Maake 9

1O daa ta ma ta de-ba o we, “A tɛ abam chega ŋwaane to, nɔɔna balo zem na wo ywo-seeni to badaara bá te ye ba ta wo nɛ Wɛ paare dem na tu nɔɔna baŋa ne de dam to.”

Yezu yibia na leiri tei to

Matiyu 17:1-13; Luka 9:28-36

2Da yaredo déem ma ba ya kɛ. Yezu laam ma ja Piita ko woli de Jemsi de Jɔn pa ba tɔge daane ba vo ba di peo-kamunu yuu. Ba maa wora ba yerane mo. Ba na wora konto to, Yezu yibia ma leiri ba yiga ne. 3O gwaaro tem ma tiini te peere cha ye te nyeena. Te peere te gaale nabiinu na bá wane o zare o gwaaro pa te peere tei to. 4Elija de Moses ma pɔpɔ ba nwoŋi ba yiga ne, ye ba ŋɔɔne de Yezu.

5Piita laam ma ta de Yezu o we, “Berem tu, dé na wo ywo-seeni to, ko tiini ko lana ko pa debam. Nam pa dé pu vwoa yatɔ ywo-seeni, se nmo, de Moses, de Elija taa zoore da.” 6Foone déem zo-ba dedɛ. Konto ŋwaane mo o gare o ŋɔɔne konto dwoŋi.

7Kunkwoŋo laam ma ba ko li-ba. Ba ma ni kwora na ŋɔɔne ko wone ka we, “Amo bu-doa mo tento ye a swoi‑o lanyerane. Nam ta‑á cheigi-na o ni taane lanyerane.”#2 Piita 1:17-18

8Ba ma kwaane ba nii lela, ye ba daa wo nɛ nɔɔn-nɔɔno jei sem ne, ko ná dae Yezu yerane. 9Ba ma zaŋe peo kom yuu ne ba maa tua. Yezu laam ma kaane-ba we, ba yé ta kolo ba na nɛ to ba bere nɔɔn-nɔɔno, se ko taa nii maŋa kalo omo Nabiin-bu wom na wó bi toone wone to. 10Ba ma sɛ ye ba ŋɔɔne ba yerane ba bwɛ ba nii, ka-bi-toone-wone taane dem kuri mo bɛ.

11Ba laam ma bwei‑o ba we, “Wɛ nia zamesem tiina bam yeini ba tɛ ba we, Elija mo jege se o ba yiga, se Wɛ Dam Tu wom laam da kwaga. Ko ye chega mo naa vwa mo?” 12Yezu ma leiri-ba o we, “Ko ye chega mo. Elija jege se o da yiga o ba o kwɛ woŋo maama se Wɛ Dam Tu wom laam ba. Bɛ nam mo ye ko popone Wɛ tɔnɔ kom ne we, Nabiin-bu wom jege se o yaare dedɛ ye nɔɔna chuli‑o?#Izaya 53:3; Malaki 4:5-6 13Nam ta‑á yei-na we, Elija maŋe o ba, ye nɔɔna tiini ba bɛɛse‑o se ko yi ba boboŋa na lage tei to, ne ko na maŋe ko popone o ŋwaane Wɛ tɔnɔ kom ne tei to.”

Yezu yɔɔre bu wodwoŋi

Matiyu 17:14-23; Luka 9:37-45

14Yezu de o nɔɔna batɔ bam laam ma jwoori ba vo ba yi o kwaga tɔgena babam tei. Ba ma na kɔgɔ dedɛ na gilimi-ba. Wɛ nia zamesem tiina badwonna maa wora ba mage ni-kantɔgɔ dedaane-ba. 15Nɔɔna bam maama na nɛ Yezu to, ko ke-ba yaau lanyerane. Ba ma duri ba vo o tei ba jɔɔne‑o. 16O ma bwei-ba o we, “Á wora á mage ni-kantɔgɔ bɛ baŋa ne mo?”

