PUASAINA 4

1Mawsi ta a chhy ta, “Na zo aw veih ei, ei ao na nathlie hra aw veih ei, ‘Abeipa na hnohta a luah vei,’ ama tah thlâh ha aw,” tah ta. 2Abeipa ta a hnohta, “Na ku liata a ypa kha khâpa a châ?” tah ta. Ano ta, “Chôchahrei,” tah ta. 3Abeipa ta, “Alei liata thy teh,” tah ta. Alei liata thy ta, parih lâta a vaw lie ta, Mawsi ta parih cha a râsai ta. 4Abeipa ta Mawsi hnohta, “Na ku ta kei paza la, a chaolahmei liata patu teh,” tah ta. A ku ta kei paza ta, patu ta, a ku liana chata chôchahrei lâta a vaw lie ha ta. 5Abeipa ta, “Kha hmo kha Abeipa, âmo pathlatuhpazy Khazohpa, Abarahâ Khazohpa, Aisika Khazohpa nata Zakaw Khazohpa cha, na hnohta â vaw luah tlai tahpa ama zo thei nawpa châta a châ,” tah ta. 6Abeipa ta a hnohta, “Na ku ta na chachôhna hria teh,” tah heih ta. A ku ta a chachôhna cha hria ta, a ku a la nahta, a ku cha dâhaw hawhta ngyuhpa ta vaw phawh ha ta. 7Abeipa ta, “Na ku ta na chachôhna kha hria heih teh,” tah ta. A chachôhna cha hria heih ta, a ku cha a chachôhna tawhta a la nahta, a sapa hropazy hawhta vaw y pathi ha ta. 8Abeipa ta, “Cha zo leipa ei sala, ngiana hmiatuapa kha amâ py khoh vei khiahta cha, ngiana hnôhlâtapa chhâ he cha ama zo aw. 9Ngiana mianopazy he zo leipa ei sala, na bie ama nathlie vei khiahta cha, Nile chavah ti za la aw chi ta, alei hipa liata bao aw chi ta, chavah tawhta ti na za lapa cha alei hipa liata thisaih lâta â vaw lie aw,” tah ta.

10Châhrasala Mawsi ta Abeipa hnohta, “Hy ei Beipa, kei la pakah paleih thaipa châ leipa na ta, khahlâ tawhta nata châ chakaotuhpa hnohta bie na reih tawhna chhao heta, kahchôleiâpa nata reikah sôpa châ tlôh na ta,” tah ta. 11Abeipa ta a hnohta, “Ahy ma chyhsapa pakah he a tao? Reih pathlie thei leipazy, nahpâpazy, mopavâpazy nata mochaopazy chhao he, ahy taopa ma a châ? Kei Abeipa ta ei taopa châ vei ma? 12Chavâta tahmâ sie teh, na pakah liata y aw na ta, na rei awpa ei cha pachu lymâ aw,” tah ta. 13Châhrasala Mawsi ta, “Hy ei Beipa, ngiachhiepa ta chyhsa hropa tuah thlâh ha mah y,” tah ta. 14Abeipa cha Mawsi chô liata a pathi ia ta, a hnohta, “Na unawhpa Arawna, Livai chi y vei mâ? Ano cha bierei a thai kaw tahpa ei pahno. Moh teh, cha vaw dy awpa ta â vy huh. A cha hmô tita a palôh a tlâh ngaita aw. 15A hnohta bie reih aw chi ta, a pakah liata bie na soh lymâ aw. Nâma pakah nata ano pakah liata y aw na ta, nama tao awpa ei cha pachu lymâ aw ei. 16Ano ta nâma vyuhpa ta zawpi lâ bie reih aw ta, nâma châta pakah châ aw ta, nâ cha ano châta Khazohpa hawhta na châ aw. 17Chôchahrei he a chaba aw chi ta, he hmâpa heta hmonoâhpazy na tao aw,” tah ta.

Mawsi Izi râh lâ a kua

18Mawsi cha a puhpa Zetharô lâ a lie ta, a hnohta, “Izi râh liata ei unawh a ypazy ama hroh ma tahpa pahno awpa ta, ngiachhiepa ta âmo lâ na pasiesa mah y,” tah ta. Zetharô ta Mawsi hnohta, “Thlalôhpa ta sie mah y,” tah ta. 19Mawsi cha Midia râh liata a y thlâh ha nota, Abeipa ta a hnohta, “Sie la, Izi râh lâ kua mah y. Thie châ chhuahpazy kha ama thi khai haw,” tah ta. 20Chatanachata Mawsi cha a lapinô nata a sawchapawzy a chhi ta, âmo cha alâ chô liata pakiasa ta, Khazohpa chôchahrei a chabapa ta, Izi râh lâ cha kua ta.

21 Abeipa ta Mawsi hnohta, “Izi râh lâ na kua tita, hmonoâhpa tao theina ei cha piepa zydua kha, Phiraoh hmiakô liata tao tlai mah y. Châhrasala a palôh kuh pachhasa aw na ta, phopi cha pasiesa aw vei. 22Chatawhcha Phiraoh hnohta, ‘Abeipa ta hetana heta a tah: Izarei cha ei sawchapawpa, ei sawchapaw uhtheipa a châ. 23#Pua 12.29Ei sawchapawpa ta eina chakao thei nawpa ta, ano cha pasiesa mah y, cha tah na ta, a sie awpa na pasai vei khiahta cha, pachâ teh, na sawchapawpa, na sawchapaw uhtheipa tlai ei thie aw,’ tahpa ta na chho aw,” tah ta.

24Lâpi liata riebu liata, Abeipa ta Mawsi cha a tyh ta, thie a chhuah ta. 25Zipôrâ ta pachielô chaizôh la ta, a sawchapaw chopaw tai ta, cha chata Mawsi phei kei hriana ta, “Ei châta thisaih a palopa myuhneituhpa na vaw châ tlai he!” tah ta. 26Chatanachata Khazohpa ta Mawsi cha pahlôh ta, chopawtaipa vâna chata Zipôrâ ta, “Thisaih a palopa myuhneituhpa na châ” a tahpa a châ.

27 Abeipa ta Arawna hnohta, “Mawsi dy awpa ta râhchawhpa lâ sie teh,” tah ta. Arawna cha sie ta, Khazohpa tlâh liata Mawsi a kei tyh ta, a pahnâ ta. 28Mawsi ta Abeipa ta a tuana chhâpa bie zydua nata hmonoâhpa tao awpa ta bie a piepa zydua Arawna chho ta. 29Chatawhcha Mawsi nata Arawna cha sie ei ta, Izarei machâ zydua awpakhy ei ta. 30Abeipa ta Mawsi hnohta a reipa bie zydua Arawna ta reih pachhuah ta, zawpi mohmô ta hmonoâhpazy tao ta. 31Izarei phopi ta ama biereipa cha zo ei ta, Abeipa ta Izarei sawzy za tly ta, ama pasataonazy a za hmô haw tahpa ama thei nahta, ama luh a bôhpa ta Abeipa cha a chhy ei ta.

Currently Selected:

PUASAINA 4: MARVBSI

Highlight

Copy