Obadia 1

Lɛɛro na wó yi Edom tiina tei to

1Yuu-tu Baŋa Wɛ na veere wonnu telo o bere Obadia ye te ye Edom tiina yera taane to mo tento:#Ezekeli 25:12-14

Dé nigi kwora kanto Baŋa Wɛ tei ne mo. O toŋe nɔɔno se o vo logo baŋa teene dem wone mo se o ta we, “Zaŋe-na se dé vo dé kwaare jara dedaane Edom tiina bam.”

Baŋa Wɛ nam tage tento mo de Edom tiina bam:

2“Nii ywo! Amo lage a pa se á teo kom mo tiini ko taa bwona teene dem maama wone. Nɔɔna wó taa jege abam ba tiini ba yaala. 3Abam bere á tete kamunim. Á nam jege á tete mo á gana. Á zoore peero bɔɔna wone, dedaane peero tem yuu ne wɛ-wɛ. Á boŋe á wone we, nɔɔn-nɔɔno bá wane abam o vaare o de tega ne. 4Abam ná maŋe á di wɛyuu, nenɛɛne maao na jaane wɛ-wɛ tei to, naa á ná lage á sɔ pwogo chalechwe sem tetare ne de, amo ta wó vaare abam a de tega ne.”#Jeremia 49:16

Baŋa Wɛ na tage tei to mo konto.

5“Lɛɛro mo wo á baŋa ne! Ŋweena ná tu á sɔŋɔ se ba ŋɔ tete ne, ba bá ŋɔ wonnu telo yerane ba na beeri to mo na? Nɔɔna ná tu se ba gwori Vini tio-bia, ba yeini ba ba gwori ba daare tio-bia badwonna na? 6Ko nam ná ye Esawu dwi tiina bam#6 Esawu dwi tiina bam = Edom tiina bam, á dona wó beeri ba buŋi á jei sem maama ne ba vere wonnu telo maama na jege kuri te pa abam to mo ba daare abam. 7Á fara bam tete mo lage ba zeili abam se á nwoŋi á duri á daare á tega kam. Balo na gwoni ni de abam to tete lage ba lɔ á kwaga ne mo se ba wane abam ba di. Á badwoŋ-swonnu tem wó che kalanchogo se ba ma ba ja abam, ye á yeiri ko ni ne.”

8 Baŋa Wɛ ta ma ta o we:

“Dento dɛ dem ná yia, amo wó chɔge swa tiina balo maama na zoore Edom ne to, dedaane yi-pore-nyena na wo Esawu peero tem#8 Esawu peero tem = Edom tega kam seeni to. 9Ko ná ye nɔn-babɛ selo na zoore Teman teo wone to, foone wó ja-ba. Ko daare balo maama na ye Esawu dwi dem to wó jei mo.”

Esawu dwi tiina na chɔge Jakob dwi tiina tei to

10“Abam déem tiini á ke puseŋa de á chorro tem na ye Jakob dwi dem to ye á go-ba. Konto ŋwaane mo abam wó di á chaveera, ye á daare á na chɔgem se ko taa vei wuu. 11Veira déem na tu ba fe ba zo Jerusalem teo wone se ba vere ko jejegero ba ja ba viiri to, á zege mo á nia ye á wo chege-ba. Veira bam konto na pɔɔre wonnu tem ba pa daane to, abam dedaane banto maama maŋe á ba gare daane.#2 Pwa 25:10-11

12Abam ya dae se á ta‑á mɔne á chaka de lɛɛro na yi á chorro tem tei to.

Abam ya dae se á ta‑á jege wopwolo dedaane Judah tiina bam na nɛ chɔgem tei to.

Abam ya dae se á ta‑á mage á nyɔɔna de banto cham dem.#Wo-chechɔgɔ 1:7

13Abam ya dae se á tɔge á zo amo nɔɔna bam teo kom wone

dɛ delo wone ba na nɛ ba lɛɛro tem to.

Abam ya dae se á ta‑á jege Judah tiina bam á mɔna

de ba na nɛ cham delo ba lɛɛro dɛ dem ne to.

Abam ya dae se á tɔge á pɛ ba jejegero á ta‑á tei

ba lɛɛro dɛ dem ne.

14Abam ya dae se á zege chwo-pwɛa yam ne se á go balo na duri se ba lu jara yam wone to.

Abam ya dae se á ja balo ta na daare to á ke ba dona bam jeŋa ne

ba cham dɛ dem ne.”

Baŋa Wɛ borem dɛ dem lage de yi

15“Amo Baŋa Wɛ dɛ dem lage de yi se a di logo baŋa dwi maama taane. Edom tiina bam, á de wó na á nyem, nenɛɛne á na ke nɔɔna badwonna tei to. Á keim-balwaaro tem lage te jwoori te to á tete yuu ne mo. 16Abam déem na wo amo tete peo kom yuu ne ye á nyɔ sana á su tei to, konto dwoŋi mo dwi-gɛ tiina bam de wó su de a ban-zɔŋɔ kom. Ba wó tiini ba nyɔ taa ba su, pa se ba yera laam saare logo baŋa ne. 17Ko daare Zion peo kom ne mo nɔɔna wó na verem. Jei sem konto wó taa ye wose se pa-ne. Jakob dwi tiina bam wó jwoori ba jwoŋi ba tega kam balo na vere-ka to tei ne ba taa tei. 18Jakob dwi dem wó chɔge ba dona ne mini na zwɛ wonnu tei to mo. Josɛf dwi tiina bam wó taa nye de min-vogo mo. Ba wó di Esawu dwi tiina bam kula, ne mini na yeini de zwɛ ga-korro tei to. Nɔɔn-nɔɔno daa bá daare Esawu dwi tiina bam wone.”

Baŋa Wɛ mo tage konto.

19Isarele tiina balo na zoore tega-kuri seeni kagoa kam ne to mo wó zo Esawu peero jei sem ne ba taa zoore da. Balo de na zoore wɛ-zoore seeni bwollu tem ne to maa wó jwoŋi Filisi tiina tega kam ba taa tei. Ba ta wó jwoŋi Efrayim laŋa kam de Samaria laŋa kam. Benjamin dwi dem wó jwoŋi Gilead laŋa kam ba taa tei. 20Isarele tiina balo maama ya na jage to wó jwoori ba zo Kanaan tega kam. Ba kɔgɔ kom wó jeini tega kam maama ne se ko vo ko yi Zarefate. Jerusalem tiina balo na jage ye ba wo Sefarade ne to de wó vo ba jeini teene delo na wo tega-kuri seeni kagoa kam ne to. 21Babɛ selo na jwoŋi ba nɔɔna ba yage to mo wó di Zion peo kom yuu. Ba wó taa tei Esawu peero laŋa kam maama. Kanto maŋa kam ne, Baŋa Wɛ mo wó di paare o nɔɔna baŋa ne.

Currently Selected:

Obadia 1: xsmKBG

Highlight

Copy