17Nɔɔno wodwoŋi maa wo kɔgɔ kom wone ye o leiri‑o o we, “Berem tu, a ya jaane a bu mo a ba nmo tei se n yɔɔre‑o. Chichira mo jege‑o ka daana pa o ware o ŋɔɔne. 18Maŋa maama, ka ná jaane‑o, ka yeini ka yigi‑o ka de tega ne mo. Lilei-puŋa nwoŋi o ni ne ye o done o yeila. O yera yam maama maa yeini ya ko. Tɔ. A ma lwoori nmo kwaga tɔgena bam se ba zeili chichira kam se ka yage‑o ye ba ware.”

19Yezu na nigi konto to, o ma ta o we, “Abam zem nɔɔna bam bere á ba jege wo-dedoa de amo. A nam wó tiini a dáane abam tei ne se ko vo ko maŋe yei ne mo? A nam wó ke tɛ mo a zuri a bochare de abam? Ja-na bu wom á ba.” 20Ba ma ja‑o ba vo o tei. Chichira kam na nɛ Yezu to, ka ma su bu wom pa o sa kɔɔro. O ma to tega ne ye o bibila. Lilei-puŋa ma nwoŋi o ni ne.

21Yezu ma bwei bu wom kwo o we, “Maŋa kɔ mo ka bobo ka ja‑o?” O ma leiri‑o we, “O biini ne mo. 22Kuni dedɛ chichira kam jaane‑o ka de mini wone, de na wone se ka chɔge‑o. Nmo ná wó wane n ke kolo na wó woli debam to, popo se n kwaane n duri debam yiniga.” 23Yezu ma ta‑o o we, “Nmo tage n we, amo ná wó wane. Wolo maama nam ná jege wo-dedoa de amo, kolokolo tera Wɛ na bá wane o ke o pa konto tu.” 24Bu wom kwo laam ma laare o we, “Amo seene a jege wo-dedoa de nmo. Nam woli-ne se a taa fɔge a jega.”

25Yezu ma na nɔn-kɔgɔ dedɛ na dura ko maa beene ba tei. O laam ma bage chichira kam ye o ta de-ka we, “Nmo wolo na pae nɔɔna jiri memaaro de zɔ-kɔro to, a ta de nmo se n yage bu wom yera n viiri, se n daa‑n yé jwoori n yaare‑o.” 26Yezu na tage konto to, chichira kam ma chwoosi ye ka tiini ka su bu wom pa o sa kɔɔro. Ka ma daare ka yage‑o. Ka na yage‑o to, bu wom laam nye de too mo. Nɔɔna dedɛ maa we, “O tege mo.” 27Yezu laam ma ja o jeŋa o pa o zaŋe wɛɛne ye o zega.

28Yezu ma jwoori o vo sɔŋɔ. O na zo to, o kwaga tɔgena bam ma vo o tei ba yerane ye ba bwei‑o ba we, “Bɛŋwaane mo debam ware dé zeili chichira kam?” 29O ma leiri-ba o we, “Chichira kanto dwoŋi zeilim chamma. Ko ná dae we á seene á yia á lwoori Wɛ, ko ya bá wane.”

30Ba déem ma yage jei sem konto ye ba vo ba tɔge Galili wo ba kɛ. Yezu maa ba lage se nɔɔn-nɔɔno lɔre ba jei, 31o na jege o kwaga tɔgena bam o tei ne ye o bere-ba to ŋwaane. O maa bere-ba o we, “Leile konto ba lage ba ja Nabiin-bu wom ba ke nɔɔna jeŋa ne, ye ba laam wó go‑o. Da yatɔ dɛ ne o maa wó jwoori o bi.” 32O kwaga tɔgena bam maa wo nigi o taane dem kuri, ye ba kɔre se ba bwei‑o ba nii.

Wɔ mo ye nɔn-kamunu Wɛ tei ne?

Matiyu 18:1-9; Luka 9:46-50; 17:1-2

33Ba ma vo ba yi Kaparenia. Ba ma vo sɔŋɔ. Ba na zo to, Yezu ma bwei o kwaga tɔgena bam o we, “Dé na wo chwoŋa ne dé maa beene to, á ya wora á mage ni-kantɔgɔ daane. Ko ye bɛ ŋo ŋwaane mo?” 34Ba ma chem. Ba ya na maa beene to, ba mage kantɔgɔ daane se ba nii, banto wone wɔ mo ye kamunu o dwoi maama.#Luka 22:24 35Yezu ma jeini tega ne. O ma bwoŋi o nɔɔna fuga-balei bam se ba ba o tei. O ma ta de-ba o we, “Wolo ná lage se o taa ye nɔɔna yiga tu, konto tu maŋe se o ji ba maama kwaga tu, se o taa toŋe o pa ba maama mo.”

