhipa thâtih a theipa nahta, a o liata a pihpa, chariah a dyuhna thaipa chyhsa 318 a chhi ta, Dânâ khih taihta a chadai ta. 15Zâ ta chho awpa ta ano nata a chakaotuhpazy a pachhaih ei ta, thie lymâ ei ta, Dâmaskâ chavei lâta a ypa Hôbâ khih taihta a chadai ei ta. 16Hmo zydua a liekhei khai ta, a unawhpa Lawta nata a hneipa zydua nata chanôzy nata chyhsa zydua â liekhei khai ha ei.

Melkizade ta Abarâ byhnâ a awpa

17Kedaolaome nata ano py beizy pahniepa ta â vaw lie nahta, Sâve Saikao liata ano dy awpa ta Sawdawmâ bei cha pua ta. Sâve Saikao cha Bei Saikao a châ. 18#Heb 7.1-10Sale bei Melkizade ta viahchhâ nata kresawhti vaw cheih ta. Ano cha Khazohpa Chônôchaipa theihthaipa a châ. 19Melkizade ta Abarâ cha byhnâ awpa ta,

“Lei nata vâ hneituhpa Khazohpa Chônôchaipa ta,

Abarâ cha byhnâ pie mawh sy!

20Na chariahpa na ku liata châ pietuhpa Khazohpa Chônôchaipa cha,

Reithaipa ta y mawh sy,”

tah ta. Abarâ ta Melkizade cha ato tawhta su hrawh su kha pie ta.

21Sawdawmâ bei ta Abarâ hnohta, “Chyhsazy he na pie la, hmozy he cha nâma a la mah y,” tah ta. 22Abarâ ta Sawdawmâ bei hnohta, “Lei nata vâ hneituhpa Khazohpa Chônôchaipa, Abeipa lâta bie a taih ha na ta, 23chavâta nâma eih cha lari sâkhata dâhdei chhao, pheiky ri sâkhata dâhdei chhao la aw va na. Chataleipatala ‘Abarâ cha keima ta ei pahneirôhsapa ma a châ,’ na tah pathlei aw. 24Nâ chakaotuhpazy nie hapa dei leipa ta cha, khâpa hmâh la aw va na. Nâ sielâhpa Ane, Eskaw nata Mamre zy deikua cha ama tovyuh a la mawh ei sy,” tah ta.

Currently Selected:

ÂTHAONA 14: MARVBSI

Highlight

Copy