HMOTAOPAZY 11

Zenitaizy ngiapâna

1Zudia râh zydua liata lyuhchâpa nata unawh a ypazy ta, Zenitaizy chhao ta Khazohpa bie ama zyh haw tahpa pahno ei ta. 2Chatanachata Pity cha Zerusale lâ a khy nahta, chopawtaipa sahlao ta ano cha reipachhie ei ta, a hnohta, 3“Chopawtai leipazy o liata a ngia chi ta, ama hnohta pati zy nie chi ta,” tah ei ta. 4Pity ta a thaby tawhta pathaopa ta âmo cha chhopasia ta: 5“Zôpâ khihpi liata thlahchhâpa ta ei y nota, aluahna hmô na ta, poh lai ngaitapa a lyupa za chô ta, ki palih buhpa ta, avâ tawhta zâ pathliahpa ta, kei lâ a zu ta. 6A phapa ta moh na ta, moh pasia na ta, phei palih a hneipa râhsazy, alyhpasazy, avâ pavawzy hmô na ta. 7Chatawhcha ao thei na ta, ao chata ei hnoh ta, ‘Pity thyu la, thie la, nie teh,’ na tah ta. 8Châhrasala kei ta, ‘Abeipa, châ vei, ânapa nata a pathaih leipa khâpa hmah ei pakah liata a ngia beih vei,’ tah na ta. 9Châhrasala ao chata a ei nona ta nâ vaw chhy ta, ‘Khazohpa ta a pathaisa hapa cha, nâma ta âna tah khah y,’ tah ta. 10Cha hawhna chata ei thôh vaw y ta, hmo to zydua cha avâ lâ chalo pakhua hapa a châ. 11Cha daihti lia tlai chata eima yna o liata chyhsa pathôh vaw tlô ei ta, âmo cha keima dy awpa ta Kaisaria khih tawhta a vypa ama châ. 12Thlahpa ta noraih leipa ta âmo cha zi awpa ta na chho ta. He unawh pacharuzy chhao he na sielâh hra ei ta, nâ vaw padysatuhpa chyhsa o liana cha a ngia pi ta. 13Ano chata eima hnohta, a o liata vâlyuhchâpa a duahpa a hmônazie nata a hnohta, ‘Zôpâ khih lâ chyhsa tuah la, Saimaw Pity ama tahpa kei padysa mah y. 14Ano ta bie cha chho aw ta, cha bie chata nâ nata na chhôhkhazy pachhapa ta nama y aw,’ a vaw tahpa kyh miah chho ta. 15Bie cha reih pathao na ta, Thlahpa Pathaihpa eima chô liata a vaw tlô tua no hawhna khata, âmo chô lia chhao ta vaw tlô ta. 16#Hmt 1.5Chatawhcha Abeipa ta, ‘Zawhâna ta ti ta bâti pachâsa ta, châhrasala nâmo la Thlahpa Pathaihpa ta bâtipa nama châ aw,’ a tahpa bie kha a vaw thei na ta. 17Cha hawhta, keimo Abeipa Zisu Krista eimâ ngiapâ nota Khazohpa ta miah a piepa hmopiepa cha, Khazohpa ta âmo a pie ha hra khiah ei ta cha, Khazohpa lâpi liata chybâlâkhâ châ awpa ta, kei he ahy ma ei châ?” tah ta. 18Cha biezy cha ama thei nahta, a chalih ha ei ta. “Chata a châ khiahta cha, Khazohpa ta Zenitaizy chhao, ropa ta hroh awpa a pasai ha ei chuh,” tah ei ta, Khazohpa reithai ei ta.

Antiôkâ Awnanopa

19 # Hmt 8.1-4 Stiphana kyh vâta taolana amâ tyh nota a paipatlapazy kha Phônisia râh lâ zy, Kuparâ liahpahlô lâ zy, Antiôkâ khih lâ zy taihta sie ei ta, Zuzy hnoh dei leipa ta cha, ahy hnohta hmah bie chho leipa ei ta. 20Ama hry liata thokha cha Kuparâ liahpahlô nata Kurini chyhsazy châ ei ta, cha chyhsazy chata Antiôkâ khih ama tlô nahta, Krikâh mo hnohta chhao bie reih ei ta, Abeipa Zisu thâtih chho ei ta. 21Abeipa ku ta âmo cha a châhkhei ta, chyhsa hluhpi ta a ngiapâ ei ta, Abeipa lâ a heih ei ta. 22Ama thâtih cha Zerusale liata Awnanopa nakhaoh liata a ngia ta, Bânabâ cha Antiôkâ lâ tuah ei ta. 23Bânabâ cha Antiôkâ tlô ta, Khazohpa ngiachhiena raihria a hmô nahta, a ly ngaita ta, achhuahna a ipa hneipa ta, Abeipa châta ngâchhih awpa ta âmo cha pasyu ta. 24Bânabâ cha chyhsa phapa châ ta, Thlahpa Pathaihpa nata ngiapâna ta a biepa a châ. Chatanachata chyhsa hluhpi Abeipa lâ baichhapa châ ei ta. 25Bânabâ cha Sawla tlua awpa ta Tarsâ lâ sie ta. 26A hmô nahta, Antiôkâ lâta a vaw chhi ta. Kô kha chhôh tlai Awnanopa apakhyna liata a hlao ei ta, chyhsa hluhpi ama pachu lymâ. Antiôkâ liana heta pachupazy cha Krizyhpazy tahpa ta aw tuapa ama châ.

27Cha nohzy liata, hrohsopa thokha Zerusale tawhta Antiôkâ lâ zu ei ta. 28#Hmt 21.10Ama hry liata pakha a moh Akabâ ama tahpa a duah ta, Thlahpa pahnosapa ta khizaw zydua liata chakâh mozoh a tlô awpa kyh chhochhielie ta. Cha chakâhna cha Klaudia â bei nota a vaw tlôpa a châ. 29Chatanachata pachupazy cha, ama tao theipa rakha chyu ta, Zudia râh liata unawh a ypazy lâ baona paphao a chhuah ei ta. 30Amâ chhuahpa hawhna chata tao ei ta, machâzy lâta Bânabâ nata Sawla ku liata paphao ei ta.

Currently Selected:

HMOTAOPAZY 11: MARVBSI

Highlight

Copy