HMOTAOPAZY 28

Pawla Maltâ liahpahlô liata

1Eima pua khai tawhta, liahpahlô moh cha Maltâ a châ tahpa pahno pi ta. 2Cha liahpahlô chyhsazy chata miah ngiachhie ngaita ei ta. Avâ suah pathao ha ta a chasi kawpa vâta, mei patih ei ta, eima zydua ta miah a vaw ly ei ta. 3Pawla cha tho pakhy ta, mei liata vaw ti ta, a sahpa vâta vâzi vaw pua ta, a ku liata chazei ta. 4Cha râh chyhsazy ta parih a ku liata â bangieh thlâh hapa ama hmô nahta, “He chyhsa he lianycheihpa a châ tlai aw. Tilaipi tawhta pua hra sala, ryureina dopa ta a hroh awpa pasaih pyly vei,” tah ei ta. 5Châhrasala parih cha mei liata chatho pathlah ta, kheihta hmah y leipa ta. 6A vaw thloh aw tlyma, eikhapi ta paopa ta a thi aw tlyma, tahpa ta Pawla cha moh thlâh ha ei ta. Bohpi hâ ei ta, kheihta hmah a y leipa ama hmô nahta, ama palôh anano ta, khazoh a châ hih, tlao tah heih ei ta.

7Cha su chheipâh liata liahpahlôzy cha, Bei Publia râh châ ta. Ano chata miah a vaw ly ta, noh thôh chhôh a ly kawpa ta a o liata miah patlôsa ta. 8Publia paw cha chasipa nata thisaih chhôhpatlaipa ta pasapa ta a vaw zia thlâh ha ta. Pawla cha a ngia ta, thlahchhâ ta, a chô liata a ku pahnieh ta, patlâh ha ta. 9Cha hawhta hmo a ypa cha ama pahno nahta, liahpahlô chyhsa hropa pasana a hneipazy a vy ei ta, patlâhpa ta y ei ta. 10Chatanachata Maltâ liahpahlô chyhsazy chata thata miah palyupalih ei ta, eima sie chy ta, eimâ ngiahpazy balyh liata vaw soh ei ta.

Pawla Rawma a tlô

11Thla thôh a khô tawhta, liahpahlô liata chasipaw daihti a hmâhpa Alezandria balyh, maphieh khazohzy#28.11 “Maphieh khazohzy” he Krikâh khazoh Kâstaw nata Pôlu zy ama châ. ama tahpa ta sie pi ta. 12Syraku khih liata a pahâ pi ta, cha liata noh thôh châh pi ta. 13Cha tawhna chata chahlô pi ta, Rezia khih tlô pi ta. Noh kha eima sie tawhta, chho thlih vaw pathli ta, a noh nona liata Putôli khih tlô pi ta. 14Cha liata unawhzy hmô pi ta, ama hnohta noh sari châh awpa ta miah thlyu ei ta. Chatawhcha Rawma tlô pi ta. 15Unawhzy ta eima thâtih ama thei nahta, a vy ei ta, Apia Daohpi nata Khichhai Bu Miathôh ama tahpa taihta miah vaw dy ei ta. Âmo cha a hmô nahta, Pawla cha Khazohpa lâ alyna bie reih ta, thlalôhpa ta y ha ta. 16Rawma eima tlô nahta, Pawla cha vaituhpa pheisaih hneipa ta, ano kho ta y awpa ta pasaipa châ ta.

Pawla Rawma khihpi liata

17Noh thôh a châ tawhta, Pawla ta Zu chyhsa hyutuhpazy awpakhy ta, amâ vypakhy nahta, ama hnohta, “Unawh saih u, eima phopi nata miah pathlatuhpazy phoryhpa chakhiapa ta khâpa hmo hmah ei tao leina chôta na patâh ei ta, Zerusale tawhta Rawma mo ku liata hlâpa ei châ. 18Bie eina hiahri no ei ta, leihpa ei châna kyh liata, thina ta hrie tlâh awpa khâpa hmah a y leipa vâta, na pathlie awpa ama khoh. 19#Hmt 25.11Châhrasala eina pathlie awpa ei cha, Zuzy ta ama ei hapa vâta, ei phopi leih nawpa khâpa hmah ei hnei leipa chhao ta, Kaisarâ kô a tlô lei thei awpa châ khao va na. 20Cha kyh vâna chata, nâmo châ hmô awpa nata bie cha reikhei awpa ta ei châ hawpa ei a châ, Izarei hnabeiseihpa vâta, he bâlia he a kypa châ tlôh na ta,” tah ta. 21Âmo ta a hnohta, “Nâma kyh liata Zudia râh tawhta châ hmô leipa pi ta, he lâ a khypa unawhzy hry liata ahy hmahta na thâtih chhiepa a phuahpa y leipa ei ta, a reihpa y hra veih ei. 22Châhrasala he py he su to liata reipachhiepa châ tlôh ei ta, nâma ta kheihta ma na pachâ tahpa pahno eima khoh,” tah ei ta.

23A noh taih ei ta, cha noh liata a tlôna o liata chyhsa hluhpi ta vaw pangai ei ta. My tawhta zâlâ taihta âmo cha chhopasia ta, Khazohpa khinarâh a châhkheipa ta, Mawsi ryhpa nata hrohsopazy châbu liata Zisu kyh reipa ta Zuzy cha pahnie a chhuah ta. 24A bie reipa ta thokha cha pahnie ta, ahropazy deikua ta zo leipa ei ta. 25Ama bie a hmô thai khao leipa ta, Pawla ta bie miakha a rei khai nahta, ama pua haw. Pawla ta, “Thlahpa Pathaihpa ta hrohsopa Isai pakah ta châ pathlatuhpazy hnohta,

26 # Isai 6.9,10 “‘Cha phopi lâ cha sie la,

Hetana heta kei reih teh:

“Thei cha thei aw ei chi ta,

Châhrasala pahno thai aw veih ei chi,

Hmô cha hmô aw ei chi ta,

Châhrasala nama novâh aw vei.”

27Cha phopi palôh cha a kuhchha ha ta,

Ama nah ta phiephuh dei thei ta,

Ama mozy ama paso haw;

Chata châ vei sala cha,

Ama mo ta hmôpa ta,

Ama nah ta thei aw ei ta,

Ama palôh ta pahnopa ta,

A vaw lie aw ei ta,

Ei patlâh ha awpa ei tlai,’

tahpa ta a reipa kha â vaw do ngaita na. 28Chavâta Khazohpa pachhana bie cha Zenitaizy lâta paphaopa a châ haw tahpa pahno teh u. Âmo ta la ama nathlie aw,” tah ta. 29Cha biezy cha a rei khai nahta, Zuzy cha âmosasyh ta thata aeichhiana chôta pua ha ei ta.#28.29 Châh 29-na he hlâno kuropa Biehrai thokha liata y vei.

30Pawla cha kô no bohloh ano o a hlâpa liata y ta, ano lâ a chareipa zydua a vaw ly tyh ta. 31Riahpha ngaitapa nata pakhâna y leipa ta, Khazohpa khinarâh kyh reih ta, Abeipa Zisu Krista thâtih a pachu lymâ.

Currently Selected:

HMOTAOPAZY 28: MARVBSI

Highlight

Copy