HMOTAOPAZY 9

Sawla pipathina

(Hmt 22.6-16; 26.12-18)

1Sawla cha Abeipa pachupa sahlao pachhiparyna nata thie awpa kyhzy reih lymâ ta. Theihthai beichaipa lâ vawh ta, 2Lâpi zyhna py#9.2 He liata “Lâpi” he Krizyhna phôryhpa a châ. liata chyhsa ahy rai a hmô khiah ei ta cha, a chapaw chanô ta chahrypa ta, Zerusale lâ â vaw chhi thei nawpa ei ta, Dâmaskâ pakhyna ozy liata pie awpa châzy hiah ta. 3Sie ta, Dâmaskâ a tlô chy ta, avâ tawhta khaihpa ta a chheipâh liata eikhapi ta phu vaw khaih ta. 4Alei liata pao ta, ao thei ta, ao chata a hnohta, “Sawla, Sawla, khazia eina taola chi?” tah ta. 5Sawla ta, “Abeipa, ahy ma na châ?” tah ta. Ano ta, “Zisu, na taolapa kha ei châ. 6Thyu la, khihpi liata a ngia teh, na tao awpa ama cha chho aw,” tah ta. 7A hnohta a sie hrapazy ta ao cha thei ei ta, châhrasala chyhsa ahy hmah hmô leipa ei ta, noâhpa ta a duah ei ta. 8Sawla cha alei tawhta kaw thyu ta, a mo vaw padeih ta, khâpa hmah hmô thei khao leipa ta. A ku ta chaao ei ta, Dâmaskâ lâ a chhi ei ta. 9Noh thôh chhôh cha hmô thei leipa nata khâpa hmah niedoh leipa ta y ta.

10Dâmaskâ liata pachupa pakha, a moh Anania ama tahpa y ta. Abeipa ta aluahna ta a hnohta, “Anania,” tah ta. Ano ta, “Abeipa, he liata ei y,” tah ta. 11Abeipa ta a hnohta, “Thyu la, Lâpi Patlâpa ama tahpa lâ vawh la, Zudâh o liata Tarsâ khihpa, a moh Sawla ama tahpa kei tlua teh. Ano cha thlahchhâ hai ta, 12chyhsa pakha a moh Anania ama tahpa a o lâ a vaw ngiapa ta, a mo pavâ nawpa ta a chô liata ku a pahniehpa kyh aluahna ta a hmô,” tah ta. 13Anania ta a chhy ta, “Abeipa, cha chyhsa kyh cha chyhsa hluhpi tawhta ei thei mâh tâh. Zerusale liata na mopathaihpazy chô liata hmo chhiepa thata a taopa kha a châ. 14He lia chhao ta, na moh a padopa zydua chahry theina biehneina theihthai beizy tawhta piepa a châ,” tah ta. 15Châhrasala Abeipa ta a hnohta, “Vawh thlâh teh, ano cha Zenitaizy, abeizy nata Izarei sawzy lâta ei moh a ngiakheituhpa châ awpa ta, ei chhaichhi châta raopa a châ. 16Ei moh vâta riethei khatlu ta ma a tao aw tahpa ei pahmôsa aw,” tah ta. 17Anania cha pua ta, Sawla yna o liata a kei ngia ta. A chô liata a ku pahnieh ta, “Unawh Sawla, na mo pavâ nawpa nata Thlahpa Pathaihpa biepa ta na y thei nawpa ta, na vaw siena lâpi liata na hnohta a vaw luahpa Abeipa Zisu khata eina vaw tuah,” tah ta. 18A mozy tawhta phuhlupa hawhta thlai za tla ta, a mo vaw pavâ ha ta. Chatawhcha thyu ta, bâti châ ta. 19Pati nie ta, a tha vaw y ha ta. Sawla cha Dâmaskâ liata pachupazy hnohta, noh khazie tlyma y ta.

Dâmaskâ liata Sawla bie a chho

20Sawla ta Zisu cha Khazohpa Sawchapawpa a châ tahpa pakhyna ozy liata thlai chho ta. 21A bie a theipa zydua ta ama noâh kaw ta, “He chyhsa he Zerusale liata, he moh a padopazy a taola tyhpa kha châ vei mâ? Cha chyhsazy cha chahry ta, theihthai beizy lâ a chhi awpa ta, he lâ â vypa châ vei ma,” tah ei ta. 22Sawla cha a thatlô via lymâ ta, Zisu cha Mesia a châ tahpa ta chhopasia ta, Dâmaskâ liata Zu chyhsa a ypazy cha cha-ohsa thlâh tyh ta.

