Zekaria 9
9
Wɛ wó waare Isarele tiina bam dona
Teene delo na bwola de Isarele to taane
1 Baŋa Wɛ kwora mo tento. Ka nam jege se ka vo Haderake laŋa kam seeni, ko fɔge ko dae Damasika teo kom mo. Isarele dwia yam maama, ko woli de nabiina maama yia page Baŋa Wɛ baŋa ne#9:1 naa Baŋa Wɛ yi page nabiina maama de Isarele dwia yam maama baŋa ne mo.
2Hamafa teo kolo na bwola da to tiina yia de page o baŋa ne, ko woli de Tura teo tiina, de Sidon teo tiina, de ba yiyiu kom na ye tei to de.
3Tura tiina bam lɔge dam jei mo ba pa ba tete. Ba ma kwaleme lu-nyenno wonnu, pa te daga ne tega kasolo tei to. Ba ta ma la sabu-seŋa jejegero dedɛ ba tiŋi ne te ye chwoŋa yuu weeru mo tei. 4Baŋa Wɛ nam wó vere ba jejegero tem, o daare o dole ba dam maama o de naneo kom wone. Mini mo wó zwɛ teo kom maama.
5Asekelon teo tiina wó na konto ye foone yɔɔre de ja-ba.
Gaza teo tiina de yera maa wó chɛ, ne ba ga virigi puga mo to.
Ekoron teo tiina bam de wó na ko na ke tei, pa se ba teena maama ti.
Gaza teo pɛ wom wó jei, ye Asekelon teo de ji di-dwonnu yerane.
6Nɔn-gongwaaga mo wó jwoŋi Asedodi teo ba taa tei.
Amo Baŋa Wɛ lage a pa Filisi tiina bam kamunim dem ti mo.
7Amo nam wó pa se ba daa bá do nɔna de ya yera jana, se wodi-zɔɔna daa yé taa wo ba nia ne.
Ba nɔɔna balo na daare to wó woli amo tete nɔɔna bam wone mo, pa se ba ji nenɛɛne Judah dwi tiina sɔ-yuu kodwoŋi. Konto to, Ekoron teo tiina wó gwaane de a nɔɔna bam, ne Jebusi tiina bam de déem na ke tei to.
8Ko nam ná ye a tete teo kom, a lage a che-ko mo se ko dona bam daa yé tɔge da ba kɛ. Nɔɔn-nɔɔno daa bá na chwoŋa se o bɛɛse a nɔɔna bam. Amo tete yi laam mo wó taa page ba baŋa ne.
Wɛ Dam Tu wom tutuuri dem taane
9Zion tiina bam,
ta‑á di-na ywoni lanyerane!
Jerusalem teo tiina bam,
ta‑á chaka de kwor-dɛa!
Nii-na á pɛ wom na vei o beene á tei!
O ye chega tu mo ye o di wɔnɔ.
O nam tu o tete mo
ye o di bonaga o beene.
Chega to, o dɔge bona-pɔla baŋa ne mo o via.#Matiyu 21:5; Jɔn 12:15
10Amo wó pa se jara-keim torokooro ti
Efrayim laŋa kam ne,
se jara-keim sisein-nɔɔna de ti
Jerusalem teo ne.
Taŋa kalo maama ba na mae
ba ke jara to de wó bwori.
Pɛ wom wó tɔɔle we,
yazura taa wo dwi tiina maama tei ne falalala.
O paare wó di de zege
naneo dedoa ni ne,
se ko yi kadwoŋi ni.
De ta wó zege Yuferata buga kam ne mo,
se de vo de yi tega baŋa ni maama.#Lei 72:8
11Ko nam ná ye abam Zion tiina bam, amo na tɔge jana baŋa ne a ke ni-gwonim de abam to ŋwaane mo a lage a liiri balo ba na jaane á wone ba peene to a ja a nwoŋi ba vole-kore dem wone.
12Pipiri á jwoori-na á dalem jei sem ne, abam peena balo teena na daga to. Amo tɛ de abam we, a wó pa á jwoori á na kolo á na gɛ to kuni belei. 13A lage a ke de Judah ne a taŋa mo a saŋe to, se a daare a kwei Efrayim a ke da, ne ko ye a chena mo tei to.
Zion tiina bam, a lage a kwei abam mo a pa á zaŋe á kwaare jara de Girisi tiina bam. Á wó ta‑á nye de jara-keim se-zɔɔ mo a jeŋa ne.
14 Baŋa Wɛ wó pi o nwoŋi o nɔɔna bam baŋa ne se o woli-ba. O taŋa chena yam lage ya taa vei mo de fora ne doa na pepele tei to.
Yuu-tu Baŋa Wɛ wó wu o nabɔnɔ. O maa wó tɔge tega-kuri seeni vo-dɛɔ baŋa ne o vo o zo jara yam wone.
15Paŋwa Tu Baŋa Wɛ tete wó kwoli o nɔɔna bam. Ba dona bam ná dole-ba de kandwa tei maama, ba wó nɔne-ba ba se tega ne.
Ba maa wó nyɔ sana ye ba bage de dam, ne sa-nyɔra na ke tei to.
Ba wó di ywoni ba su, ne zoŋa na su de jana ye ba kwei-ba ba miisi kaanem bimbini dem yera ne tei to.
16Dɛ dem konto ne mo ba Tu Baŋa Wɛ wom wó jwoŋi-ba o yage, ne nayero na nii o pei-kɔgɔ baŋa ne tei to, ba na ye o nɔɔna to ŋwaane.
Ba ná zoore wonto tete tega kam wone, ba wó taa nyeene mo ne kandwa-nyenno na nyeene paare yipuga yera ne tei to.
17Nii ba lam na tiini de jege fera tei! Nɔn-donno, de bukwa wó di tega kam wodiiru mo, ye ba nyɔ ka sa-doora se ba ma na dam.
Currently Selected:
Zekaria 9: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
