HMOTAOPAZY 22

Pawla thaichâna bie

1Pawla ta, “Unawhzy nata pawzy saih u, tahmâ nama hnohta ei thaichâna bie ei rei awpa he nathlie teh u,” tah ta. 2Hebrai reih ta ama hnohta bie a reipa ama thei nahta, a chalih via pachai ei ta. 3#Hmt 5.34-39“Kei he Zu chyhsa châ na ta, Silisia râh Tarsâ khih liata a pihpa ei châ. Châhrasala Kâmalia phei thaby lia a chu na ta, he khihpi liata a laiseihpa ei châ. Miah pathlatuhpazy ryhpa â i ngaitapa ta pachupa châ na ta, tanoh nâmo zydua hawhna heta Khazohpa châta phahnai a ngiah ngaitapa ei châ tyh. 4#Hmt 8.3; 26.9-11He Lâpi zyhna chyhsazy he thina taihta taola tyh ei na ta, a chanô chapaw ta chahry na ta, patâhna o liata ei pakhôsa tyh ei. 5Theihthai beichaipa nata machâ zydua ta ei bie cha eina pahnokhei ei. Âmo tawhta Dâmaskâ liata ama chiheihzy lâta châ ama ropa a phaopa ta, Dâmaskâ liata Lâpi chyhsazy chahry ta, hrie awpa ta Zerusale lâ a vaw chhi awpa ta ei sie.

6“Dâmaskâ ei tlô chy ta, nohchhô lichih ta avâ tawhta khaih ngaitapa ei kiapâh liata eikhapi ta vaw khaih ta. 7Alei liata pao na ta, ei hnohta, ‘Sawla, Sawla khazia eina taola chi?’ tahpa ao thei na ta. 8Kei ta, ‘Abeipa ahy ma na châ?’ tah na ta. Ano ta ei hnohta, ‘Nâzari Zisu na taolapa kha ei châ,’ tah ta. 9Ei hnohta a ypazy ta khaihpa cha hmô ei ta, bie nâ chhotuhpa ao deikua thei veih ei. 10Kei ta, ‘Abeipa, khâpa ei tao aw?’ tah na ta. Abeipa ta ei hnohta, ‘Thyu la, Dâmaskâ khihpi liata a ngia teh. Cha liata na tao awpa ta raopa hmo zydua ama cha chho aw,’ tah ta. 11Khaihpa cha a pathlie tupa vâta, ei mo ta hmô thei khao leipa ta, ei hnohta a ypazy ta ku ta na chaao ei ta, Dâmaskâ cha a ngia na ta.

12“Cha liata chyhsa pakha, Anania ama tahpa y ta. Ano cha ryhpa bie hawhta Khazohpa a pachâpa nata cha liata Zu chyhsa a ypa zydua ta ama reithaipa a châ. 13Ano cha kei lâ a vy ta, ei kiapâh liata a vaw duah ta, ei hnohta, ‘Unawh Sawla, na mo pavâ mawh sy,’ na tah ta. Cha dawh lia tlai chata ei mo vaw pavâ ha ta, ano cha hmô thei ha na ta. 14Anania ta, ‘Miah pathlatuhpazy Khazohpa ta a khopa pahno awpa nata Mo Siapa hmô ta, a pakah tawhta ao thei awpa ta a cha rao. 15Na hmôpa nata na theipazy kha, chyhsa zydua hnohta pahnokheituhpa na châ aw. 16Khâpa na hâ khao? Tahmâ thyu la, a moh padopa ta bâti châ la, na moleinazy pasi teh,’ na tah ta.

17“Zerusale lâ a vaw lie na ta, Achhyna o liata thlah ei chhâ hai nota, a theihlô khao leipa ta vaw y na ta, 18Abeipa hmô na ta, ano ta ei hnohta, ‘A chatliepa ta Zerusale puasai para teh, ei thâtih nâ châhkheipa a pyh aw veih ei,’ na tah ta. 19Kei ta, ‘Abeipa, pakhyna o to liata châ ngiapâtuhpazy patâh ei na ta, ei chhei tyhpa kha pahno tlôh ei ta. 20#Hmt 7.58Na bie a pahnotuhpa Stiphana thisaih ama palo nota, kei chhao a kiapâh liata a duah na ta, paryhsa na ta, ano a thietuhpazy chysia a vaituhpa ei châ,’ tah na ta. 21Châhrasala Abeipa ta, ‘Sie mah y, lâhlapi ta Zenitaizy lâta ei cha tuah aw,’ na tah ta,” tah ta.

Pawla pheisaih hyutuhpa hmiakô liata

22Bie a rei khaina taihta nathlie ei ta. Chatawhcha ao paro ngaitapa ta, “He hawhpa chyhsa he leilô tawhta pahleipadia teh u! A hroh tlâh châ vei,” tah ei ta. 23Thata awh ei ta, ama pohzy hlaipa ta thy ei ta, buchadoh pathluah ei ta. 24Pawla cha pheisaih su lâ a chhi awpa ta, pheisaih hyutuhpa ta biepie ta. Cha tlupo ta ama awh chiena chhâpa pahno awpa ta, Pawla cha chhei ta, hiahri pasia awpa a chhuah ta. 25Savo ri ta chhei awpa ta ama chahry khai nahta, Pawla ta a kiapâh liata a duahpa pheisaih za kha hyutuhpa hnohta, “Rawma chyhsa nata thailei pachâsa leipa chhei awpa dâh ta a pasaih ma?” tah ta. 26Cha bie cha pheisaih za kha hyutuhpa ta a thei nahta, pheisaih hyutuhpa lâ vawh ta, a hnohta, “Na tao awpa he pachâ pasia mah y. He chyhsa he Rawma chyhsa a châ,” tah ta. 27Pheisaih hyutuhpa a vy ta, Pawla hnohta, “Rawma chyhsa na châ ma, na chho teh?” tah ta. Pawla ta, “Ei châ,” tah ta. 28Pheisaih hyutuhpa ta, “Kei cha Rawma chyhsa châna he sôh hluhpi ta a chaleipa ei châ,” tah ta. Pawla ta, “Kei la, Rawma chyhsa ta a pihpa na ei châ,” tah ta. 29Bie hiahri pasia a chhuahpazy ta Pawla cha thlai a sysai ei ta, pheisaih hyutuhpa chhao ta Rawma chyhsa a châpa a pahno nahta, Rawma chyhsa a chahry hapa cha chi kaw ta.

30A mylâ ta, Zuzy ta ama leihna chhâpa hmeiseihpa pahno a chhuahpa ta, pheisaih hyutuhpa ta Pawla chahryna cha pathlâ ta. Theihthai beizy nata ryureituhpa zydua a hmaoh awpa ta biepie ta. Pawla cha a zâ chhi ta, ama hmiakô liata paduasa ta.

Currently Selected:

HMOTAOPAZY 22: MARVBSI

Highlight

Copy