Sawla Dâmaskâ tawhta â râ

23 # 2 Kaw 11.32,33 Noh hluhpi a khô tawhta, Sawla thie awpa ta Zuzy cha a chhohia ei ta. 24Châhrasala Sawla ta ama hmochhuahpa cha pahno ha ta. Thie awpa ta thokhy chhikao liata chhô nah zâ ta a byh ei ta. 25Châhrasala a pachupazy ta Sawla cha zâ ta a chhi ei ta, thokhy opy lâ tawhta hrâbyh ta pathliah ei ta.

Sawla Zerusale liata

26Sawla cha Zerusale a tlô nahta, pachupazy hnohta a pahlao awpa a chhuah ta. Pachupazy ta Sawla cha chi kaw ei ta, pachupa a châ hrapa cha zo leipa ei ta. 27Bânabâ deikua ta ano cha a pyh ta, lyuhchâpazy lâ vawkhei ta, lâpi liata Abeipa hmô ta, Abeipa ta a hnohta bie â chhopa kyh zy, Dâmaskâ liata Zisu moh ta riahpha ngaitapa ta bie a chhopa kyh zy pachupazy hnohta reih ta. 28Chatanachata Sawla cha Abeipa moh ta riahpha ngaitapa ta bie chhopa ta, Zerusale liata pachupazy hnohta a ngia heih, pua heih tahpa ta y ha hra ta. 29Krikâh Zuzy hnohta bie reipa ta, ama biezy chakhia tyh ta. Krikâh Zuzy ta Sawla cha thie a chhuah ei ta. 30Cha thâtih cha unawhzy ta ama pahno nahta, Kaisaria lâ zukhei ei ta, Tarsâ lâ pasiesa ha ei ta.

31Chatanachata Awnanopa sahlaozy cha Zudia râh, Kâlili râh nata Samâri râh zydua liata a i via rilipa ta, thlalôhpa ta y ei ta. Abeipa china liata nata Thlahpa Pathaihpa thlapalôhna liata hroh ei ta, ama pôh via lymâ.

Ainia patlâhna

32Pity cha khih zydua chahryh ta, Lydâ khih liata mopathaihpazy lâ zu ta. 33Cha liata chyhsa pakha a moh Ainia ama tahpa, asypa vâta kô charie rakhô liata a zia hapa hmô ta. 34Pity ta a hnohta, “Ainia, Zisu Krista ta a cha patlâh haw, thyu la na hmohphaw loh teh,” tah ta. Thlai thyu ha ta. 35Lydâ mo nata Saraw mo zydua ta Ainia cha hmô ei ta, Abeipa lâ a heih ha ei ta.

Dawkâsi pathyuna

36Zôpâ liata Tâbi ama tahpa pachupa pakha y ta. A Krikâh moh cha Dawkâsi#9.36 Hebrai reih ta Tâbi nata Krikâh reih ta Dawkâsi zy he “Sakhih” tahna a châ. a châ. Cha chanô cha hmotao phapa nata hmopiepa ta chakaona kyh liata a piepasai ngaitapa châ ta. 37Cha daihti liata Dawkâsi cha pasa ta, thi ha ta. A ngai ama pasi khai nahta, o chô chhôhpadâhpa liata pazia ei ta. 38Lydâ khih cha Zôpâ khih kiapâh liata a ypa vâta, cha liata Pity a ypa pachupazy ta ama pahno nahta, ano lâ chyhsa pano tuah ei ta, a hnohta, “Hawh leipa ta keimo lâ a vy mah y,” tahpa ta a haw ei ta. 39Pity cha thyu ta ama hnohta sie ta. O a tlô nahta, o chô chhôhpadâhpa lâ a chhi ei ta. Nôhmei zydua cha a kiapâh liata a duahpa ta, Dawkâsi a hro nota viahkao a biehpa nata chysia hropa a biehpazy pahmô ei ta, thata cha ei ta. 40Pity ta ama zydua khôtho lâ papua ta, pakhu paneihpa ta thlahchhâ ta, athihpa ri lâ a heih ta, “Tâbi, thyu teh,” tah ta. Tâbi cha a mo vaw padeih ta, Pity a hmô nahta, a kaw tyuh ta. 41Pity ta a ku hlâ ta, Tâbi cha pathyu ta. Mopathaihpazy nata nôhmeizy cha aw ta, Tâbi cha a hrohpa ta âmo pahmô ta. 42Cha thâtih cha Zôpâ khih zydua ta pahno ei ta, chyhsa hluhpi ta Abeipa cha a ngiapâ ha ei ta. 43Pity cha Zôpâ khih liata savo taotuhpa Saimaw o liata tlô ta, cha liata noh hluhpi châh ta.

Currently Selected:

HMOTAOPAZY 9: MARVBSI

Highlight

Copy