Zekaria 4
4
5. Sabu-seŋa min-zwon-zego taane
1Maleka kalo ya na ŋɔɔne de amo to ma ba o susugi-ne, nenɛɛne a ya yɔɔre a dɔ mo to. 2O ma bwei-ne o we, “Bɛ mo nmo nɛa?” A ma leiri a we, “A nɛ min-zwon-zego ba na mɛ sabu-seŋa ba mɔ ko maama to mo. Zoŋa mo wo ko yuu kom seeni de ka wo nuga. Min-zwonnu terepɛ maa wo zego kom baŋa ne. Te maama dedoa dedoa maa jege nia yarepɛ. 3A nam ta nɛ Olivi teeni delei, pa dedoa zege zoŋa kam jazem seeni, ye kokom kom de zege ka jagwia seeni.”#Gurim 11:4
4A ma bwei maleka kam na zege ka ŋɔɔne de amo to a we, “Amo tu, wonnu tento kuri ye bɛ mo?” 5Maleka kam de ma jwoori ka bwei-ne ka we, “Nmo yeiri wonnu tento kuri na?” A ma leiri a we, “Aawo.”
6O laam ma ta de amo o we, “Baŋa Wɛ na jege kwora kalo se o pa Zerubabel to mo tento: ‘Ko dae nmo bembɛɛne ŋwaane, naa n dam ŋwaane mo n lage n na yiga-veiŋa, se ko ye amo tete Jworo ŋwaane mo.’ Paŋwa Tu Baŋa Wɛ na tage kolo to mo konto.
7Peo-zɔŋɔ kom na chege Zerubabel yiga to, n bere we n ye bɛ mo? Zerubabel yiga ne n jege se n palese mo n ji te-kampare. O laam maa wó ja kandwɛ delo na wó guri Wɛ diga kam to o ja o nwoŋi o ke da, se nɔɔna bam maama taa bage ba yaga we, ‘Wɛ zaane dem ŋwaane! Wɛ zaane dem ŋwaane!’ ”
8 Baŋa Wɛ laam ma pa-ne o kwora o we:
9“Zerubabel mo nii pa ba bobo Wɛ diga kanto kuri ba chwi ka biri-beira kam. Wonto nam ta mo wó pa ba lɔ-ka ba guri. Abam laam wó lɔre we ko seene ko ye Paŋwa Tu Baŋa Wɛ mo toŋe-ne abam tei ne. 10Wolo maama ná nɛ Wɛ diga kam lɔɔm na bobo mɛmɛ tei to ye o gwooni totoŋe dem, kotu wó ba o taa chaka de Zerubabel na zei lɔra ŋona ye diga kam lɔɔm kɛ yiga tei to.”
Maleka kam ta ma leiri-ne ka we:#4:10 Maleka kam leiri bwia yalo Zekaria ya na bwei‑o to (4:4-5).
“Min-zwonnu terepɛ tem nam zege te pae Baŋa Wɛ yia yam na dole ya kaare tega baŋa ni maama to mo.”
11Amo daa ma bwei maleka kam a we, “Olivi teeni delei dem na zege min-zwon-zego kom jazem seeni de ko jagwia seeni to kuri ye bɛ mo?” 12A ta ma bwei a we, “Se ko ná ye Olivi teeni nɛ selei sem na wo sabu-seŋa wo-worru telei tem nuga kam na tɔge te wone ka lwoi ka yage to saŋa ne to, se kuri ye bɛ mo?” 13O de ma jwoori o bwei-ne o we, “Nmo yeiri wonnu tento kuri na?” A ma leiri a we, “Aawo.”
14O laam ma ta o we, “Nɛ selei sem konto zege se pae yiga tiina balei balo ba na tiŋi se ba taa toŋe ba pa ba Tu Wɛ wom na tei logo baŋa ni maama to mo.”
Currently Selected:
Zekaria 4: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