36O ma ja bu-balaŋa o pa o zege ba maama tetare ne. O ma kwei‑o o ke o ja-kukworo ne. O ma ta de-ba o we, 37“Wolo maama na wó zuli bu-balwa banto dwoŋi dedoa lanyerane amo yere ŋwaane to zuli amo mo. Wolo nam ná zuli amo, ko dae amo yerane mo o ke konto, se ko ye o zuli Baŋa Wɛ wolo na toŋe-ne to de mo.”

38Jɔn ma ta de Yezu o we, “Berem tu, dé ya nɛ nɔɔno wodwoŋi o na tɔge nmo yere ŋwaane o zeili setaana nɔɔna tei ne. O nam na dae debam kɔgɔ kom nyem to, de ma ta ded‑o we, o yage, o daa yé taa ke konto.” 39Yezu ma leiri o we, “Á ya ba jege se á che‑o. Nɔɔno wolo maama na tɔge amo yere ŋwaane o ke wo-kenkagele to bá wane o pipiri lela o ŋɔɔne ta-balɔrɔ o pa-ne. 40Kolo ŋwaane wolo maama na ba chuli debam to ye debam nɔɔno mo. 41A tɛ abam chega ŋwaane to, nɔɔno wolo ná nɛ abam, ye o ná dɛ amo yere ŋwaane o pa abam na se á nyɔ, á na ye amo Yezu Krista nyem to ŋwaane, konto tu wó tiini o na nyɔɔre Wɛ tei ne mo.

42Ko ná ye balo na ke ba wo-dedoa de amo, ye ba ná maŋe ba muri ne bu-balwa tei, nɔɔno wolo ná pɛ ba dedoa tusi Wɛ chwoŋa wone, konto tu tiini o chɔge mo dedɛ. Ba ná jaane nɔɔno wom konto ba daare ba lei kandwɛ-kamunu o ba ne, ye ba ná de‑o naneo kom wone se o te, konto gare waarem delo kotu na jege se o na Wɛ tei ne to. 43Nmo jeŋa ná pae n tusa, se n gwoni-ka n yage. Nmo ná gɛ n jeŋa, ye n daare n na ŋwea Wɛ tei ne, konto gare nmo ta ná jege n jea maama ye n vo te-seŋa, mɛ na ye mini delo na bá fɔge de dwei to. [44Jei sem konto ne,

‘Toa wó taa mu ba yera ye ka fɔge ka bá te.

Mini wó taa di-ba ye de fɔge de bá dwei.’]

45Ko woli da, nmo naga ná pae n tusa, se n gwoni-ka n yage. Nmo ná ye gwana ye n na ŋwea Wɛ tei ne, konto gare nmo ta ná jege n nɛ sem maama ye ba laam de‑m ba yage te-seŋa ne. [46Jei sem konto ne,

‘Toa wó taa mu ba yera ye ka fɔge ka bá te.

Mini wó taa di-ba ye de fɔge de bá dwei.’]

47Nmo yi nam ná pae n tusa, se n guri-de n yage. Nmo ná ye yi-doa tu ye n vo n woli Wɛ paare dem wone, konto gare nmo ta ná jege yia yalei ye ba laam de‑m ba yage te-seŋa ne. 48Jei sem konto ne,

‘Toa wó taa mu ba yera ye ka fɔge ka bá te.

Mini wó taa di-ba ye de fɔge de bá dwei.’#Izaya 66:24

49Nɔɔno maama jege se Wɛ kwei mini mo o ma faŋe‑o o nii, se o pa o bochare fɔge de kwɛ. 50Yɛ de lamma ye de wae de kwɛ wodiu. Yɛ ni nam ná ti, n daa‑n bá‑n wane n pa de jwoori de ja ni. Pa-na á wo taa ywomma da-ŋwaane, ne yɛ na pae wodiu ywomma tei to.”

Currently Selected:

Maake 9: KBG

Highlight

Copy